24/05/2022
Bakı kəndlərindən birindən gəlir bu adam. Qatıq- süd satır. Dediyinə görə 80 nə yaxın da yaşı var.
Bu gün yenə gəlmişdi. Aşağı qonşudan sərin su istədi. Sonra da utana-utana
- bacı, evdən çıxanda çay,su içmirəm ki, ayaqyolu tapmaram. Yaşlı adamam. Qonşu ona çay təklif elədi. Kişi etiraz eləmədi. Dedi dilim yanir susuzluqdan 😔
Eşidirəm danışır ki, nə yoldaşımı nə də gəlinimi tövləyə qoymuram. Bu yaşıma qədər hər şeyi özüm eləmişəm. Öz zəhmətindən, həyatını necə yaşadığından danışır. Və eşidirəm deyir ki, "Allah mənim ömrümdən kəsib yoldaşıma versin"😊 Bu söz məni yerimdən durğuzdu. Qapıya yaxınlaşdım.
- Niyə elə dediniz ki?
- Qızım mənim yoldaşım yaşlı atama anama elə gözəl baxıb ki, mən onun əziyyətini itirə bilmərəm. Onları necə gözəl çimizdirirdi, qulluqlarinda dururdu. Mənim boynumda yoldaşımın haqqı var.
- Allah sizin kimi kişilərdən bol eləsin, deyirəm.
Gülümsəyir😊
- Nə olub ki, qızım?
- Heç, yoldaşınıza verdiyiniz dəyər çox xoşuma gəldi. Yəqin cavanlıqda əziyyət vermisiniz ona?
- Yoooox, balalarımin canına and olsun ki, yox. Onu elə ilk günlərdən qiymətləndirmişəm. O da sağ olsun, mənə yaxşı yoldaş olub... Hara dönüb dolaşsam da eyni yerə gəlib çıxıram. Biz özümüzə uşaq yox, cəmiyyətə şəxsiyyət yetişdirməyi öyrənməyənə qədər qırılan, dağılan, yarımçıq qalan ailələr hər gün daha da artacaq.
Vəfa Sərdar Səfərova
(C)
