Firnas Egypt

20/12/2016

Aerosky is professional Academy in the practical aircraft maintenance engineering training in Egypt

16/12/2016

النهاردة جبنالكم صفحة لفريق بيشتغل في مجال الطيران اسمه AeroSky
الفريق ده بيقدم خدمات كتيرة و كلها تخص الطيارين ومهنديسن الطيران والي بيحبوا الطيران, من ضمن الخدمات الي بيقدموها تدريب الطيارين و كورسات لمهندسين طيران وميكيانيكا وتطبيق عملي و زيارات مدرسية للأطفال لمطار 6 اكتوبر و photo session و كمان قريب هيكون في pilot shop
ادخلوا و تابعوهم و شجعوهم لانهم يستاهلوا المتابعة

Aerosky is professional Academy in the practical aircraft maintenance engineering training in Egypt

25/09/2016

المرة ديه جبنالكم اختبار لمقطع جناح الطيارة Wing Airfoil في النفق الهوائي Wind Tunnel :)
لو حد ميعرفش ايه هو النفق الهوائي, ده جهاز ليه أحجام مختلفة, ممكن يبقى قد أوضة مثلا, بيبقى زي ماسورة واسعة و بيحطوا جواها أي حاجة عايزين يختبروها مع الهواء, و بيعدوا هوا بسرعة معينة في الماسورة ديه .. و بيحطوا أنواع مختلفة من الحساسات Sensors عشان يشوفوا تأثير الهوا و تغير اتجاه الشكل مع الهوا :D

و زي ما احنا شايفين هم بيمرروا هوا مع دخان, عشان يشوفوا بعينهم كمان اللي بيحصل للهوا لما نزود زاوية الجناح مع الهوا ... و بيلاقوا انه لما الزاوية بتكبر أوي بيحصل ما يسمى بالstall و و بدأ الطيارة في السقوط

18/09/2016

ده اختبار لباب الطيارة :D ... بيشوفوا لو الطيارة طارت في ظروف باردة, و تكون تلج على الباب, هل الميكانيزم بتاع الباب هيقدر يكسر التلج ده بزقة البني آدم العادية و لا لا :D

طبعا لو كان فشل الاختبار, بيعملوا التصميم بتاع ميكانيزم فتح الباب تاني :D

17/09/2016

نزول الFlaps على الجناح بتاع الطيارة أثناء الهبوط :D
النوع اللي شايفينه في الصورة ده أحد الأنواع اللي بتنزل على مجرى مش متركبة على مفصلات, بالتالي مش بس بتزود الCamber و زاوية الهجوم, ديه كمان بتزود مساحة الجناح :)

16/09/2016

المكونات الأساسية و طريقة عمل المحرك النفاث ب ضاغط الهواء من نوعية الCentrifugal Compressor

09/09/2016

جبنالكم فيديو لاختبار الطيارات اللي كان في هندسة عين شمس, في سياق ورشة iHub لتصميم و تصنيع الطائرات تحكم بريموت كنترول بالتعاون معانا في Firnas و فريق Gears up

استمتعوا :D :)

06/09/2016

جانب من ورش التصنيع لطائرات تحكم ب ريموت كنترول في ورش iHub في هندسة عين شمس بالاشتراك معانا في فرناس و فريق Gears up :)

في الصورة المشترك بيحاول يركب الأضلاع بتاعة الجناح Ribs ... بس المشكلة انه الأضلاع اللي وسط الجناح في الطيارة بتاعتنا هي آخر مكون بيتركب في الجناح, ف بيحاول يظبطها على قد المقاس
و كمان لو فيه عيوب تصنيع عملها خلال التركيب من الأول بيحاول يظبطها بقى عشان يخللي شكل الجناح انسيابي مع الهوا و ميبقاش فيه مطبات في الcontour بتاع الجناخ :D

تابعونا دايما, و شاركونا في رحلتنا لنشر تكنولوجيا الطيران في مصر :)

05/09/2016

جانب من ورش التصنيع لطائرات تحكم ب ريموت كنترول في ورش iHub في هندسة عين شمس بالاشتراك معانا في فرناس و فريق Gears up

في الصورة بيقوم المشتركين بتغليف جناح الطيارة ب مادة السلوفان, اللي بعد كده هيمشوا عليها بالمكواة عشان تسيح المادة اللاصقة اللي في السلوفان على الخشب :)
و في الصور برده بيقوم مشتركين بتظبيط زاوية ديل الطيارة ... لان أي درجة غلط يمين أو شمال هتبقى مشكلة :D

تابعونا دايما, و شاركونا في رحلتنا لنشر تكنولوجيا الطيران في مصر :)

04/09/2016

الحمد لله بعد 6 أسابيع شغل, في إحدى ورش ASU Innovation Hub - IHub في كلية الهندسة جامعة عين شمس و بالتعاون معانا في فرناس و مع فريق Gears up نجحنا في عمل 9 طيارات تحكم بريموت كنترول ... من أول التصنيع لجسم الطيارات, لنظام التحكم, لنظام الدفع, و أخيرا تجارب الطيران في الكلية ل5 طائرات منهم, كل ده تم باشتراك 35 طالب من أقسام مختلفة في هندسة عين شمس :)

