Grow up your mind / Engineering

06/05/2022

العادي ان انت بتشغل الاجهزة براحتك وتتفاجئ اخر الشهر بالفاتورة العالية 😂
بس الفيديو دا هيعلمك ازاي فعلا توفر وتدفع الفاتورة اللي انت عايزها .. اللينك اول كومنت

08/04/2022

مهندسين التحكم هما ملوك العالم بجد 😎
تعرف ايه عن ال P Controller ؟

08/05/2021

واحدة من أقوى الظواهر اللى بتكون كميات مهولة من الطاقة تسمى الhydrogen flash ودى بتحصل فى بعض النجوم زى الشمس بتاعتنا فى أواخر حياتها :v بس غالبا عشان نفهمها هناخد لفة فى الكوانتم وال Stellar structure and evolution فاصبروا معانا بقى :'D

عارف مبدأ باولى للاستبعاد (Pauli exclusion principle) اللى كنت بتستخدمه عشان ترتب الإلكترونات فى ثانوى دة؟ :'D دة مش استخدامه الوحيد :'D

فى الفيزيا الكلاسيكية، مفيش أى مشكلة إن جسمين فى نفس "المكان" يبقى ليهم نفس الطاقة بالظبط. مثال على دة مثلا إن مفيش مشكلة إن يكون فى قمرين للمشترى عندهم نفس المدار حواليه.

لكن لما نشوف الحاجات الصغيرة (أوى) الكلام دة مش بينفع لبعض الجسيمات زى الإلكترونات ونواة الهايدروجين، لازم كل جسيم منها يبقى ليه خصائص مختلفة نقدر نقيسها ونفرق بيها بينه وبين أى حاجة تانى (خلينا نقول "طاقة" مختلفة عن باق الجسيمات بدل "خصائص مختلفة نقدر نقيسها" مجازا :'D )

المهم دة ليه نتيجة مثيرة جدا، إن حتى لو مفيش أى حرارة فى النظام بتاعك ( = مفيش أى طاقة أنت مديها للجسيمات) برضو هيفضل عندهم بعض الطاقة، لإن مش هيعرفوا كلهم يروحوا لأقل "طاقة" ممكنة -صفر مثلا-، لإن لو واحد راح، الباقى لازم ياخد "طاقة" أعلى منه؛ لإن مينفعش كلهم يبقى ليهم نفس "الطاقة"!

فى سياق آخر، فالنجوم عايشة على دمج الهايدروجين لهيليوم فى النواة بتاعتها (آه مش كل حتة، النواة بس) ومع التقدم فى السن :'D الهايدروجين اللى فى النواة بتاعتها بيخلص. بس دى مش النهاية لأ :'D نجمة فى كتلة الشمس مثلا ساعتها هتبدأ تدمج هايدروجين حوالين النواة

طب ومتدمجش الهيليوم ليه اللى فى النواة؟ لإن لا الكثافة ولا الحرارة مناسبين إن دة يحصل. زى ما الهايدروجين كان بيحصله دمج فى النواة بسبب إن الحرارة هناك كانت مناسبة للدمج بتاعه، الهيليوم محتاج حرارة مناسبة له.

طب والهيليوم هيعمل إيه؟ بفعل الجاذبية كثافته قاعدة تزيد (بينكمش). مع الوقت الجزء اللى كان نواة قاعد بيصغر أكتر وأكتر بس هنا بقى يجى تأثير مبدأ باولى ويوقفه من الإنكماش عند نقطة ما عشان مينفعش أكتر من إلكترونين يبقى ليهم نفس "الطاقة". النواة دلوقتى اتحولت من مادة عادية لمادة degenerate، المادة اللى نعرفها عادى بس بأقل "طاقة" ممكنة وغالبا أقل حجم كمان.

فى الفترة دى من حياة النجم ولسبب ما الخصائص بتاعته (أهمها لمعانه أو الطاقة اللى بيطلعها - luminosity) بتعتمد كليا على كتلة النواة بتاعته (اللى مكونة degenerate helium دة).

طبعا الهيليوم قاعد يزيد نتيجة دمج الهايدروجين حوالين النوة والهيليوم دة يجى بدوره يبقى degenerate هو كمان فالكتلة بتاعت النواة قاعدة بتزيد فلمعان النجم يزيد (وعشان لمعانه يزيد لازم كمية هايدروجين أكتر تندمج حوالين النواة وعيد البراجراف تانى :'D)

مع الوقت الكتلة بتاعت الجزء اللى بيدمج الهايدروجين بتقل (دور ليه؟) وبما إننا قلنا إن الطاقة اللى بتحتاج تكونها بتزيد (من البراجراف اللى فوق) برضو. فحجم يقل وطاقة إنتاجها يزيد فدة معناه إن الطاقة لكل حجم قاعدة تزيد جدا والحرارة قاعدة تزيد

وفى لحظة فارقة لما الحرارة توصل ل 100 مليون كيلفن بيبدأ إندماج الهيلوم عشان يكون كاربون. بس إندماج الهيلويم بيسبب إن الحرارة تزيد فهيليوم أكتر يحصله إندماج ونفضل فى دة لحد ما اللمعان بتاع النواة بيوصل ل 10 مليار مرة قد لمعان الشمس دلوقتى، اللى هو قد لمعان مجرة!

