Norðurorka hf.

25/08/2026

Hamarstígur lokaður vegna framkvæmda

Í sumar hefur Norðurorka unnið að því að fjarlægja hitaveitubrunna í Hamarsstíg, Engimýri og Víðimýri auk þess að fara í spennubreytingar í Engimýri. Sú vinna hefur gengið vel í góðu samstarfi við íbúa og verktaka, en óhjákvæmilegt er að svo viðamiklar framkvæmdir hafi áhrif á daglegt líf íbúa.

Nú er komið að seinni hluta framkvæmda á þessu svæði. Akureyrarbær mun endurnýja gangstéttir og malbika göturnar og samhliða því mun Norðurorka endurnýja kaldavatnslögn, fráveitu regnvatns og rafstrengi í Hamarstíg.

Nánari upplýsingar og kort: https://www.no.is/is/um-no/frettir/hamarstigur-lokadur-vegna-framkvaemda

21/08/2026

Meðfram Borgarbraut á Akureyri hefur verið unnið að nýjum göngustíg og um leið hafa rafvirkjar Norðurorku unnið að endurnýjun háspennustrengs. Veitur Norðurorku liggja að stórum hluta undir göngustígum og götum, því er upplagt að nýta tækifærin sem gefast til að fara í viðhaldsvinnu þegar verið er að grafa ofan í jörðina á annað borð.

30/07/2026

Þriðjudaginn 28. júlí komu nemendur frá Jarðhitaskóla Sameinuðu þjóðanna í heimsókn til Norðurorku, til að fræðast um starfsemi fyrirtækisins og rekstur hitaveitu á starfssvæði NO. Í fjölda ára hefur heimsókn frá skólanum verið fastur liður yfir sumartímann, en hópurinn fer víða um Norðurland og skoðar fleiri svæði á ferðalaginu.

Sigurveig Árnadóttir, verkefnastjóri rannsókna og viðhalds, og Pétur Freyr Jónsson yfirvélfræðingur fóru með hópinn í leiðsögn um helstu vinnslusvæði hitaveitu á svæðinu, Laugaland og Hjalteyri. Þar fengu þau að skoða dælustöð og borholuskúra, þar sem Pétur Freyr útskýrði hvernig kerfin virka. Á meðan keyrt var á milli svæðanna sagði Sigurveig frá sögu hitaveitunnar og fór yfir þróun í nýtingu jarðhita á svæði Norðurorku.

Í lok heimsóknarinnar var haldið í höfuðstöðvar Norðurorku þar sem Sigurveig, sem er doktor í jarðfræði, sagði betur frá leit að jarðhita á svæðinu undanfarin ár. Einnig fór hún yfir áskoranir og tækifæri til framtíðar. Pétur Freyr gaf nemendum innsýn í skjákerfi hitaveitunnar og hvernig hægt er að stýra hitaveitunni frá skrifstofunni. Að lokum sagði Rögnvaldur Már Helgason, verkefnastjóri upplýsingamiðlunar og kynningarmála, frá sögu Norðurorku og starfsemi fyrirtækisins sem snýr að annari veitustarfsemi en hitaveitu.

Jarðhitaskóli Sameinuðu þjóðanna er einn fjögurra skóla GRÓ, þekkingarmiðstöðvar þróunarsamvinnu. Hlutverk skólans er að veita ungum sérfræðingum frá þróunarlöndunum þjálfun í rannsóknum og nýtingu jarðhita. Skólinn er mikilvægur þáttur í þróunaraðstoð Íslendinga og á 45 árum hefur skólinn útskrifað hátt í 900 nemendur.

30/07/2026

Framkvæmdum í Lækjargötu og Aðalstræti er nú að ljúka og verið er að klára frágang á gangstétt milli Aðalstrætis og Hafnarstrætis. Búið er að malbika gatnamótin og öllum götulokunum hefur verið aflétt.

Verkefnið snerist um endurnýjun regnvatsnlagnar, kaldavatnslagnar og raflagnar, auk nýrra tenginga við hitaveitu. Meðfylgjandi eru myndir sem voru teknar í gær, 29. júlí, og myndir frá framkvæmdum fyrr í sumar.

29/07/2026

Vegna framkvæmda í kringum stífluna í Glerárdal verður vegurinn þangað lokaður fyrir almennri umferð frá svæði Skotfélags Akureyrar og upp að stíflunni, næstu 7-14 daga. Hægt verður að komast upp að stíflunni austan megin við Glerá, en ekki yfir hana.

Stór vinnutæki verða notuð við framkvæmdirnar og til að tryggja öryggi allra er mikilvægt að vegfarendur virði lokanir.

23/07/2026

Hvað með sorpkvarnir og lífrænan úrgang í fráveitunni?

