01/03/2018
استهلاك الكهربا بيتحسب بالكيلووات فى الساعة (ك.و.س) ومش كل الاستهلاك له نفس السعر. يعنى لما تستهلك 350 ك.و.س هتدفع 136.5 جنيه بس لما هتستهلك 700 ك.و.س (اللى هى ضعف الـ350)، هتدفع 424 جنيه مش 273 جنيه (اللى هى ضعف الـ136.5) ليه بقى! ليه، ها؟! عشان فى حاجة اسمها شرايح للاستهلاك، كل شريحة لها حد أقصى للـ ك.و.س، ولو استهلاكك زاد ك.و.س واحد، هتتحاسب بالسعر بتاع الشريحة الأعلى للـ ك.و.س الزيادة ده هأقول لك إزاى:
- الشريحة الأولى من 0 إلى 50 ك.و.س بـ13 قرش، لو استهلكت الـ50 كلهم، هتدفع 6.5 جنيه (50*0.16)
- الشريحة التانية لحد 100 ك.و.س ب22 قرش، لو استهلكت 100 ك.و.س، هتدفع 17.50 جنيه. أول 50 ك.و.س بـ6.5 جنيه والـ50 ك.و.س الباقيين ال ك.و.س الواحد بـ22 قرش يعنى بـ11 جنيه اجمالى الفاتورة هيبقى 17.50 جنيه (6.5+11)
- أعلى حاجة لتالت شريحة هى 200 ك.و.س والـ ك.و.س فى الشريحة دى بـ27 قرش، تمام؟ يبقى لو استهلكت 200 ك.و.س هتدفع 54 جنيه (200*0.27)
- الشريحة الرابعة لحد 350 ك.و.س والـ ك.و.س فى الشريحة دى بـ55 قرش. فـ لو إنت استهلكت 350 ك.و.س هتدفع أول 200 اللى هم 54 جنيه بس الـ150 الباقيين هتتحاسب عليهم الـ ك.و.س بـ0.55 قرش الواحد يعنى 82.5 جنيه (150*0.55). فـ فاتورة الكهربا كلها هتبقى 136.5 جنيه (54+82.5)
- الشريحة الخامسة لحد 650 ك.و.س والـ ك.و.س بـ75 قرش فـ كده أول 350 ك.و.س بـ136.5 جنيه والـ300 الباقيين هيتحسبوا بـ225 جنيه. فـ اجمالى الفاتورة هيكون 361.5 جنيه (136.5+225)
- الشريحة اللى بعد كده لحد 1,000 ك.و/س بـ125 قرش للـ ك.و.س اجمالى فاتورة الكهربا هيكون 799 جنيه ((361.5+(350*1.25))
من بعد ما تعدى ال1,000 ك.و.س شكرا....الدعم بيتشال وهتتحاسب بـ1.35 قرش للـ ك.و.س الواحد من الأول يعنى لو استهلكت 1,001 ك.و.س فاتورتك هتكون بـ1,351.35 جنيه.
شايف الفرق بين استهلاك 1,000 و1,001 ك.و..س!
الموضوع كده خلص؟ لأ اجمالى الفواتير اللى فوق دى مش شاملة الرسوم والدمغات وتكلفة خدمة العملاء
نقلا عن الصفحة الرسمية لجهاز تنظيم مرفق الكهرباء وحماية المستهلك
