07/03/2023
“ਓਇ ਤੁਸੀਂ ਗੁਰੂ ਘਰ ਆਏ ਜੇ! ਕੋਈ ਚੱਜ ਦਾ ਗਾਣਾ ਲਾ ਲਓ,” ਉਸ ਨੇ ਸਿਰਫ਼ ਇੰਨਾ ਕਿਹਾ ਸੀ ਤੇ ਗੁਰੂ ਘਰ ਆਇਆਂ ਨੇ ਉਸ ਨੂੰ ਗੁਰੂ ਕੋਲ ਪਹੁੰਚਾ ਦਿੱਤਾ।
ਤੁਸੀਂ ਕਿਸੇ ਨੂੰ ਧਾਰਮਿਕਤਾ ਦੇ ਚਿੰਨ੍ਹ ਦੇ ਸਕਦੇ ਹੋ। ਬਾਣਾ ਪੁਆ ਤੇ ਬਾਣੀ ਰਟਾ ਸਕਦੇ ਹੋ। ਧਰਮ ਸਥਾਨਾਂ ਅੰਦਰ ਵਾੜ ਸਕਦੇ ਹੋ। ਪਰ ਉਸ ਨੂੰ ਅਧਿਆਤਮਿਕਤਾ ਨਹੀਂ ਸਿਖਾ ਸਕਦੇ। ਬਾਣੇ ਨਾਲ ਜੁੜੀ ਜ਼ਿੰਮੇਵਾਰੀ ਨਹੀਂ ਸਮਝਾ ਸਕਦੇ, ਬਾਣੀ ਦਾ ਮਹੱਤਵ ਤਾਂ ਬਹੁਤ ਦੂਰ ਦੀ ਗੱਲ ਹੈ। ਨਹੀਂ ਦੱਸ ਸਕਦੇ ਕਿ ਧਰਮ ਸਥਾਨਾਂ ਦਾ ਧਰਮ ਨਾਲ ਕੀ ਰਿਸ਼ਤਾ ਹੈ। ਧਰਮ ਸ਼ੁਰੂ ਹੀ ਉੱਥੋਂ ਹੁੰਦਾ ਹੈ, ਜਿੱਥੇ ਸਾਰੇ ਚਿੰਨ੍ਹ ਖਤਮ ਹੋ ਜਾਂਦੇ ਹਨ। ਬਾਹਰੀ ਕੰਧਾਂ ਪਿੱਛੇ ਰਹਿ ਜਾਂਦੀਆਂ ਹਨ।
ਤੁਹਾਨੂੰ ਗ਼ੁੱਸਾ ਹੈ, ਕਾਮਰੇਡ ਸਿੱਖਾਂ ਨੂੰ ਨਿੰਦਣ ਦਾ ਕੋਈ ਮੌਕਾ ਹੱਥੋਂ ਨਹੀਂ ਜਾਣ ਦਿੰਦੇ। ਪਰ ਕੀ ਤੁਹਾਨੂੰ ਨਹੀਂ ਲੱਗਦਾ ਕਿ ਤੁਹਾਡੇ ਮੌਕੇ ਦੇਣ ਦੇ ਮੌਕੇ ਲਗਾਤਾਰ ਵੱਧਦੇ ਜਾ ਰਹੇ ਨੇ?
ਸਵਾ ਲੱਖ ਨਾਲ ਇਕੱਲੇ ਲੜਨ ਦਾ ਦਾਅਵਾ ਕਰਨ ਵਾਲੀ ਕੌਮ ਭੀੜ ਬਣਦੀ ਜਾ ਰਹੀ ਹੈ। ਇਹ ਕਾਮਰੇਡਾਂ ਦੇ ਨਹੀਂ, ਤੁਹਾਡੇ ਵਿਚਾਰਨ ਵਾਲਾ ਮੁੱਦਾ ਹੈ। ਕਿਸੇ ਹੋਰ ਨੂੰ ਨਹੀਂ, ਤੁਹਾਨੂੰ ਇਸ ਗੱਲ ਦਾ ਫਿਕਰ ਹੋਣਾ ਚਾਹੀਦਾ ਹੈ।
ਤੁਹਾਨੂੰ ਡਰ ਲੱਗਣਾ ਚਾਹੀਦਾ ਹੈ ਕਿ ਤੁਹਾਨੂੰ ਜ਼ਬਰਦਸਤੀ ਫੜਾਏ ਜਾ ਰਹੇ ਹੋਛੇ ਤੇ ਫੁਕਰੇ ਨਾਇਕ ਤੁਹਾਨੂੰ ਖਲਨਾਇਕ ਬਣਾ ਰਹੇ ਹਨ।
ਇੱਕ ਦਰਸ਼ਨੀ ਤੇ ਸਿਦਕੀ ਸਿੱਖ ਗੱਭਰੂ ਦੀ ਇਸ ਤਰ੍ਹਾਂ ਹੱਤਿਆ ਦਿਲ ਕੰਬਾਊ ਘਟਨਾ ਹੈ। ਅਫ਼ਸੋਸ!
