Ramo Green, Benha (2026)

26/10/2023

مع اقتراب موسم التصدير لاكبر منتج مصري وهو #البرتقال 🍊🍊🍊
النصيحة الاولي والاخيرة وبخص المصدرين الجدد الي بتجري ورا الدولار وهي مش عندها الوعي الكامل للمخاطرة دي ...
اوعي تبيع بضاعة بالعمولة برا وتبعت بضاعة من غير فلوس مفيش دولة بتعمل كدا غير مصر وبتخلي المنتج المصري يتباع ببلاش ومتلومش الا نفسك لما تخسر ..

04/09/2023

إللى بيساعد غيره ده شبعان وواثق من نفسه محدش بياخد رزق حد 👌

25/08/2023

من كلمات الحاج محمود العربي رحمه الله
الجامعات بتعلم الناس علوم مادية بحته .. محدش هيعلم ولادك فى كليات التجارة ان معاملة ربنا فى جودة المنتج احسن طريقة للتسويق .. وان الحمد والشكر بيزود المبيعات .. وان الصدقة بتضاعف الارباح .. وان الرزق ربنا بيبعته بحسب اعداد الناس اللى شغاله والناس المستفيدة من نشاط المنشأة .. وان الاستغفار اكبر حائط صد فى مواجهة الكساد .. وان الربـ ـا بتزود راس المال فى القيمة الدفترية الاسمية بس بتحـ ـرقه فى القيمة السوقية الفعليه .. علم الكلام ده لولادك بنفسك لو نفسك ربنا يكرمك فيهم وتشوفهم فى يوم ناجحين ..

03/08/2023

السلام عليكم
اولا بتأسف اني مبقتش انزل حاجة في الفترة الي فاتت ودا بسبب ظروف وانشغال فا نرجع نكمل بإذن الله

اتكلمنا عن التسويق وشوية نصايح في التصدير وكذالك هكمل النهاردة حاجات متنوعة برضو... اكتر كلامي هيكون عن الحاصلات الزراعية لان دا مجالي والتخصص حلو لكن المعلومات العامة عن التصدير الي بقدر افيد الناس فيه بقوله وتحت امركم

