10/04/2026
İnşaatçılar günündə inşaatçılarımızın peşəkarlıq və böyük əməklə ərsəyə gətirdiyi son layihəmizin video hekayəsini təqdim edirik.
İnşaat yalnız evlərin, binaların ucaldılması deyil – bu, gələcəyin qurulması, insanların rahat və təhlükəsiz həyatının təmin olunması deməkdir. İnşaat bəzən tarixin yenidən yazılmasıdır, bir kəndin, bir şəhərin yenidən dirçəlməsidir.
10 Aprel İnşaatçılar günü münasibəti ilə bütün inşaatçıları təbrik edir və onların əməyi sayəsində yenidən qurulan Məmmədbəyli kəndinin dirçəliş hekayəsini təqdim edirik.
“Böyük Qayıdış” proqramı çərçivəsində Zəngilan rayonunun Məmmədbəyli kəndində “Cəbrayıl, Qubadlı və Zəngilan rayonlarında Bərpa, Tikinti və İdarəetmə Xidməti” publik hüquqi şəxsin sifarişi ilə həyata keçirilən yenidənqurma və bərpa layihəsi “AS Group”a daxil olan “AS İnşaat” MMC tərəfindən icra edilib.
Layihənin məqsədi kəndin tam müasir yaşayış məkanına çevrilməsini, infrastrukturunun qurulmasını və sakinlərin dayanıqlı yaşayış şəraitinin təmin edilməsini əhatə edir.
Bu genişmiqyaslı layihənin icra prosesini ictimaiyyətə təqdim etmək məqsədilə işlərin başlanğıc mərhələsindən yekun tamamlanmasına qədər olan bütün mərhələləri əks etdirən videoçarx hazırlanıb.
Videoçarxda ərazinin ilkin hazırlanması, planlaşdırma, tikinti mərhələləri, mühəndis-kommunikasiya xətlərinin çəkilişi və son abadlıq işləri ardıcıl olaraq nümayiş etdirilib.
“Böyük Qayıdış” proqramı çərçivəsində görülən işlərin real nəticələrindən biri olan Məmmədbəyli kəndinin dirçəliş hekayəsi ölkə mediasının da diqqətini cəlb edib və bir çox media qurumları tərəfindən geniş auditoriyaya təqdim olunub.