بس دة بيفضل ثوانى لإن الطبقات اللى على أطراف النواة بتبدأ تبعد بإنها تاخد كل الطاقة اللى طالعة دى (فآه مش هتشوف اللمعان دة لو واقف برة النجم :'D ساد جدا يعنى :3 ) ومع الوقت وزيادة الحرارة النواة بتبدأ تتوسع وتبرد فال degeneracy بتاعها بيقل وبيبدأ النجم يعيش وهو عنده نواة بتدمج هيليوم وحواليها غلاف بيدمج هايدروجين.

بس كدة كفاية :'D وتوضيح لكلمة "طاقة" اللى مكتوبة فى البوست هتلاقيه فى الكمنتس

البوست معمول بتعاون بينا وبين STEM Astronomy Club

23/03/2021

لو انت عندك فكرة وعايز تحولها لواقع هتعمل ايه ؟
هتشمر عن ساعديك وتمسك قلم وورقة وتبدأ تعمل حساباتك وتفكر في فكرتك الخطيرة اللي هتكسر الدنيا
دا مبيختلفش كتير عن مصممين المنتجات .. الراجل الديزاينر من دول بيبقي قاعد سرحان في خياله وهوب تنطله الفكرة وبيبقي محتاج يعمل تصور مبدأي للمنتج دا والشكل النهائي بتاعه هيكون عامل ازاي
فبيبدأ يستخدم برامج علي الكمبيوتر يطلق عليها CAD
اختصارا ل Computer aided design يعني ساعدتك هتعمل ديزاين بمساعدة الكمبيوتر .. ومن ضمنها البرامج اللي بتعمل 3d modeling بحيث تقدر تصمم الموديل للمنتج بتاعك وتتخيل شكله .. حتي لو فيه اجزاء بتتحرك تقدر تنفذها وتشوف هتنفع فعلا ولا فكرتك غلط 🤣
ومش كدة وبس دا البرامج دي بتساعدنا نعمل analysis للمنتج دا زي مثلا هيستحمل force اد ايه وبعديها ينكسر .. فين اضعف نقطة ... الخ
ممكن تستخدم برامج مجانية زي fusion 360 ودا مناسب للهواه والمحترفين
التطبيقات كتير طبعا .. مثلا لو بتجهز شقتك تقدر تعمل تخيل مبداي للشقة والديكور هيبقي عامل ازاي
https://youtu.be/taWGERSp2ZQ
مش كدة وبس .. دانتا تقدر مثلا تصمم هدية لشخص عزيز عليك وتنفذها وتتديها له
https://youtu.be/YARt0DoLyEE
ولو ليك في الطباعة ثلاثية الابعاد 3D Printing ممكن تعمل هدية او فكرة او منتج وتطبعه فعلا
https://youtu.be/Y4tu1AMYVzU

21/11/2020

زحل والمشترى هيقربوا من بعض كل يوم لحد ٢١ ديسمبر وساعتها مش هيبقى فاصل بينهم إلا ١ من عشر أجزاء من الدرجة ^^

اخر مرة دة حصل جاليليو كان لسة عايش! ^^

Between now and Dec 21 Saturn & Jupiter approach each other on the sky until a mere tenth of a degree separates them.

Last time this happened Galileo was alive.

The solar system: A Cosmic Ballet, choreographed by the forces of gravity.

Hayden's own Joe Rao tells all:
https://www.space.com/jupiter-saturn-great-conjunction-2020

28/05/2020

مركبة Soyuz الروسية مقابل SpaceX Dragon Crew

يوم السبت ٣٠ مايو هيكون انطلاق أول رحلة مأهولة ل SpaceX

27/01/2020

بوست في حب ال genetic algorithm
كنا نزلنا بوست نسال فيه عن ال optimization
ال optimization دي tool بتتطور عبر السنين
بنستخدمها علشان نلاقي احسن design وسط عدد كبير جدا من التصميمات الممكنة بينما نلتزم بمجموعة قيود مفروضة علينا
طبعا ليها طرق كتير من الطرق دي ال genetic algorithm اللي بتعتمد علي مبدا the survival of the fittest
علشان تعرف اكتر عنها شوف الفيديو دا بيتكلم عن ال optimization بشكل عام وال genetic algorithm بشكل خاص

