26/09/2024
Pa gen sakrifis ki pa gen yon pri a peye. Siw deside, ou ka fè sakrifis la.
Vizyon pa mache san difikilte. Siw kwè nan rèv ou, difikilte pa ka fèw fè bak.
Jodi a mwen plis ke kontan paske mwen akonpli yon rèv ke m te genyen nan lide pou m chache nouvo konesans.
Mwen manke pèdi vi m pou m te ka swiv vizyon m te genyen an.
Mwen te fè yon demand bous poum te vin fè yon metriz en Espagne, yo te reponn mwen, yo te voye yon lèt banm, li te rete m selman poum te fè tout demach yo poum te ale anbasad. Se te nan mwa septanm ane 2022, lèm fin prepare tout dokiman yo, mwen al depoze yo anbasad, apre yon semèn yo rele m nan jedi, yo dim ke m dwe ale anbasad la nan vandredi maten a 10h pou m te ka al pase yon interview, men lè sa a, kòm te gen manifestasyon nan tout peyi a, mwen pat ka jwenn machin poum rantre Pòtoprens, mwen te deside fè transbòde. Mwen kite Gonayiv nan 2h nan aprè midi, mwen pran plizyè kous machin, lèm rive kabarè, li te gentan 9h nan aswè, lapli tap tonbe pat gen machin ki te ka fè zòn nan paske te gen barikad nan tout wout la. Mwen te oblije dòmi Kabarè nan lide poum te ka gentan leve bonè poum ale anbasad la poum pat rate interview a. Lèm leve nan vandredi maten bonè, mwen pran yon moto pou lage m Titanyen, li mete m bò ti pòs polis la ke yo te gentan boule depi nan jedi. Mwen te gen 2 lòt zanmi avè m, nou progrese a pye nou rive kafou Minotri. Lè nou rive la, te telman gen moun nan kafou a, se tankou pat gen anyen nan zòn nan. Poutan se menm moun moun yo, yo fèl konsa pou lè wap rive nan kafou a, pouw ka di nan lespri w ke gen moun nan zòn nan, ou pap gen anyen siw avanse. Lè m rive nan kafou a, aprè kèk minit kanpe, nou te deside pale ak yon chofè moto kap travèse moun Kanaran. Lè nou pale avèl, li di men pou konbyen lap travèse nou Kanaran. Lè nou monte moto a, epi gen yon kote nou rive, olye se wout dwat chofè a te fè ak nou, li monte anlè Titanyen ak nou nan yon baz, epi lè nou rive, yo pran kòb sou nou, epi yo fè nou retounen, Gras BonDye yo pat fè nou anyen ankò.
Mwen ekri anbasad la, mwen di kem pa ka rantre Pòtoprens, pou yo chanje randevou a pou mwen.
Sa pa rete la, mwen tounen Gonayiv, yon semèn apre mal pase nan menm wout la poum te ka swiv vizyon ke m te genyen an. Finalman male Pòtoprens, mwen pase interview a, mwen te tou rete Pòtoprens aprè yon semèn yo banm viza a. mwen te tèlman kontan, mwen pa pran tan poum gade viza a. Mwen retounen Gonayiv, map prepare m poum ka vwayaje, epi yon sware mwen pran paspò a poum gade viza a, mwen te tèlman etone, paske viza a te gen erè ladanl, gen yon kote pou yo te mete yon 6 yo mete yon 3 nan nimero paspò a. Pwoblèm pi rèd
Mwen rele anbasad la nan demen, yo dim poum vwayaje avè l konsa, men aprè sa sekretè a relem anko li dim, li pa kwè map ka vwayaje avè l konsa. Mwen te eseye, mwen tap rantre Repiblik Dominikèn, lèm rive nan dwán nan Dajabon, yo pa kite m rantre avèl. Yo dim tounen demen, lèm retounen nan demen, mwen rantre nan biro ajan kap travay nan dwán nan, m tandel rele yon otorite, telefòn nan te sou speaker epi m tande vwa a di nan Lang espanyòl , (este joven ha conseguido una beca de estudio), sa vle di, jèn sa a jwenn yon bous etid, nan kè m mwen dim bon. Epi lèl fin pale ak moun nan, li voye paspò a sou mwen, li dim dezole ou pap ka pase la.
Mwen pa dekouraje, mwen rantre Okap. Se te yon jou samedi, mwen te deside achte yon biyè poum rantre Pòtoprens nan dimanch poum te ka ale anbasad la nan lendi maten.
Lèm rive anbasad la, yo dim yo pap gentan regle sa jodi a, mwen mande yo yon prosè vèbal poum ka vwayaje, yo ban mwenl. Mwen te panse m tap jwenn vòl poum tounen Okap poum te pase pran malèt mwen, mwen pa jwenn, mwen te jwenn yon sèl vol nan jou lendi a se te a 4h nan aprè midi pou Repiblik dominikèn, e mwen te gen poum vwayaje nan demen madi a midi. mwen te oblije kite malèt la, mwen ale Repiblik Dominiken konsa, e nan demen madi, mwen rantre Espagne ak yon valiz ki gen dokiman m selman ladanl, de menm vid.
Ebyen jodi a se ak anpil kontantman, mwen defann tèz fen etud la. E nou gen yon metriz nan Nanoscience and Technology of Materials.
E nou vle atire atansyonw sou gran projè ke nou genyen pou peyi nou espesyalman Gonayiv pou pote solisyon ki nesesè ak anpil fenomèn kap ravaje konstriksyon nou yo sitou sa ki plase nan zon kote ki imid anpil oubyen nan zòn kotyè yo.
Nan yon lot piblikasyon, nap gen pou nou eksplike w kisa espesyalite a ye e siw ta bzwen konstwui nou la pou baw sèvis.
Nan jou kap vini yo, wap ka gen aksè ak website entrepriz konstriksyon COMIA, wap ka ranpli yon fomilè epi nap rantre an kontak avèw nenpot kotew ye a, men pou moman an, gen numero ki disponib siw ta bzwen sèvis nou. +3464300645 /+50933262490
BRAVO AK TOUT KONBATAN KAP GOUMEN POU AKONPLI REV YO.
👏👏👏👏👏
DEFENSA DE MI TRABAJO DE FIN DE MASTER
https://www.linkedin.com/in/emmanuel-charles-12782b20b/
