27/11/2024
Net Profit Margin မြင့်တက် စေဖို့…..
လုပ်ငန်းတစ်ခုရဲ့ Ability to generate money ဆိုတဲ့ ငွေ ရှာဖွေ နိုင်တဲ့ စွမ်းဆောင်ရည်ကို Net Profit Margin ဘယ်လောက် ကောင်းကောင်းရသလဲ ဆိုတာနဲ့ အကြမ်းအားဖြင့် တိုင်းတာ သတ်မှတ် ကြ ပါတယ်။ ဥပမာ တစ်လကို NP margin 10% ရှိတယ် စသဖြင့်ပါပဲ။ လုပ်ငန်းရဲ့ သဘောသဘာ၀ Product or service ရဲ့ သဘာ၀ ပေါ်မူတည်ပြီး NP Margin ဟာ မြင့်တာ နိမ့်တာ ရှိလေ့ရှိ တတ်ပါတယ်။
ကျွန်တော့်အတွေ့အကြုံအရကတော့. Retail လုပ်ငန်းတွေ နဲ့ Distribution လုပ်ငန်းတွေ ဟာ NP Margin 10% ဝန်းကျင် သို့မဟုတ် အောက်ကို သာ ရရှိကြလေ့ရှိပါတယ်။ service လုပ်ငန်းတွေ ကတော့ များသောအားဖြင့် NP Margin မြင့်လေ့ရှိပါတယ်။ ဥပမာ SPA တွေ Beauty Salon တွေ ကတော့ NP Margin 80% လောက်ထိ ရတာကို ကြုံတွေ့ရဖူးပါတယ်။ စားသောက်ဆိုင်တွေ Bar တွေကတော့ Overhead cost အနည်းအများပေါ်မူတည်ပြီး NP Margin ၃၀% ကနေ ၅၀% လောက်ထိ ကို ရတတ်ကြပြန်ပါတယ်။ ဖျော်ဖြေရေး လုပ်ငန်းတွေ ဖြစ်တဲ့ KTV တွေ ကတော့ NP Margin ၃၀% ကနေ ၅၀% အတွင်း ရတတ် လေ့ရှိပြန်ပါတယ်။ ထူးထူူးခြားခြား အနေနဲ့ overhead cost တွေ နဲ့ corporate cost တွေ ရှိပါလျက်က NP margin ကို ၆၅% ရနေပြီး လည်ပတ်နေတဲ့ ဆေးဝါး တင်သွင်းဖြန့်ဖြူးတဲ့ လုပ်ငန်းတစ်ခုကို လဲ ကြုံတွေ့ခဲ့ရဖူးပါတယ်။ နည်းပညာ အခြေပြု အောင်မြင် တဲ့ လုပ်ငန်းတွေကတော့ NP Margin ကို ၉၀% ကျော်ထိ ရတတ်ကြတာ လဲ ရှိနိုင်ပါတယ်။
ဆိုတော့ NP Margin အနည်းအများဟာ ကိုယ်လုပ်ကိုင်နေတဲ့ Industry ရဲ့ သဘော သဘာ၀ အပေါ်မူတည်ပြီး များတတ် နည်းတတ်ပြန်ပါတယ်။ အဓိက အားဖြင့်တော့ Profit and Loss Statement ထွက်လာတဲ့အခါ ရောင်းအား Revenue ပမာဏ ကို 100% အဖြစ်ထားလိုက်ပြီး NP Margin က ဘယ်လောက်ရှိတယ်ဆိုတာကို တွက်ချက်ကာ လုပ်ငန်း ရဲ့ Performance ကောင်း မကောင်း ကိုသုံးသပ်ကြလေ့ရှိတာပါပဲ။
ဘယ်အချက်တွေက NP Margin ကိုတက်စေသလဲ…
လုပ်ငန်းတွေ မှာ အဓိက အားဖြင့်ကတော့ Cost of Goods Sold (COGS) ဆိုတဲ့ စရိတ်နဲ့ လုပ်ငန်းလည်ပတ်စရိတ် Operating Expenses (OPEX) ဆိုပြီးနှစ်ခု ရှိပါတယ်။ ဒီနှစ်ခုကို လျော့ချ လိုက်နိုင်ရင် NP Margin တက်တာ ပါပဲလို့ အလွယ်ပြောနိုင်ပါတယ်။
NP margin တက်ဖို့ရာ ထပ်အသေးစိတ်ရရင်တော့ Profit and Loss Statement ရဲ့. Revenue Section အတွက် က….