صحيح الشغل كان كتير و الناس تعبوا و ارهقوا, بس بينسوا كل ده و بتبقى الفرحة على وجوههم لما بيشوفوا الماكينات الصغيرة بتاعتهم بتطير بأداء عالي و تزمجر في سماء الكلية :D ^_^

حقيقي انجاز بنفخر بيه, و شايفين انه في يوم ما هنقدر نخللي كل طالب يعمل و يطير طيارته بنفسه :)

02/09/2016

فرناسية 53
المرات اللي فاتت اتكلمنا عن أحد أنواع مقاومة الهواء على الطيارة ✈ أو أي جسم بيمر خلال الهوا عموما 🚀 🚌 🚲 ⚽... و هو نوع الPressure Drag .. المرة ديه بقى هنتكلم عن نوع جديد إن شاء الله و هو نوع الFriction Drag
في الواقع :D النوع ده واضح جدا من اسمه ... احتكاك الهوا مع سطح الطيارة بيعمل قوة مقاومة في عكس اتجاه حركة الطيارة

و أكيد بديهيا انه كل ما هتزيد مساحة سطح الطيارة, هتزيد المقاومة ديه >:o 😔

طيب ازاي أقل المقاومة ديه؟ :/
1. أول طريقة هي بتحويل طبقة الهوا الملاصقة لسطح الجناح من نوعية الLaminar Boundary Layers ... و ده أقدر أعمله بتأخير الMax thickness point في الجناح ... فهمت حاجة؟ :3
يعني مساحة مقطع الجناح اللي احنا نعرفها هي عبارة عن شكل شبه عين البني آدم, فيها تدرج في التخانة من الصفر لأقصى تخانة و للصفر تاني .. صح؟ ... أقصى تخانة ديه بقى لو خليناها ورا شوية .. هنحفز أكتر وجود طبقة الLaminar Boundary Layer اللي قولناها في الأول
و ديه مزاياها بقى انه طاقتها أقل و احتكاكها أقل بسطح الطيارة

2. تصنيع سطح طيارة ناعم أكتر يعني roughness أقل, بالتالي نزود احتمالية وجود الLaminar Boundary Layers

#فرناسيات

24/08/2016

فرناسية 52
المرة اللي فاتت اتكلمنا عن أحد أنواع مقاومة الهواء للطيارة ✈ أو أي جسم يعني بيتحرك جواه 🚄 🚀 ✈ 🚌, و هو نوع الpressure (form) drag
المرة ديه هنتكلم عن طرق تقليله ... ايه هي بقى ؟ :D
1. تنظيم انسيابية أو إرشاد طبقات الهوا على الجسم بطريقة منظمة و انسيابية Streamlining the shape
و ده واضح جدا في الصورة اللي تحت, لما أقولك انه الكورة الصغيرة ديه عليها مقاومة من الهوا بتساوي مقاومة الهوا على الجناح الكبير ده! 👌... فهمت حاجة؟! 😁 ... كل ما كان الشكل انسيابي .. هتتحرك طبقات الهوا عليه بشكل انسيابي
طب و الانسيابية ديه بتعمل ايه يعني؟؟ ☺
الانسيابية ديه هتخللي طلوع الهوا من منطقة الضغط المنخفض اللي فوق الجناح, لمنطقة الضغط الأكبر شوية اللي ورا الجناح, هتخلليها سهلة و بسيطة, لانها تدريجية زي ما احنا شايفين, بالتالي الهوا بالطاقة اللي فيه يقدر يكمل بدون انفصال Separation B| ... و زي ما قولنا المرة اللي فاتت الانفصال بتاع الهوا عن سطح الجناح هو اللي ولد أساسا مقاومة الهوا ديه

2. تقليل مساحة الجناح الأمامية
يعني انت لو حطيت ايدك كده في بوشها من شباك العربية 🚙 هتلاقي الهوا بيزقها جامد, لكن لو حطيت ايدك على سيفها كده هتلاقي مقاومة أقل ... صح؟! ... ده نفس اللي بنقوله ... كل ما كانت مساحة الجسم المواجهة للهوا أكبر هتبقى المقاومة أكبر -_- :D

3. تخشين سطح الجسم
و ده بيخللي طبقة الهواء القريبة جدا من الجسم Boundary Layers و اللي حاسة بوجود الجسم تبقى أقوى و طاقتها أعلى, ف الهوا يقدر يكمل على الجسم بتاع الطيارة بدون ما ينفصل و نعمل نفس المشكلة اللي حكينا عنها >:o :D

المرة الجاية إن شاء الله نتكلم عن نوع تاني من مقاومة الهوا على الأجسام المتحركة خلاله