A.N @ GUYM

25/01/2020

تعرف ايه عن ال Optimization ؟

04/12/2018

يوم 26/11/2018 نجحت InSight في الهبوط على سطح المريخ 🙄🙄
هو ايه اللي بيودينا هناك - كبشر يعني 😂 - كل فترة بنستفاد ايه!؟
عادة بنختار المريخ لانه قريب مننا، وصخري شبهنا ولو فكرنا نروح عطارد مثلا فدرجة حرارته بليل 173 تحت الصفر وبالنهار 427. بلاش عطارد نروح الزهرة شبهنا في الحجم والكتلة 🤩 بس متوسط درجة الحرارة عليه 467
فحاليا منقدرش ننزل اي حاجة هناك 🤷‍♂️

خلاص متفقين ان ملناش غير المريخ في المجموعة الشمسية دي رايحين نعمل ايه🤔 رايحين ندرس تكوين الكواكب الصخرية - يا سراج بيه 😂
كوكبنا صخري اه، لكن فيه اختلافات بين كل كوكب بتميزه وده من ضمن أهداف المهمة، تفسير سبب الاختلاف، وكمان تكوين الارض اتغير بشكل كبير بسبب نشاط الصفائح التكتونية وتيارات الحمل في طبقى الدثار (الطبقة بين سطح الارض ولب الارض الخارجي) بعكس المريخ اللي نشاطة اقل بكتير عن كوكبنا فنقدر نعتبره كبسولة زمنية للمراحل الاولية لتكوين الكواكب الصخرية سواء في مجموعتنا
أو مجموعات شمسية تانية

ف InSight تعتبر أول مهمة لاكتشاف عمق كوكب وهتكون وظيفتها انها تجمع معلومات عن نشاط الزلازل وتصادم النيازك وتدفق الحرارة والمعلومات دي هي اللي هتساعدنا نتعرف اكتر على عملية تكوين الكواكب اكتر

17/11/2018

يوم الجمعة 16 نوفمبر في مدينة فرساي الفرنسية صوّت ممثلين 60 دولة على إلغاء تعريف الكيلوجرام...

أول تعريف للكيلوجرام كان كتلة مكعب من الماء طول ضلعه 1 ديسيمتر (1/10 من المتر) والمتر كان تعريفه هو طول جزء من 10 مليون من المسافة من القطب الشمالي لخط الاستواء وقياسها اخد 7 سنين!!
حد لاحظ المشكلة في الوحدات دي؟ كده اي دولة ممكن تكرر تجربة القياس وتوصل لنفس النتيجة... في سنة 1870 حذر العالم ماكسويل بأن الارض ممكن تتمدد بالحرار وتنكمش بالبرودة والمتر هيتغير!

ومن وقتها قرر العلماء انهم هيتخلوا عن أي اجسام مادية كمرجع لتعريف وحدات القياس واستبدالها بالثوابت الفيزيائية زي ثابت الجاذبية G وسرعة الضوء C ونجحنا في اعادة تعريف ست وحدات من النظام المتري على مدار عشرات السنين ومش متبقى غير الكيلوجرام

الكيلوجرام من سنة 1799 ولحد قبل التصويت كان هو الوزن المكافئ لاسطوانة من سبيكة مصنوعة من البلاتنيوم والاريديوم محفوظة في 3 أوعية مفرغة من الهواء وكل ده في خزنه في قبو المكتب الدولي للأوزان والمقاييس وفيه منها 6 نسخ متطابقة، في أخر عملية قياس لقوا ان النسخة الاصلية وزنها قل ب 50 ميكروجرام وفيه اختلاف بين اوزان النسخ!

يبقى مفيش قدامنا فعلا غير الثوابت الفيزيائية طيب بسيطة عندنا (E= mc^2) وكمان (E = hf) ثابت بلانك في تردد الفوتون يدينا طاقته يبقى (hf = mc^2) ومنها (m = hf/c^2)

كده اتحلت؟ لا لسه مشكلة... ثابت بلانك بيساوي (34-^10×6.62607004) ودقة آخر عدد من الارقام بعد العلامة العشرية كان غير دقيق وده كان السبب في تأخير اعادة التعريف لكن بعد عمليات قياس وصلنا لرقم ادق لثابت بلانك هو
(34-^10×6.62607015) والقيمة دي هي المستخدمة في التعريف الجديد للكيلوجرام

تغيير تعريف الكيلوجرام نتج عنه اعادة تعريف ل 3 وحدات من النظام المتري هي الكلفن والمول والامبير
وبكده النظام المتري كله بقى معتمد على الثوابت الفيزيائبة مش أجسام مادية محفوظة في أماكن بعيدة وتحقق الهدف من انشاء النظام أيام الثورة الفرنسية بان تكون وحدات القياس متاحة لكل الناس وصالحة لكل الازمنة
pour tous les hommes, pour tous les temps

27/10/2018

حالا حالا مطلوب اكياس دم O+ حالا
لاجراء عملية قلب مفتوح في القاهرة
مستشفى بدران بالمهندسين

ت ابن الحالة م اسلام ٠١٠٦٨٥٨٤٥٠٠
مؤسس صفحات جرو اب

نشر في اقصى سرعة حالا حالا
و كلم تليفون اصحابك لو تعرف حد قريب منك

اسم الحالة محمد محمد عبد الخالق