1/ قبل ما تبدأ شغل اتأكد من كل اوراقك ومن شركات ومن التجديدات الي حصلت في جميع الاوراق وتكون مطلع كل حاجة زي توقيع الكتروني ومسجل نافذة ومسجل متعاملين وكل شئ لان الغلطة هنا هتزعلك وهتوقفلك الحاوية في الميناء لحين استيفاء الاوراق وهتدفع ارضيات وخلي بالك لو المركب فاتتك وهترول مركب يبقا هتتعور في مبلغ حلو فا خلي بالك دايما من اوراقك
2/ بعد كدا الشغل الصادر هيبقا لازم تعمل اصدار للفاتورة الالكترونية قبل فتح الشهادة في الميناء هو حاليا متطبقش لسة... انا شغال عادي بعد اصدار الشهادة في الميناء بس بقول الكلام دا ان لازم يبقا عندك حد فاهم التعامل مع الفاتورة الالكترونية او تتعامل مع مكتب محاسب قانوني زي ما انا عامل هيبقا افضل ليك لانك كدا كدا هتحتاج المحاسب في كل حاجة بعد كدا
3/ لو انت شخص جديد في التصدير نصيحة مني اتعرف علي مُصدر فاهم وشغال في ارض الواقع حتي لو هتاخد منه شغل جهز وتحط عمولتك حاجة بسيطة وتصدر لعميلك برا علي اسم شركتك لو عملت كدا لمدة سنة واحدة وكان مكسبك مش كبير بس اتعلمت وفهمت كل حاجة واتعرفت علي الموردين والمصانع صدقني السنة الي بعدها هتقدر تكبر مكسبك انك تعمل الشغل بإيدك او علي الاقل هتوفر حاجات كتير تكبر ببها المكسب بتاعك وبرضو هتاخد دعم في اخر السنة من صندوق دعم الصادرات
4/اوعي ابدا تدخل غشيم في الشغل وتقول هعمل كل حاجة بإيدي من اول مرة ما انا معايا فلوس وهجيب مهندسين جودة وهجيب ناس تقف ياما ناس اكبر منك واعفي منك عملوا كدا وخسروا ملايييييين فا استهدي بالله واوعي تحط فلوسك كلها في شغل واحد اعمل بالمثل الي بيقول ( متحطش البيض كله في سلة واحدة)
5/ اهم شئ تتقي الله في شغلك وتكون معرف العميل بكل حاجة حتي لو غلط تبقا معرفه بكل التفاصيل.. مثلا شغل وليكن 25 طن انت مش قادر توفي الكمية دي بالمواصفات المطلوبة او في شئ هيوقف مثلا علي 2 طن او حاجة بس مش نفس المواصفة.. اوعي تقول هو كدا كدا مش فاهم حاجة ولا شايف هحطها في الحاوية وخلاص وانا كدا كدا قبضت فلوسي...صدقني هتدفع وهتخسر قد الي كسبته اضعاف لان دا غش وتاني حاجة هتخسر عميلك الي هو راس مالك...انا لما الامور بتقصر معايا او بيبقا في خطأ تقدير في الشغل وفي شغل هيكون اقل من المواصفة بعرف العميل وبنوصل لاتفاق بس اهم حاجة يكون عارف واهم حاجة عشان في ميعاد شحن متحدد وعشان الوقت والظروف ميسمحش بإنك تأجل او الفلوس مقصرة معاك
6/هتلاقي ناس في مجال تصدير الحاصلات الزراعية بتطلع ب 5 برادات او حاويات في اليوم الواحد اوعي تقول اما اعمل زيهم دول ناس راس مالهم كبير ربنا يبارك لهم و عندهم حد برا هناك كبير بيستقبل لهم وشريك معاهم ودا اسمه شغل بالعمولة صدقني هتكب فيه مرة وتخسر 10 وهيتخرب بيتك فا بلاش لعب بالنار وتقولوا مجال وحش وانتوا الي بدأتوه غلط من الاول
7/ لو هتتعامل مع شركات شحن او مخلصين في سفاجا اتعامل مع ناس محترمة لانك ممكن تقابل ناس مش كويسة وهتعطل شغلك لحساب ناس كبيرة وبتكلم هنا عن سفاجا لان مشاكلهم كتير لان دي عبارات وفي مخلصين بدون ذكر اسماء سمعتهم حلوة لحد ما تتعامل معاهم تلاقيهم زي الزفت انما شركات الشحن الحلو فيهم هو الي يتابع معاك دايما والي تلاقيه دايما لو في مشكلة يقدر يحلها ليك وميعطلش شغلك دا ميمنعش ان في ناس محترمة كتير لو عاوزني ارشحلك حد كلمني
8/ لو عاوز دعم الصادرات في شروط برضو لازم تكون عارفها ان يبقا معاك شهادة من شهادات الجودة زي الايزو ودي عادي ناس كتير بتطلعها وتاني حاجة ان الفلوس تدخل حسابك البنكي فا لازم تخلي بالك من النقطتين دول
