12/07/2026
ആരും പറയാത്ത ചില കഥകൾ: കോഴിക്കോട് റെയിൽവേ സ്റ്റേഷനില്‍നിന്ന്...
പത്രത്താളുകളിലും ചർച്ചകളിലും പലപ്പോഴും നിറയാറുള്ളത് റെയിൽവേയിലെ പോരായ്മകളും വിമർശനങ്ങളുമാണ്. പുറത്തുനിന്ന് നോക്കുന്നവർക്ക് അത് കേവലം വാർത്തകൾ മാത്രമായിരിക്കാം. എന്നാൽ, ആ വിമർശനങ്ങൾക്കപ്പുറം പ്രതികൂല സാഹചര്യങ്ങളിലും പതിനായിരക്കണക്കിന് യാത്രക്കാരുടെ സുരക്ഷയ്ക്കായി അഹോരാത്രം പണിയെടുക്കുന്ന, സ്വന്തം ചോരയും നീരും നൽകി ഈ പ്രസ്ഥാനത്തെ താങ്ങിനിർത്തുന്ന ഒരു കൂട്ടം മനുഷ്യരുണ്ട്. കോഴിക്കോട് റെയിൽവേ സ്റ്റേഷനിൽ കഴിഞ്ഞ ദിവസമുണ്ടായ സംഭവം ആ നിശബ്ദ സേവകരുടെ ഒത്തൊരുമയുടെ നേർക്കാഴ്ചയായിരുന്നു.
ആയിരക്കണക്കിന് യാത്രക്കാരുടെ കാൽപ്പാടുകൾ പതിന്മടങ്ങ് പതിയുന്ന, ട്രെയിനുകളുടെ ഹോൺ മുഴക്കങ്ങളും അനൗൺസ്മെന്റുകളും കൊണ്ട് എപ്പോഴും മുഖരിതമായ കോഴിക്കോട് സ്റ്റേഷൻ. കഴിഞ്ഞ കുറച്ചു ദിവസങ്ങളായി പെയ്ത കനത്ത മഴയ്ക്കൊപ്പം, അവിടെയുള്ള ഒരു പഴയ പൈതൃക ഗോപുരത്തിന് നേരിയ വിള്ളൽ വീണത് റെയിൽവേയുടെ സ്പെഷ്യൽ വിഭാഗത്തിന്റെ ശ്രദ്ധയിൽപ്പെട്ടിരുന്നു. ഉടനടി ഇടപെട്ട റെയിൽവേ സുരക്ഷാ സേനയുടെ (RPF) നിതാന്തമായ ജാഗ്രതയും നിരീക്ഷണവും ആ പ്രദേശത്ത് ശക്തമായി ഉണ്ടായിരുന്നു. വലിയൊരു ദുരന്തം മുന്നിൽ കണ്ടുകൊണ്ട്, ഉദ്യോഗസ്ഥരും ജീവനക്കാരും ചേർന്ന് പ്രസ്തുത പ്ലാറ്റ്‌ഫോം മുഴുവനായിട്ടല്ലായിരുന്നു എങ്കിൽപ്പോലും, ഈ തകർന്നുവീണ ഗോപുരത്തിന്റെ ചുറ്റുഭാഗങ്ങളും അതിയിലേക്കുള്ള സഞ്ചാരപാതകളും മതിയായ ഫെൻസിങ് ഉപയോഗിച്ച് മുൻകൂട്ടിത്തന്നെ സുരക്ഷിതമായി വേർതിരിച്ചു. യാത്രക്കാരെ മാത്രമല്ല, ആ അപകട മേഖലയിലേക്ക് ജീവനക്കാർക്ക് പോലും പ്രവേശിക്കാനുള്ള അനുമതി നൽകാതിരിക്കുകയും ചെയ്യാൻ തക്കവണ്ണം കർശനമായിരുന്നു ആ സുരക്ഷാ ക്രമീകരണങ്ങൾ.
