06/07/2026
Ярилцлага🖌️
Д.Мөнхтөр: Үнэ тарифыг бодит өртөгт ойртуулж байж шинэ хөрөнгө оруулалт орж ирнэ
----------------------------------------
📍Монголын эрчим хүчний салбарт шинэ өнгө төрх, шинэ стандартыг нэвтрүүлж, өсөн нэмэгдэж буй хэрэглээг хангахад бодитой хувь нэмэр оруулж буй томоохон бүтээн байгуулалтын нэг бол Бөөрөлжүүт цахилгаан станц юм.
📍Өнгөрсөн өвөл гарсан асуудал, түүний шийдэл, олон улсын зах зээлээс бонд татан төвлөрүүлсэн болоод салбарын өнөөгийн нөхцөл байдлын талаар “Цэцэнс Майнинг энд Энержи” ХХК-ийн Гүйцэтгэх захирал Д.Мөнхтөртэй “Энержи Инсайт”-ын Д.Намуунцэцэг ярилцлаа.
Онцлох эшлэлүүд:
🔹Бөөрөлжүүт бол Монгол Улсад анх удаа нүүрсний аман дээр баригдсан цахилгаан станц гэдгээрээ онцлогтой. Нүүрс нь масс ихтэй тул тээврийн зардал өндөр байдаг. Харин уурхайн аман дээр баригдсанаар нүүрсний өртөг харьцангуй хямд байх юм.
🔹Бондын хөрөнгө оруулагчдын гол сонирхож байсан зүйл нь станцын тогтвортой үйл ажиллагаа, засаглал. Тэд үйл ажиллагааныхаа стандартуудыг хэрхэн мөрдөгддөг, аюулгүй ажиллагаагаа ямар түвшинд хангасан, мөн цаашдын өсөлт, хөгжлийн боломжийг чухалчилж хардаг. Эдгээр хүчин зүйлсийг үнэлээд төслийн санхүүгийн тогтвортой байдал, бондын эргэн төлөлтийн чадварт эерэг дүгнэлт өгч, санхүүжилт амжилттай шийдэгдсэн.
🔹Ирэх өвөл дахин асуудал гаргахгүй байх чиглэлд анхаарч, бүх түвшинд шийдлээ гаргаад ажиллаж байна. Нүүрсээ илүү сайн ангилж, ялгаж, хатаах бэлтгэх ажлууд хийгдэж байгаа. Мөн уурхайн хүчин чадлыг нэмэгдүүлэх, бутлуур, шигшүүрийн системээ сайжруулах ажлууд ч үргэлжилж байна. Үүнээс гадна бункерийн буух хоолойн технологийг сайжруулж байгаа.
🔹Олон нийтийн зүгээс хурдхан станц бариад л дутагдаж байгаа хэрэгцээгээ нөхчих юм биш үү гэж ярьдаг. Гэтэл цахилгаан станц гэдэг нь өнөөдөр шийдвэр гаргаад жилийн дотор бариад дуусчихдаг амархан зүйл биш. Олон шат дамжлага, олон хүчин зүйлээс хамаардаг урт хугацааны ажил юм.
🔹Салбар өнөөдөр бодит өртөгтөө хүрээгүй, зохиомлоор тогтоосон тарифын тогтолцоогоор ажиллаж байна. Үүнийг бодит бус гэж хэлж буй шалтгаан нь станцуудын үнэ, тариф үйлдвэрлэлийн бүрэн өртгийг тусгадаггүйтэй холбоотой. Өртгөөс нь хэт доогуур үнээр, захиргааны аргаар барьсан тарифаар хэрэглэгчдэд нийлүүлж ирсэн.
🔹Өнөөгийн нөхцөлд эрчим хүчний эх үүсвэрийн дутагдалтай, хэрэглээ нийлүүлэлтээсээ давсан хэвээр байгаа учраас зах зээлийг огцом чөлөөлөх нь эрсдэлтэй. Эхний ээлжинд цахилгаан, дулааны үнэ тарифыг бодит өртөгт нь хүргэж, цаашлаад инфляц, валютын ханш, түлш шатахууны үнэ зэрэг хүчин зүйлтэй уялдсан индексжүүлсэн үнэ тарифын тогтолцоог бүрдүүлэх шаардлагатай. Ингэснээр салбарын санхүүгийн тогтвортой байдал хангагдаж, хөрөнгө оруулагчдын итгэл нэмэгдэнэ.