(၁) ရောင်းအား စုစုပေါင်း Total Sales ရလာတဲ့အခါ မှာ Sales Return ဆိုတဲ့ customer ဆီကနေ အကြောင်းအမျိုးမျိုးနဲ့ လက်မခံပဲ လုပ်ငန်းကိုပြန်ဝင်လာတဲ့ ကုန်ပစ္စည်း အရေအတွက်ကို နည်းပါးအောင် လုပ် ဖို့လိုပါတယ်။
(၂) ဒါ့အပြင် အရည်အသွေး တူတူကိုမှ ဈေးသက်သာမယ့် ၊အများဈေးပိုသက်သာမယ့်၊ ပိုပြီး ညှိနှိုင်းလို့ရမယ့်၊ Dead Stock, Damage Stock တွေ ပြန်လဲလှယ်လို့ရမယ့်၊ အကြွေး ကြာကြာပေးမယ့် Supplier တွေကို ရှာဖွေ ချိတ်ဆက်ဖို့လိုပါတယ်။
(၃) Logistic ဆိုတဲ့ ကုန်ပစ္စည်းတွေကို Supplier တွေ ဆီကနေ ကိုယ့် ဂိုထောင် ကိုရောက်သည် အထိ သယ်ယူ စရိတ်တွေကို အသက်သာဆုံး ဖြစ်အောင် ဘယ်လို လုပ်မလဲ စဉ်းစားဖို့လိုပြန်ပါတယ်။
(၄) အရင်းကို ထပ်မထည့်ပဲ ကုန်မြန်မြန်ရောင်း ငွေမြန်မြန်ပေါ် မြန်မြန်ပြန်ဝယ်ပြီးထပ်ရောင်း ဆိုတဲ့ Stock turnover ကို များများလည်စေဖို့ လုပ်ဖို့လိုပါတယ်။
(၅) Slow Moving Items, Dead Stock Items တွေကို ဘယ်လို ဖြိုမလဲ Policy and action plan. တွေ ချမှတ်ဆောင်ရွက်ဖို့လိုပါတယ်။
(၆) Credit Policy သတ်မှတ်ပြီး ဘယ်သူတွေကို တော့အကြွေးရောင်းမယ်၊ ဘယ်လောက်ပမာဏပဲပေးမယ်။ အကြွေး ကေက်ခံလို့မရရင်ဘယ်လိုတွေ ဆောင်ရွက်မယ် ဆိုတာတွေ သတ်မှတ်ပြီး AR collection rate ကို မြင့်တက်စေကာ Bad Debt တွေကိုလဲ မရှိအောင် စီမံ ရပါမယ်။
(၇) Other income တွေအနေနဲ့ Supplier တွေက ဝယ်ယူမှုပမာဏ တစ်ခုပြည့်ရင် ပြန်ပေးတတ်တဲ့ Back Margin % တွေ Rebate တွေကို အမြင့်ဆုံး ရအောင် ဘယ်လို ယူမလဲ စီမံရပါမယ်။
ဒါတွေလုပ်နိုင်ရင်တော့ Gross Profit ဆိုတဲ့ GP Margin % မြင့်တက်လာမှာ ဖြစ်ပါတယ်။
နောက်ထပ် တစ်ဆင့်ကတော့ Operating Expenses အပိုင်းမှာ ဆောင်ရွက်ရန်ရှိတာတွေ ဖြစ်ပါတယ်။
(၁) Opex မှာ ပမာဏ အများဆုံးက Salary Expenses ဖြစ်ပါတယ်။ ဒီအတွက် ခန့်ထားတဲ့ လူတွေ၊ ထားထားတဲ့ ဖွဲ့စည်းပုံ၊ ပေးထားတဲ့ Salary Structure တွေဟာ မှန်ကန်သင့်တော်မှု ရှိသလား ပြန်ရတဲ့ ရောင်းအား Performance နဲ့ ထိုက်တန်သလားဆိုတာကို သုံးသပ်ရမှာ ဖြစ်ပါတယ်။
