05/09/2020
خمس اخطاء اوعى تقع فيها و انت بتشطب شقه كمهندس او شقتك كمالك وبالاخص المالك مش مهندس ..
1- اول غلطه :
انك تتفق مع الصنايعي على سعر المصنعيه و تفاصله من غير ما تتفق معاه على طريقة الاستلام و طريقة الشغل و الوقت !!
ممكن نقول ان الغلطه دي هيا السبب في معظم المشاكل زي مثلا :
- لأ متفقناش على كدا يا باشمهندس دي كدا فيها كلام تاني .. 😈
- مش هتبان بعد ما نخلص يا باشا ..
- اصل العيب من السقف .. اصل المشكله في محارة الحيطان .. لا متفقناش انك هتستلم بالكشاف دي ليها حساب تاني ..
كل نقطه من دول هتكون موضوع بوست كامل بالتفصيل هنشرح ازاي تتجنب المشاكل دي من البدايه مع امثله كتير ..
2- تاني غلطه :
تكتشف بعد ما ركبت البورسلين ان في عيوب و مش عارف من تركيب الصنايعي ولا من البورسلين نفسه ! ..
المفروض قبل ما الصنايعي يبدأ في تركيب السيراميك او البورسلين يفرز كل الكميه الموجوده لأن في احتمال كبير يكون موجود عيوب فيه .. لون اغمق او افتح او تقويس او كسر او فرق في المقاس 3 او 2 ملم ..
فبنعمل الخطوه دي عشان نقطع الشك باليقين D:
و منسيبش مجال بعد كدا للمشاكل و الصنايعي ميتحججش بحاجه و البلاطات الي فيها مشاكل ترجع للشركه المنتجه .
بس كدا ولا بتعمل حاجه تاني ؟؟
بص يا سيدي
في البورسلين بالذات بيبدأ الصنايعي يركب بعد الفرز و بعد ما يخلص 6 او 7 متر هيبدأ يظهر معاك شغله و لو حصل ان في حاجه مش مظبوطه و الصنايعي بيقنعك ان في عيب في البلاطه تاني في الحاله دي تتصل بالشركه و هيجولك و هيبان العيب فين لو منهم هتاخد تعويض او يبدلوه حسب نظام الشركه و بتسأل و انت بتشتري ..
3- تالت غلطه :
توافق السباك لو قالك بتاع السيراميك هوا الي بياخد الشيرب بتاعه و يشتغل هوا بالبركه كدا ! .
4- رابع غلطه :
النقاش يخلص شغله كله و يمشي قبل ما تشطب الكهرباء و تركب الاباليج و الاسبوتات ( لو عندك بيت نور) ..
طبعا اكتر حاجه بتفضح و تبين عيوب و مشاكل النقاشه اي اضاءه على الحيطه فلو مستلمتش من النقاش على اللمبه على الاقل تركب الاسبوتات و هوا موجود عشان هتلاقي مهرجان اول ما تركب الاسبوتات !!.. و كمان عشان لو في مشكله في وشوش الكهرباء يعالج حواليها ..
طبعا مهم جدا و انت بتتفق مع النقاش في الاول تنبه على النقطه دي وطريقة الاستلام .
5- خامس غلطه : استخدام جبس في مونة لصق السيراميك ..
الصنايعي بيكون احسن ليه ان المونه تشد بسرعه لو هوا معدوم الضمير هيعمل كدا و بعد فتره اتفرج على السيراميك خصوصا لو في حوائط الحمام هيفك و يتكسر لوحده او من اي دقة مسمار ..
بردو تخلي بالك ان السباك ميستخدمش جبس في المونه الي بيقفل بيها على شغله في التأسيس .