Sorpkvarnir eru ekki mjög algengar í íslenskum eldhúsum en þær eru þó seldar hjá nokkrum fyrirtækjum, og margir þekkja þær erlendis frá. Þær eru ekki hentugar fyrir fráveitukerfi Norðurorku.

Sorpkvarnir sem venjulega eru hluti af niðurfalli í eldhúsvaski, saxa niður matarleifar og skila þeim beint í fráveitukerfið. Kerfið er ekki hannað til að taka við slíkum úrgangi, heldur aðeins úrgangi á borð við p**s, kúk, aðra líkamsvessa og klósettpappír. Allt sem er stærra en 3mm er sigtað frá í hreinsistöð Norðurorku. Urðun á þeim frágangi er kostnaðarsöm og aukið magn úrgangs í fráveitunni sem ekki á heima þar eykur viðhaldskostnað og utanumhald. Matarleifum fylgir einnig fita, sem hleður utan á sig og getur skapað stíflur í kerfinu. Þessar stíflur geta orðið í lögnum innan lóðamarka og þá er það fasteignaeigandinn sem þarf sjálfur að borga yfir hreinsun og viðgerðir.

Öllum matarleifum ætti að koma í lífrænt sorp en í kjölfar breytinga á flokkunarkerfi úrgangs ættu öll heimili að eiga auðvelt með að losa sig við lífrænan úrgang í sérstakar tunnur. Kerfinu var fyrst breytt fyrir um 15 árum síðan á Akureyri og má segja að sú breyting hafi tekist vel. Sorphirða bæjarins sér um að ná í úrganginn og koma honum í jarðgerðarstöðina Moltu ehf. sem staðsett er í Eyjafirði. Þar er úrgangurinn brotinn niður við loftháðar aðstæður og úr verður svokölluð molta. Moltuna er síðan hægt að nota sem jarðvegsbæti, til landfyllingar eða jafnvel sem áburð. Á Akureyri er moltan nýtt í ýmsa starfssemi, t.d. í Lystigarðinum, á golfvellinum og í landbúnað. Mikill umhverfisávinningur felst í því að koma lífrænum úrgangi í jarðgerð, frekar en í fráveitukerfið eða í urðun.

29/06/2026

Stella Árnadóttir er umhverfis- og öryggisstjóri Norðurorku og hér fer hún vel yfir vandamálin sem rusl í fráveitunni skapar.

Þegar þú setur blautklúta og annað rusl í klósettið, gætir þú skapað dýrt vandamál og og kostnaðurinn vegna þess gæti lent á þér. Húseigendur bera ábyrgð á lögnum innan lóðar og stíflurnar geta orðið þar rétt eins og annarsstaðar í fráveitukerfinu. Með því að setja ekkert annað en p**s, kúk, aðra líkamsvessa og klósettpappír í klósettum minnkum við þörfina fyrir kostnaðarsamt viðhald og viðgerðir á fráveitukerfinu.

26/06/2026

Hver er munurinn á blautþurrku og klósettpappír í fráveitulögnum?

Óskar Þór gerir hér létta tilraun með því að líkja eftir ferðalaginu í gegnum lagnirnar, þar sem munurinn sést mjög vel. Blautþurrkur eru eitt stærsta vandamálið í fráveitukerfi Norðurorku, enda eiga þær ekki að fara í klósettið heldur í ruslið.

Stíflurnar geta myndast í lögnum innan lóða og þar þurfa húseigendur sjálfir að losa þær. Það getur því verið dýrt að setja blautþurrkur í klósettið, bæði fyrir húseigendur en einnig fyrir samfélagið allt þegar stíflurnar myndast í fráveitukerfi Norðurorku. Sýnum ábyrgð og setjum ekkert annað í klósettið en p**s, kúk, aðra líkamsvessa og klósettpappír.

25/06/2026

24/06/2026

Blautþurrkur og klútar eiga að fara í ruslið!

Hvern dag berst gríðarlega mikið magn af rusli í nýju hreinsistöð okkar Akureyringa að Sandgerðisbót. Auk þess að valda skaða á umhverfi og dýralífi þá fer mikil vinna og kostnaður í að hreinsa lagnir og búnað ásamt því að farga rusli. Stór hluti aðskotahluta í fráveitukerfinu eru blautklútar. Þó svo að fram komi á umbúðum að hægt sé að sturta niður blautklútum, þá þýðir það ekki að þeir eigi að fara þar ofan í. Blautklútar og þurrkur brotna hægt og lítið niður í vatni, þveröfugt við hefðbundin klósettpappír.

Fráveitukerfið ræður illa við þessa klúta og líkur á bilunum aukast. Með því að ganga vel um fráveituna getum við dregið úr álagi og lækkað kostnað. Þá hafa húslagnir einnig stíflast vegna blautklúta, en þá lendir kostnaður við úrbætur sem og óþægindi á íbúum og eigendum.

Sýnum ábyrgð og munum að klósettið er ekki ruslafata.