22/05/2026
ሱር ኮንስትራክሽን ኣብ ትግራይ ብሰንኪ ስእነት ነዳዲ ዳርጋ ስራሕ ክሰርሕ ናብ ዘይኽእለሉ ብርኪ በፂሑ ከም ዝርከብ ኣፍሊጡ።
ትካል ሱር ኮንስትራክሽን ምስ ላዕለዎት ኣመራርሓን ቦርድን ትእምት ሕሉፍ ኣፈፃፅማ መደባት 9 ወርሒ መሰረት ዝገበረ ገምጋማዊ ዘተ ኣካይዱ።
ሕሉፍ ኣፈፃፅማ መደባት 9 ወርሒ ዘቕረቡ ማኔጅንግ ዳሬክተር እቲ ትካል ዝኾኑ ኢንጅነር ዘንፉ ኣስፋው ሱር ካብቶም ከቢድ ዕንወት ዝበፀሖም ትካላት ትእምት ሓደ እኳ እንተነበረ ብሳላ ብቁዕ ዝሰልጠነ ሓይሊ ሰቡ ካብ ነበረያ ድሒኑ ሕዚ ናብ ህያው ውፃእ ማዓት ተሰጋጊሩ ምስ ቡዙሕ ፀገማቱ እውን እንተኾነ ኣብ ዳግመ ህንፀት ትግራይ ዓብይ ኣበርክቶ እናገበረ ከም ዝመፀ ብምሕባር ሕዚ ግና ብሰንኪ ስእነት ነዳዲ፣ ወሰን ናይ ዘይምኽባር ስራሕቲ ፣ ሕፅረት ባጀትን ካልኦት ፀገማትን ተደራሪቦም ኣብ ትግራይ ዳርጋ ስራሕ ክሰርሕ ናብ ዘይኽእለሉ ብርኪ በፂሑ ከም ዝርከብ ኣማላኺቶም።
ኣብቲ ዝቐረበ ፀብፃብ መሰረት ገይሮም ሪኢቶኦም ዝሃቡ ሰራሕተኛታት እቲ ትካልን ኣመራርሓ ትእምትን ብወገኖም ከምዚ ዓይነት ሓበራዊ ገምጋማት ምክያድ ንቀፃሊ እውን እንተኾነ ተጠናኺሩ ክቕፅል ከም ዘለዎ ብምሕባር ከም ትካል ዘለውዎ ጥንካረታት ዓቂቡ ዘለውዎ ክፍተታት ድማ ኣሪሙ ዝሓዞም ቀፀልቲ ኣንፈታት ንምዕዋት ብጊዜ የለን መንፈስ ክሰርሕ ይግባእ ክብሉ ተላብዮም።
ሱር ካብቲ ዝበፀሖ ኩለመዳያዊ ከቢድ ዕንወት ወፂኡ ኣብ ዝሓለፉ ክልተ ዓመታት ከም ትግራይ ደጊምና ክንሓዊ ከም እንኽእል ኣብ ህዝብና ዓብይ ተሰፋ ዘሰነቀ ትካል እዃ እንተነበረ ኣብዚ ሕዚ እዋን ግና ዝጀመሮም ስራሕቲ መንገዲ ብእዋኑ ክሰርሖም ብዘይምካኣሉ ኣብ ህዝቢ ብዙሕ መረረት ከም ዘሎ ዘገንዘቡ ግዚያዊ ፈፃሚ ስራሕ ትእምት ዶክተር ጥላሁን ታረቀ ብወገኖም ከም ሱር ገጢሞሞ ዘለዉ ፈተናታት ንምብዳህ ኣብ ዝገብሮም ኩለመዳያዊ ፃዕርታት ከም ትእምት እውን ኣብ ጎኒ እቲ ኩባንያ ኮይኖም ዝካኣሎም ኩሉ ድጋፍ ከም ዝገብሩ ኣረጋግፆም ።
ምስዚ ብተወሳኺ ሱር ከም ኩባንያ ዓርሱ ንምሕዋይ ዝገበሮ ተጋድሎ ዝነኣዱ ኣካቢ ቦርድ ትእምት ዶክተር ኣብራሃም ተኸስተ ብግዲኦም ሱር ብፍላይ ኣብ ምስፍሕፍሕ መሰረተ ልምዓት ፣ኣብ ምፍራይ ብቑዕ ዝሰልጠነ ሓይሊ ሰብ፣ ኣብ ምቕናስ ስራሕ ስእነት ብብርኪ ሃገር ይኹን ትግራይ ዓብይ ግደ እናተፃወተ ከም ዝመፀ ብምሕባር ሕዚ እውን ከም ትካል ካብቲ ናይ ትማሊ ብዝበለፀ ሕውየት ሱር ሕውየት ትግራይ ከም ዝኾነ ተገንዚቡ ኣጋጢሞሞ ዘለው ፀገማት ንምብዳህ ካብ ዝኾነ እዋን ንላዕሊ መዋፅኦታት ከናድን ማእኸሉ ትግራይ ገይሩ ክሰርሕን ከም ዘለዎ ኣገንዚቦም ክብል ኮሚኒኬሽን ሱር ኮንስትራክሽን ፀብፂቡ ክብል ድህረገፅ ትእምት ዕላዊ ገይሩ።
