12/03/2026
سلسلة الأكلات الجيجلية
الوصفة عشرون: الكعك دمسكرين
وصفتنا اليوم الكعك على الطريقة الجيجلية، مسكرين ومزيين بألوان الفرميسال، هي صح كجزائريين نتشاركو في الوصفة، وتبقى كل منطقة وطريقتها في تحضيرها، وكي نشمو ريحة الكعك في الدار نعرفو باللي العيد او لاحق.
المكونات:
• 4 كيلات فرينة، كيلة ناقصة صبع بين سمن ذايب وبارد وزيت، كيلة :نصف منها ماء أطلس ندفيوه، وباقي الكيلة ماء زهر، 2 ملاعق كبار سكر، نصف ملعقة صغيرة خميرة الحلويات، رشة ملح.
التمر: تمر، ملعقة صغيرة قرفة، زيت، ماء.
الطلية: بياض بيضة، سكر بودرة، نصف ملعقة صغيرة ملون أبيض، عصرة قارص، ملعقة كبيرة زيت.
التحضير:
العجين
في قصعة نحطو الفرينة، الخميرة، السكر والملح، ونضيفولها السمن والزيت، نبسوها مليح مليح، وإذا تحجرلكم عديوها في الغربال، نضيفو الماء وماء الزهر ونلموها عجينة بين طرية ومتماسكة، ونخليوها تريح.
التمر: نخلطو كل المكونات ونعجنوها مليح.
ونشكلو كريات عجين 35غ، والتمر 15غ.
نشكلو الكعك ونخليوهم شوية، نتقبوهم ونخليوهم يطيبو على 180 درجة حوالي 20 دقيقة.
نتركوهم يبردو تمامًا قبل ما نسكروهم.
التسكيرة: (لازم هذه التسكيرة لانو الفوندو ما يجيش مليح في هذه الوصفة).
نضربو البيض شوية برك بالفرشيطة، نضيفو السكر والملون، ونبقاو نضيفو في السكر حتى نتحصلو على قوام مليح،
نغطسو الكعك، نزينوهم بالفريمسال،
ونخليهم ينشفو تمامًا على الأقل ليلية كاملة.
بالصحة والهناء، صح فطوركم 🌙
.
#كعك