9/شغل افريقيا الي اتكلمت عنه وناس كتير دخلت تسألني عنه...الموضوع مش سهل ولا هيجي في يوم وليلة يا باشا لازم تشتغل صح زي ما اتكلمت في البوست الي فات علي الصفحة وفي دول كتير في افريقيا بدون فيزا يعني تحجز طيارتك وتروح هناك بس تبقا رايح ومعاك عناوين او معارض هناك وتروح وتشوف بنفسك وافريقيا هتلاقي كتير عرب وبيتكلموا عربي واكتر ناس هتلاقيهم منتشرين الصوماليين ناس والله تمام بس تتأكد من امانته انا شغال معاهم في افريقيا ومشوفتش منهم غلطة حتي الان..
10/في ناس لقيتها لما كانت بتيجي تاخد مننا شغل كانوا بيجوا معاهم 2 او 3 مهندسين عشان يستلموا الشغل المهم ان المهندسين دول كانوا لا يفقهوا عن الشغل حاجة وجايين انهم اسماء مهندسين جودة فقط...مش اي مهندس يستلم شغل يا باشا لازم يبقا دا تخصصك وتبقا فاهم المنتج الي قدامك..مكنتش بقول حاجة بل والله كنا نقعد معاهم ونفهمهم المنتج وعيوبه وازاي تستلم وتخلي بالك من ايه وكدا ومكنتش بقف في وشهم ولا رزقهم بس انك تاخد فلوس كتير بدون وجه حق غلط لازم تبقا فاهم شغلك ومتقنه لانك لو رحت تستلم منتج من شخص غير امين وميعرفش ربنا هيلبسك في حيطة لانه هيحط اي حاجة ما انت كدا كدا مش فاهم وساعة ما الشغل يوصل بايظ ومديرك يشتكي للي واخد منه الشغل هيقول انا شغلي تمام وكنت ماشي علي الي بيقوله ليا المهندس الي انت جايبه وانا مليش فيه وساعته هتكون انت الخسران لان انت كدا بانت حقيقتك يا اما مش فاهم او اتضحك عليك وفي كلتا الحالتين ممكن تخسر مصدر رزقك...فا انزل شغل عملي في محطات تصدير او تعالي لينا او انزل بس اتفرج وافهم من الناس حتي لو هتصرف مواصلات واكل من جيبك لمدة شهر او 2 بس والله احسن من 100 كورس ساعتها هتثبت وجودك مع اي شركة تروحها وبالتوفيق للكل...............................
في الوقت الحالي والقادم الدولة بتدعم وهتدعم التصدير بل وكمان في اتفاقيات دولية لتنمية الزراعة في مصر بينا وبين روسيا فا الشغل في المجال دا هيبقا كبير بإذن الله ونتمني التوفيق من الله للجميع ....................................................
بإذن الله البوست الجاي هيكون عن حاجات مهمة جدا للناس الي بتاخد شغل من موردين و سماسرة او مكاتب الي بيطلق عليهم اشباه مصدرين
1/المورد او السمسار الي بيوشش الزرع بتاعه او بيلعب في اوزان او بيخلط شغل علي بعضه او يوريك شغل في ارض ويجبلك من حتة تانية وبيغش لازم احذركم منه وازاي تاخد بالك منه وليه لازم يكون معاك حد فاهم او تتأكد من كل حاجة ازاي وازاي تستلم الشغل
2/ مكاتب التصدير دي تلاقيهم في اي حاجة موجودين اي حد طالب ولو حتة اثار يقولك موجود اتواصل معايا... طب ياعم انت تخصصك ايه طب فريش ولا فروزن ولا اورجانيك ولا ايه بالضبط...المشكلة انه او متخصص في حاجة هنقول ماشي ايده في الشغل دايما وعارف ناس زيه كويسة وكدا انما لا هو مجرد بيبقا وسيط ودا اكبر غلط.. انا جالي وسيط قبل كدا الي هو مكتب تصدير قالي عاوز مواصفة شغل غير الي العميل طالبها منها تماما عشان بس يكسب من وراه فلوس كتير ودا غش طبعا وكانت مشكلة كبير وقتها اكتشفناها لما العميل اتخانق مع الوسيط.. المشكلة ان العميل مصري والوسيط مصري يعني السعر بيمر ب 3 مراحل تغير ورفع للسعر لحد ما يوصل للعميل الخارجي الي برا مصر وكمان مواصفة غير المطلوبة ودا غلط بيضر الشغل
بإذن الله نتكلم عن حاجات كتير الفترة الجايا

