01/03/2023
فيه مبدأ منتشر جداً بين المهندسين وهو:
ممنوع وصل الأسياخ في منطقة شد
المبدأ ده باللفظ ده "ممنوع" خطأ تماماً ..الكود عموما قال "يفضل" عدم وصل الأسياخ في منطقة شد
لكن هل ممنوع؟ .. لأ طبعاً
تلاقي نفسك عامل وصلات مظبوطة في البلاطة مثلاً وعامل أسياخ تبادلية Staggered وواخد طول وصلة سليم طبقا لجدول طول التماسك في الكود على حسب الوصلة في منطقة شد ولا ضغط، وسمك الخرسانة تحتها أكبر ولا أقل من 300 مم وغيره من الشروط اللي أنت طبقتها كلها صح جداً
وتلاقي بعد كده الاستشاري رافض الشغل بتاعك!
والسبب فيه كذا وصلة في منطقة شد!
مفيش شك زي ما قولنا إن الأفضل إننا نتجنب الوصل في أماكن الشد، ولكن مفيش مانع أن بعض الوصلات تكون في منطقة شد طالما محققة طول تماسك كافي
وكمان فيه حالات كتيرة مش سهل إنك تحدد أماكن الشد الصريحة
صحيح إننا عارفين إن الشد في البلاطة فوق الركيزة في العلوي، وفي نص البحر للسفلي
بس الكلام ده لو بلاطة سوليد أو فلات توزيع الأعمدة فيها توزيع منتظم، لكن لو بلاطة فلات توزيع الأعمدة غير منتظم بيكون صعب شوية
وبنلجأ لطرق تانية زي إننا نتجنب الوصل في أماكن التسليح الإضافي، بس برضه غالباً هيكون عندك فيه وصلات في مناطق شد
الخلاصة:
خلينا متفقين إننا نتجنب وصل الأسياخ في منطقة شد، ولكن لو حصل وعملناها في منطقة شد يبقى ناخد طول تماسك كافي وخلاص
