كاستينج تمثيل

27/03/2025

كلام مهم جداً وياريت تركز فيه سواء كنت ممثل او مخرج مسرحى جديد او بقالك فترة مش كبيرة .. معلش هطول عليكم بس الكلام مهم جداً 🖤

انا بقالى حوالى 8 شهور بعيد عن المسرح من ساعة اخر عرض عملته ولما خلص الحظر واتفتح المسرح تانى ورجعت الاستوديوهات لقيت حاجات رهيبة فعلاُ من ( استغلال - نصب - لعب بالاحلام ...الخ ) ، من فترة قريبة عرفت ان فيه حد كان عامل اوديشن ف اكتر من استوديو وبيلم من كل ممثل مبلغ ما وبيمضيهم عقد عشان يبقوا بعد كدة مجاميع فى مسلسلات ده غير الكلام الى كله احلام طبعاً ولعب بمشاعر الى نفسهم يمثلوا ، الله اعلم نيته ايه وهل فعلاً هيشغلهم ولا لا بس هى الفكره ان المجاميع بقيت ب كاسينج ده من امتى ده ، مكنوش 8 شهور دول يا جماعة ( طبعا انا بهزر ) ياريت تركزوا اوى فى الى جاى وتمنشنوا للناس الى لسه هتبدء فى المسرح او بقالها فترة مش كبيرة ياريت تركزوا معايا فى النقط دى :-

1-المسرح الحر مش بيوصلك للسينما على قد ما هو بيعلمك يعنى ايه تمثيل ، المسرح الحر ما هو الا ادمان اولاً وثانياً بتتعلم منه يعنى تمثيل وتكسر رهبه الي قدامك وبتتعلم منه حاجات كتير زى التعامل مع اى حد و انك تتكلم وتعمل معظم الحاجات بدون خجل و..الخ طبعاُ ( مش بحبطك انا بفهمك ) 😀

2-متشتغلش فى حاجة انتاج ذاتى يعنى متدفعش للمسرح والديكور والكلام ده كله .. كبيرك اوي تدفع للبروفة ومتزيدش عن 10 جنيه فى البروفه مهما كان عدد ساعتها ماعدا الجنرال طبعاً 😂

3-متسمحش لاى مخرج مهماً كان انه يهين كرامتك ، اه سيبه يزعق ويتعصب عليك عشان يعلمك الصح لاكن لما تيجى عند كرامتك امشى فوراً حتى لو العرض تانى يوم

4-الفرقة الى هتكون فيها انتوا عيلة مع بعض وبمعنى اصح اخوات ياريت مترتبطش بحد منهم خالص وتركز فى الهدف بتاعك الى انت رايح عشانه

5-مفيش مشكلة لو انت عارف حاجه زميلك مش عارفها انك تعلمهالها مش تظيط عليه بيها لان المسرح مالوش اخر

6-بالنسبه للمخرجين الى لسه بيبدئوا ياريت متعملش لنفسك تاريخ وهمى عشان تبقى جنتل مان عادى قول انك اول مره عشان حتى لو غلطت الناس تبررلك ، وياريت تتقى ربنا فى الناس الى معاك ومتزودش عليهم لان الحاله مش مستحمله يعنى

7-بالنسبه للمخرجين برضو مفيش مشكلة تفتح باب المناقشه لمدة ساعة من البريك وتخلى الى عايز يتعلم حاجه يسالك عادى مش هتخسر حاجه والله ، ولازم تفهم انا كل الفرقه بتكمل بعض وانت من غير الممثلين والمؤلف مكنتش هتعمل عرض وهما نفس الكلام برضو

8-اخر حاجة للممثلين لو لسه هتبدء حاول تتعلم الاول الاساسيات والمسرح نظرى بعدها انزل اتعلم عملى والى عايز مراجع او كتب نظرى يدور علي النت مليان ، وياريت لما تدخل المسرح تطول بالك شوية عشان تعرف تتأقلم

معلش طولت عليكم كتير مع ان كان نفسى اقولكم اكتر والله بس عشان متزهقوش اكتر من كدة ، اى حد محتاج اى حاجه او عايز يعرف حاجه تانى احنا كلنا اخوات ، وربنا يحقق لكل واحد الى بيتمناه يارب ✊🖤

#كينيا ❤️