06/07/2023

اخواتنا الموردين او المزارعين مقدرش انساهم طبعا ولذالك شوية معلومات برضو لازم تتقال بس قبلها تعالوا ادخلوا معايا في نقاش كدا ومنه برضو هجاوبك علي الي انت عاوزه
_المصدر بيكسب؟
ايوة بيكسب
_بيكسب كام؟
والله بيكسب الي يكفيه هو حد قالك انت بتكسب كام؟
_محدش سألني بس دا بيبخث زراعتي وبيبهدلني وهو بياخد بالدولار وبيكسب 5 اضعاف الزرع وبياخد دعم ودا كله في اسبوع وانا بيطلع عيني طول السنة ومبيطلعش ليا 10٪ من الي بيكسبه وكمان بيشتغل بعربون العميل مش من جيبه
ايه دا بجد؟؟ امال ازي نصهم بيتحبس والي بيهرب بسبب الديون والي بيتخرب بيته والي بيقفل شركته دا تسميه ايه!!
_ ياعم دا قليل بس الي بيحصل معاه كدا انما كلهم حرامية
ياعم مش عشان في نصاب تقول علي الكل نصابين حرام كدا!!
بقولك ايه بما ان الموضوع سهل مش انت مش عندك الزرع بتاعك؟ يلا روح اعمل شركة و هات العميل وروح هات موظفين للشركة وروح هات مستلزماتك للانتاج واتعامل مع حجر زراعي وصادرات وشركة شحن واساليب دفع تخليك تنفجر يلا بما ان الموضوع سهل معملتش ليه كدا؟
اقولك ليه بقا عشان انت عارف انك هنا تقدر تجيب فلوسك انما برا مصر متقدرش...اغلب المصدرين بيتحطوا حرفيا في مخاطر لا تتخيلها انت ممكن شحنة واحدة لو اتاكل عليك فلوسها تضيع في طريقا مكسب 10 شحنات وتاخد جزء من رأس المال لو مخدتش حذرك..تاني حاجة اي مصدر بيبدأ اي موسم لازم يكون معاه راس مال للمستلزمات والتشغيل والزرع ويظبط ورقه وترتيبات كتير الموضوع مش سلق بيض هو...
انت عارف يعني ايه حاوية تفوت مركب؟ ولا يعني ايه حاوية تترفض برا ولا يعني ايه تاخد رفض في الميناء او رفض هنا في مصر صادرات او حجر دا بيبقا خراب بيوت
طب نيجي نتكلم في نقطة تانية مثلا علي محصول البرتقال؟ تعالي
هو لما كان ب 4 ج وقعدتوا تشتموا في المصدرين وانهم حرامية تحسبنوا عليهم..فاكرين؟ ولما بقا ب 20 و 25 الشهر الي فات حد قال عليكم حرامية؟ ابدا والله لان دا رزق النفوس الطيبة عمرها ما تبص في رزق حد الي باع ب 4 ج دا رزقه والي باع ب 20 دا رزقه
اتعود دايما انك تشتغل علي نفسك انك تكون احسن من السنة الي فاتت ومتبصش لرزق حد..بس اهم حاجة تدي الناس الي مش تبخث سعر زراعتك وتوكل علي الله...
وخلي بالك التصدير بيكسب جدا بس للي يشتغل صح مش لاي حد عاوز تدخل المحال افهم الاول واتفرج لكن هتدخل وتفتح صدرك هتاخد قلم هيخليك طول عمرك مش قادر تقوم...لو كل واحد فاهم في شغله واتقنه صدقني هننجح كلنا
مش هنكر ان في ناس مبوظة الشغل الي شغالين بالعمولة والي معندهمش ضمير والنصابين والسماسرة الي بتغش وناس كتير الا من رحم ربي... خليكو ايد واحدة ورزقك اسعي وسيب الباقي علي ربنا..
»»»» ادخل علي الصفحة هتلاقي شوية نصايح كويسة جدا وتابعني هتلاقي جديد كل يوم بإذن الله «««