(၂) လုပ်ငန်းလည်ပတ်ရာမှာ အသုံးပြုရတဲ့ ကုန်ကြမ်းပစ္စည်းတွေ ကို အလေအလွင့် အနည်းပါးဆုံး အသုံးပြုနိုင်အောင် လုပ်ဖို့လိုအပ်ပါတယ်။
(၃) ဝယ်ယူထားတဲ့ Fixed assets တွေကို သက်တမ်း ရှည်ကြာ စွာ အသုံးချနိုင်အောင် ထိန်းသိမ်းစီမံ တာတွေ ဆောင်ရွက်ဖို့လိုအပ်ပါတယ်။
(၄) ဝန်ထမ်းတွေရဲ့ Performance တက်အောင် သင့်တော်တဲ့ Incentive system တွေ ၊ သင်တန်းပို့ချ သင်ကြားမှုတွေ၊ စိတ်အားတက်ကြွစေမယ့် အစီအစဉ် တွေ ချမှတ် ဆောင်ရွက်နိုင်ဖို့လိုအပ်ပါတယ်။
(၅) ဝန်ထမ်း ခဏခဏ နုတ်ထွက်မှုက လဲကုန်ကျစရိတ်တွေ များပြား တဲ့အတွက် Employee Turnoverကိုလည်း တစ်နှစ်ကို ၁၀% အောက်မှာသာ ရှိနေအောင် ထိန်းကျောင်းပေးနေဖို့လိုအပ်ပါတယ်။
(၆) ရုံးပိုင်းဆိုင်ရာ လိုအပ်တဲ့ စာရေးကိရိယာတွေ၊ အသုံးစရိတ်တွေ၊ ပြုပြင်ထိန်းသိမ်းဖို့တွေ၊ ရေဖိုးမီးဖိုး အင်တာနက်ဘေလို လစဉ်ကုန်ကျစရိတ်တွေ၊ အဆောက်အဦငှားရမ်းခ တွေ ကိုလဲ အလေအလွင့် မဖြစ်စေ အောင် စီမံထားရပါမယ်။
(၇) အသုံး ပြုနေတဲ့ Marketing Budget တွေဟာ သင့်တော်တဲ့ ရောင်းအား ပြန်ရနေ သလား၊ နည်းမှန်လမ်းမှန် ဖြစ်ရဲ့လား သင့်တော်ရဲ့လား ဆိုတာကို သုံးသပ် ပြင်ဆင်နေဖို့လိုပါတယ်။
(၈) လုပ်ငန်းတစ်ခုလုံး ရဲ့ အထွေထွေ အသုံးစရိတ်တွေ ကိုလဲ လစဉ်ဘယ်လောက် Growth ဖြစ်လာ တယ်ဆိုတာကို စောင့်ကြည့်တိုင်းတာ သုံးသပ်ပြီး ထိန်းချုပ်ဖို့လိုပါတယ်။
ဒါတွေကိုဆောင်ရွက် နိုင်ရင်တော့ Net Profit Margin % ပိုပြီး မြင့်တက်လာမှာ ဖြစ် ပြီး လုပ်ငန်းရဲ့ Performance ကလဲ တိုးတက်လာမှာ ဖြစ်ပါကြောင်း။
လုံလောက်တဲ့ အသိပညာဟာ ပြင်းထန်တဲ့ အခက်အခဲတွေ ကိုလွယ်ကူစွာကျော် ဖြတ်စေနိုင်ပါတယ်။
လုံလောက်တဲ့ အသိပညာ ရရှိဖို့...Kaung Hein Soe - Strategic မှာ သင်တန်းတက်စို့။
Kaung Hein Soe – Strategic
Business Consultant
