21/07/2026
မိုးရာသီမှာ ကွန်ကရစ်လောင်းရာတွင် ဆောင်ရန်/ရှောင်ရန်အချက်အများကြီးထဲကမှ ဆရာဦးစန်းနွယ် (P.E(Construction)) ရဲ့ ကွန်ကရစ်လုပ်ငန်း ပြဿနာများနှင့် ကာကွယ်ပြုပြင်နည်းများစာအုပ်မှ အချက်အလက်အချို့ကို မျှေ၀ပေးလိုက်ပါတယ်ရှင့်...
😊😊😊
မိုးရာသီတွင် ကွန်ကရစ်လောင်းခြင်းလုပ်ငန်းလုပ်ကိုင်ရမည့်သူများကို စိတ်ဒုက္ခအပေးဆုံး အကြောင်းအရာတစ်ခုကိုပြောပါဆိုလျှင် ကွန်ကရစ်လောင်းရန် အဆင်သင့်ဖြစ်ချိန်မှာ မိုးကုတ်စက်ဝိုင်းပေါ် တက်လာသည့် ညှို့ညှို့မှိုင်းမှိုင်း တိမ်တိုက်ကြီးများဟုဆိုလျှင် မှားမည်မဟုတ်ပါ။ ထိုအခြေအနေမျိုးတွင် ကွန်ကရစ်လောင်းမည့် အစီအစဥ်ကို ဆက်လုပ်ရမည်လား၊ ရွှေ့ဆိုင်းရမည်လားဆိုသည်ကို ဆုံးဖြတ်ရန်ခက်ခဲလေ့ရှိပါသည်။
မိုးရွာသွန်းစဥ်ကွန်ကရစ်လောင်းခြင်းကကွန်ကရစ်အရည်သွေးထိခိုက်မှုအများကြီးရှိနိုင်တာကြောင့် ကွန်ကရစ်သွန်းလောင်စဥ်မိုးရွာသွန်းမှုကြုံလာမှုကို ကြိုတင်ကာကွယ်ရန်အချက်အလက်အများကြီးထဲကမှအကျဥ်းချုပ်ကို ဖော်ပြလိုက်ရပါတယ်ရှင့်...
- ကြိုတင်အစီအစဥ်ရေးဆွဲထားပါ
- အကာအကွယ်ပစ္စည်းများကြိုတင်စုဆောင်းထားပါ
- မိုးရွာသည့်အခါတွင် သဲနှင့်ကျောက်များထဲတွင် ရေ. ပါ၀င်မှု သာမန်အချိန်ထက် ပိုများတတ်တာကြောင့် ကွန်ကရစ်ဖျော်စပ်သည့်အခါ ရေကိုပုံမှန်ထက်လျှော့ထည့်ရန်လိုအပ်ပါသည်။
- လုပ်ငန်းခွင်အပေါ် အမိုးအကာအစီအမံများကို ကြိုတင်စီမံထားပါ။အမိုးအကာ လုပ်ထားရန်အခြေအနေမပေးလျှင် မိုးကာစအသင့်ဆောင်ထားပါ။
- Foundation/Footing စသည့် မြေမျက်နှာပြင်အောက်လောင်းရမည်ဆိုလျှင် ကွန်ကရစ်အောက်ခြေမျက်နှာပြင်ထက် နိမ့်အောင် ကျင်းတစ်ခု (sump pit) တူး၍ ရေစုပ်စက်ဆောင်ထားပါ။
- မျက်နှာပြင်အကျယ်ကြီးကိုလောင်းရမည်ဆိုလျှင် လုပ်ငန်းမပြီးမီမိုးရွာလာပါက ရပ်ထားရန်သင့်တော်မည့် နေရာ (construction joint) ကို ကြိုတင်စဥ်းစားပြီး လိုအပ်သည်များကို ပြင်ဆင်ထားပါ။
- ကြိုတင်အကာအကွယ်မရှိပါက ကွန်ကရစ်လောင်းပြီး မျက်နှာပြင် ၁၀ပေခန့် ရှိတိုင်း မိုးကာစဖြင့် ချက်ချင်းအကာအကွယ်လုပ်ပေးပါ။