06/07/2023

السلام عليكم..❤
انا مبسوط جدا بسبب الناس الي كلمتني وقدرت ان اوضح ليهم امور كتير كانت مش واضحة ليهم ومفيش حد هيقولها ليهم الا قليل...ودا شجعني اني اكتب تاني والنهاردة هتكلم عن اكتر نقطة اترددت كتير منهم وهي #التسويق او
انا هقولك بداية الطريق وبالتوفيق للجميع....
1/ اول حاجة لازم تكون علي دراية تامة ان مفيش حاجة اسمها تسويق علي الفيسبوك الا لو انت بتستهدف الوسطاء الي بينك وبين العميل مش العميل مباشرة فا لازم تغير الفكرة دي لانها متعبة وغير مجدية الا قليل جدا
2/لو انت الي هتمسك التسويق يبقا تمام ولو انت مش فاضي او معندكش القدرة وظف حد ثقة او حد قريبك او بنت او ولد من الاقارب وانا بإذن الله ل الي هيحتاجوه هكتبه هنا
3/ جهز كل حاجة تخص التسويق من رقم خاص بالشركة وايميل بدومين خاص للشركة ولوجو و E_catalog وظبط شهاداتك من ايزو وجلوبال جاب وكل الشهادات الي تخص مجالك وعينات من منتجاتك
4/الشركات الكبيرة والعملاء الجادين والناس الي فاهمة متواجدة علي المواقع العالمية ( website) الموثوقة المدفوعة او المعارض الكبيرة الي بيتم اقامتها علي مستوي العالم ومنها في مصر في ارض المعارض معظمها او مناطق اخري في مصر (هفسر كل نقطة من دول)
5/ #المواقع العالمية لازم تعرف انك ادام بعدت عن الفيسبوك انك هتدفع هتدفع مهو معلش المواقع الي بجد وعليها فرص تصديرية وعليها عملاء حرفيا متقدرش تعدهم مش هيديك الخدمة دي ببلاش ومنها مثلا ( trade atlas.. forie ..b2b.. volza .. Alibaba) لما حد يكون ماسك ليك التصدير ويتعامل مع دول صدقني هيفرق معاك جدا... ومتخفش في رزق كتير عليهم ليك ولغيرك بس انت تقدر تكفي احتياجتهم بس لانهم بياخدوا من اكتر من دولة وربنا يوفق الجميع
6/ #المعارض دي بقا تبقا لعبتك انت لو المعرض هنا في مصر اوعي تفوته ابدا هتلاقي شركات كتير جدا وعملاء من برا مصر كتير ولو انت عندك القدرة للسفر تابع اخبار المعارض الدولية لمجالك وهتلاقي حرفيا كل اسبوعين معرض في بلد شكل ودا نتائجه عالية جدا وبتقابل عملاء وش لوش
7/مفيش عميل بيجي من اسبوع او شهر لازم تتعب وتصبر وتدي شغلك اكتر وتظبط امورك وتتوكل علي الله وصدقني هتلاقي الرزق بتاعك
ارجو ان كدا اكون اديتك ولو حتي 50٪ من الرؤية للطريق وارجو ان اكون اعطيت افادة لحد لان الصفحة دي معمولة لكدا فعلا
انا الشركة بتاعتنا شغالة من سنين بس مفكرناش نعمل ليها صفحة علي الفيسبوك لان احنا عارفين ان العملاء بتوعنا مش هنا بس قررنا نعملها للافادة وتنوير الناس الي لسة هتبدأ او في المجال ومحتاجة توجيه وهكمل وبإذن الله الي جاي احسن وهتكلم عن:

1 الشحن وانواعه وازاي تتفادي اي اخطاء فيه والمشاكل الي بتحصل بعد الشحن من جهة العميل والي هيحتاج حد كويس للشحن هرشحه ليه بإذن الله
2 طرق الدفع والتعامل مع الاعتماد المستندي وافضل البنوك وازاي تأمن نفسك من اي عميل تتعامل معاه
3 اكتر كلامي هيكون برضو عن الحاصلات الزراعية بجميع انواعها بس هيكون برضو عن التصدير عامة
4 لو محتاج حد فاهم في الحاصلات الزراعية وعاوز تطمن علي شغلك ويبقا مندوب لك في المحطات او المصنع هرشحلك ناس معانا او بنتعامل معاهم حرفيا هيطلعوا ليك الشغل زي نا انتوعاوز مش مجرد مهندسبن جودة علي الورق او شهادات وبس لا ناس خبرة بجد
5 الشحن لافريقيا واتفاقية الكوميسا وايه فوائده وعائداته قد ايه وليه افريقا احسن من غيرها
6 الدول الي تحذر في التعامل معاها والدول الي ليها متطلبات خاصة او تدقيقات غريبة في الشحنات او الاوراق او الاستيكر الخاص بالمنتج دا كله هتكلم عنه
7 الاسواق الجديدة وازاي تقدر تدخلها لان في اتجاه من وزارة الزراعة لفتح اسواق جديدة
8 دعم الصادرات ودعم الشحن وازاي تحصل عليه
بإذن الله مش اخر بوست والي جاي هيكون احسن ومعلومات اكتر.

