17/07/2026
📣 (الخلاصة من أرض الواقع) دليل مبسط : إزاي تحول عداد الكهرباء الكودي لعداد قانوني بإسمك؟ (التسهيلات الجديدة) 💡
⬅️ لكل الناس اللي بتسأل عن موضوع تحويل العداد الكودي لقانوني.. الموضوع مبقاش معقد زي زمان، وبقى بيتم بإجراءات إدارية بسيطة جداً بعد التيسيرات الأخيرة اللي أعلنتها وزارة الكهرباء ووزارة التنمية المحلية.
⬅️ لو عندك "عداد كودي" ومبناك مرخص، أو قدمت على تصالح، أو حتى بيتك قديم، البوست ده فيه الخلاصة من الألف للياء 👇
💸 أولاً: ليه لازم تحول في أسرع وقت؟ (الميزة المالية)
▪️إلغاء السعر الموحد والعودة لنظام الشرائح: لما العداد يبقى قانوني بإسمك، هترجع تتحاسب على نظام الشرائح المنزلية المدعومة اللي بتبدأ من 68 قرشاً لأول شريحة، وده هيوفر في شحنك الشهري بمعدل بيوصل لـ 40%.
▪️يمكنك تقديم إيصال شحن العداد للشركات الحكومية أو البنوك كإثبات لمحل الإقامة لفتح حساب أو إستخراج أوراق رسمية.
▪️يحمي العقار من قرارات الإزالة الصادرة من المحليات أو جهات الولاية إذا لم يتم التصالح.
✨ ثانياً: إيه هي "التيسيرات الجديدة" اللي وفرتها الدولة؟
الدولة لغت الروتين القديم، والتسهيلات الحالية بتضمنلك:
- التحويل دفتري وإداري (مجاناً): مش هتدفع ثمن عداد جديد، ومش هتعمل مقايسة جديدة، ومفيش عامل هيجي يشيل العداد.. العداد الحالي هيفضل راكب زي ما هو، والتغيير بيحصل على سيستم الشركة بس.
- بدائل مرنة للأوراق: مش لازم تنتظر لآخر خطوة في التصالح، شركات الكهرباء بقت تقبل صور نماذج التصالح المختلفة (زي نموذج 8 أو 10 المؤقت والنهائي) طالما معاك جواب المركز التكنولوجي.
- جدولة المديونيات: لو العداد الكودي عليه أي فروق أسعار أو مديونيات قديمة، بتقدر تقسطها مع شركة الكهرباء ومبتعطلش إجراءات التحويل.
- - - - - - -
🏛️ ثالثاً: مطلوب إيه من "المركز التكنولوجي"؟ (حسب حالة مبناك)
✍️ علشان شركة الكهرباء توافق، لازم تثبت إن مبناك واخد وضع قانوني أو متصالح أو مستقر. الإجراء ده بيتم في المركز التكنولوجي التابع لمجلس المدينة أو الحي بتاعك، والمطلوب منك بيختلف حسب حالتك :
1️⃣ لو المبنى بتاعك "مخالف وقدمت على تصالح":
◾ الأوراق المطلوبة: (صورة بطاقتك + عقد ملكية الشقة + صورة نموذج التصالح المتوفر معاك سواء 7 أو 8 أو 10 + سداد رسوم المعاينة) .
⬅️ النتيجة: بعد المعاينة، بتستلم (خطاب أو شهادة توصيل المرافق) الموجهة لشركة الكهرباء.
2️⃣ لو المبنى بتاعك "قانوني ومعاك رخصة مباني سارية":
الموضوع هنا أسرع ومبتدخلش في دوامة التصالح، بتطلب حاجة اسمها "شهادة مطابقة وتوصيل مرافق دائمة":
◾ الأوراق المطلوبة: (صورة رخصة المباني مع الأصل للاطلاع + صورة البطاقة + عقد الملكية + شهادة صلاحية المبنى للإشغال معتمدة من نقابة المهندسين + شهادة الإشراف على التنفيذ وإفادة بعدم وجود مخالفات أو قرارات إيقاف).
⬅️ النتيجة: بتطلع لجنة تنظيم تعاين وتتأكد إنك بنيت طبقاً للرخصة والرسومات، وبتسلمك (جواب المرافق وشهادة المطابقة) فوراً.
3️⃣ لو المبنى بتاعك "قديم مبني قبل سنة 2008":
القانون هنا بيحميك وبيعفيك تماماً من التراخيص والتصالح، وبتطلب "شهادة إثبات أقدمية عقار ومطابقة مرافق":
◾ الأوراق المطلوبة: بتثبت قدم البيت بأي مستند رسمي صادر قبل سنه2008 (زي كشف عوائد وضريبة عقارية قديم، عقد ملكية مسجل أو محكوم بصحة توقيع قديم، إيصال مياه أو تليفون أرضي قديم، أو حتى لو عندك عداد كهرباء قديم في البيت وبتفصل منه أدوار) + صورة بطاقتك وسداد رسوم المعاينة.
⬅️ النتيجة: الحي بيعاين للتأكد من السلامة الإنشائية، وبيطلعلك (جواب مرافق دائم) لشركة الكهرباء لأن البيت واخد وضع قانوني بالتقادم والإستقرار.
📁 رابعاً: الملف النهائي اللي هتقدمه لشركة الكهرباء
بمجرد ما تستلم جواب المرافق من المركز التكنولوجي (سواء رخصة، تصالح، أو أقدمية)، بتجهز ملفك النهائي وتطلع بيه على هندسة الكهرباء (أو ترفعه على المنصة الموحدة لخدمات الكهرباء إلكترونياً):
- خطاب أو شهادة توصيل المرافق / المطابقة (اللي جبتها من المركز التكنولوجي).
- صورة بطاقة الرقم القومي للمالك (سارية) .
- عقد ملكية موثق أو عقد إيجار للشقة.
- صورة مستند الأقدمية أو رخصة المباني أو نموذج التصالح.
- صورة لآخر إيصال شحن للعداد الكودي الحالي (علشان ياخدوا منه رقم العداد والبيانات).
⚙️ خامساً: الخطوة الأخيرة
بعد تقديم الملف وسداد أي رسوم إدارية بسيطة، بيتم تعديل البيانات على سيستم شركة توزيع الكهرباء، وبيتسجل العداد رسمياً بإسمك بدلاً من الكود الرقمي، وتبدأ تستفيد من الدعم والشرائح المخفضة فوراً.
💡 نصيحة: متأجلش الخطوة دي.. الجوابات بتطلع بسرعة والمنظومة الإلكترونية حالياً بتخلص الإجراءات في أيام قليلة ووفر فلوس الشحن المرتفعة!
#التصالح #الكهرباء