05/07/2023

السلام عليكم..
ارجو من كل شخص هنا اي كنت (مصدر او مزارع او سمسار او شخص حابب يبدأ تصدير) يقرا البوست واكيد هيكون في نفع ليك دلوقتي وفي اي بوست جاي بإذن الله
واول حاجة حابب اتكلم فيها علي الصفحة هي النصائح

اول حاجة #المصدرين
1/ اوعي ثم اوعي ابدا تشتغل بالعمولة مع اي حد واي كان مين هو لان فيها خراب للبيوت
2/لو انت برا مصر ومحتاج شغل من مصر لازم يبقا ليك مندوب هنا يتابع الشغل ليك دايما من الاول للاخر حتي لو في ثقة دا هيريحك ويريح الي بيعملك الشغل صدقني حتي لو هيكلفك بس للاطمئنان علي شغلك
3/ لو انت هتشتغل مع عميل جديد ورافض يدفع عربون خد منه عربون ولو حتي 1000 دولار للجدية مش لازم 50٪ ولو رفض لان ملهوش مندوب في مصر اشتغل معاه lc ولو رفض بلاش تشتغل احسن صدقني في عواقب للموضوع دا هوضحها ليك
4/الاوراق بتاعتك تبقا مظبوطة 100٪ واوعي تغفل اي حاجة في اوراق سلامة الغذاء او الحجر او شهادات الميناء او البوليصة او اي شئ لان الغلطة هتكلفك كتير صدقني
5/لو انت شحنت لعميل من غير ما يدفع عربون ورافض يدفع في كذا حل بس هيكلفك بس اهم حاجة تكون مظبط مع المخلص بتاعك لو في سفاجا او شركة الشحن لو في اي ميناء في مصر
بس منصحش حد يخرج شغل وهو مبقي عليه حاجة الا لو انت شاحن علي شركتك وانت في ايدك جميع الاوراق ومعاك عربون برضو
6/لو انت معندكش خبرة وبتاخد من موردين وتطلع علي شركتك خلي عينك وسط راسك لان هتدفع للمورد كاش وانت الي هتتحمل جميع المخاطر
7/ اوعي تعمل تيلكس ريليز وانت ليك فلوس برا مصر واوعي تبعت اوراق الشحنات الا وانت مخلص فلوسك كلها ولو انت شغال مع دول عربية اي برادات وبتشحن بري اوي تخلي البراد يركب العبارة او يعدي الجمارك الا وانت مخلص فلوسه لانه مش زي الشحن البحري
8/اشتغل مع شركة شحن كويسة وفاهمة وسريعة وناس تتابع معاك اول ب اول هتريحك جامد وهتظبط الدنيا معاك
9/اخرج برا الصندوق وافتح اسواق جديدة في مواقع عالمية ومعارض في مصر تقدر تتواصل مع عملاء جديدة لو عندك القدرة علي السفر سافر وهات عملاء
10/افريقيا ثم افريقيا ثم افريقيا ودي عاوز بوست مخصص ليها لان دي لوحدها كنز لاي حد مصدر من مصر لافريقيا واكيد في ناس عارفة اقصد ايه
11/ اعرف متطلبات كل دولة وشروطها وحافظ علي عميلك واخيرا اكسب قليل تشتغل كتير مش لازم تدبح او تنتش وتجري ياريت نغير المنظومة دي ونغير نظرة العالم للمصدر المصري

في حاجات كتير جدا ومعلومات كتير جدا هنتكلم فيها كل يوم بإذن الله ودا كان البداية فقط وهنتكلم عن المصدرين والشحن وكل دولة ومتطلباتها والاسواق الجديدة وبرضو المزارعين ونصايح ليهم هتفيديهم في التوريد للمصدر او لو هو حابب يصدر
بس اخيرا لاخواتنا المزارعين او الوسطاء التصدير مش لعبة صدقني ولا سهل وصدقني كل الكلام الي شوفته علي الجروب هنا او برا غير ارض الواقع وهكلمكم عليه في الايام الي جاية بإذن الله

وتحت امركم في اي استفسار

19/06/2023

بسم الله الرحمن الرحيم ❤

Ramo Green

26/10/2023

04/09/2023

25/08/2023

03/08/2023

06/07/2023

06/07/2023

05/07/2023

19/06/2023

Address

Telephone

Website

Alerts

Contact The Business

Shortcuts

Share

Category