ഒടുവിൽ ആ പഴയ ഗോപുരത്തിന്റെ മുകൾഭാഗം തകർന്നുവീണ ആ നിമിഷം! എഴുപതിനായിരവും എൺപതിനായിരവും യാത്രക്കാർ വന്നുപോകുന്ന ആ തിരക്കേറിയ പ്ലാറ്റ്‌ഫോമിൽ വലിയൊരു ദുരന്തം ഉണ്ടാകേണ്ടതായിരുന്നു. എന്നാൽ ആ ഗോപുരം പൊട്ടി വീണതിന്റെ തൊട്ടു ചുറ്റുവട്ടത്തോ അതിയിലേക്കുള്ള വഴികളിലോ ആ സമയത്ത് യാത്രക്കാരോ ജീവനക്കാരോ ആയി ഒരാൾ പോലും ഉണ്ടായിരുന്നില്ല എന്നത് തന്നെയാണ് ആ മുൻകരുതലിന്റെ ഏറ്റവും വലിയ നേർക്കാഴ്ച! മുൻകൂട്ടി ഒരുക്കിയ ആ സുരക്ഷാ ഫെൻസിങ്ങും RPF-ന്റെ കൃത്യമായ നിരീക്ഷണവും ഉള്ളതുകൊണ്ട് മാത്രം ഒരു ജീവനും അവിടെ പൊലിഞ്ഞില്ല, ആർക്കും ഒരു പോറൽ പോലും ഏറ്റില്ല! റെയിൽവേ ജീവനക്കാരുടെ ദീർഘവീക്ഷണവും മുൻകരുതലും ഒഴിവാക്കിയത് വൻ ദുരന്തത്തെയായിരുന്നു.
അപകടം നടന്ന നിമിഷം മുതൽ അവിടെ കണ്ടത് റെയിൽവേയുടെ സമാനതകളില്ലാത്ത പ്രത്യാക്രമണമായിരുന്നു. സ്റ്റേഷൻ മാനേജരുടെ നേതൃത്വത്തിൽ റെയിൽവേയുടെ സുരക്ഷാ സംവിധാനങ്ങൾ ഉടനടി ഉണർന്നു പ്രവർത്തിച്ചു. പ്ലാറ്റ്‌ഫോമിലെ തടസ്സങ്ങൾ മാറ്റാനും ട്രാക്ക് പുനഃസ്ഥാപിക്കാനുമുള്ള എല്ലാവിധ സജ്ജീകരണങ്ങളിലേക്കും സംവിധാനങ്ങളിലേക്കും റെയിൽവേ മിന്നൽവേഗത്തിൽ കടന്നു.
എഞ്ചിനീയറിംഗ്, മെക്കാനിക്കൽ, ഇലക്ട്രിക്കൽ, സിഗ്നൽ, TRD, ട്രാഫിക്, RPF എന്നീ വിഭാഗങ്ങളെല്ലാം ഒരൊറ്റ മനസ്സായി സർവ്വ സജ്ജമായി സംഭവസ്ഥലത്തേക്ക് ഇരച്ചെത്തി. റെയിൽവേയുടെ ഈ അതിശക്തമായ മുന്നേറ്റത്തിലേക്കാണ് ഒപ്പം കൈകോർത്തുകൊണ്ട് കേരള ഫയർഫോഴ്സും കേരള പോലീസും തങ്ങളുടെ സത്വര സഹായവുമായി എത്തിച്ചേർന്നത്.
റെയിൽവേയുടെ അന്നം കഴിക്കുന്ന ചുമട്ടുതൊഴിലാളികളായ പോർട്ടർമാർ, സ്റ്റേഷനിലെ വെണ്ടർമാർ, വിവിധ ജോലികളിൽ ഏർപ്പെട്ടിരിക്കുന്ന കരാർ ജീവനക്കാർ തുടങ്ങി നേരിട്ടോ അല്ലാതെയോ ഈ വലിയ പ്രസ്ഥാനത്തെ ആശ്രയിച്ച് ജീവിക്കുന്ന ഓരോരുത്തരും കണ്ടറിഞ്ഞും കേട്ടറിഞ്ഞും കൈയും മെയ്യും മറന്ന് ഈ ദൗത്യത്തിലേക്ക് ഓടിയെത്തി! അതായിരുന്നു ആ റെയിൽവേ കുടുംബത്തിന്റെ യഥാർത്ഥ ഐക്യം. റെയിൽവേയെ സംബന്ധിച്ച് ഏറ്റവും അഭിമാനപൂർവ്വമായ നിമിഷം കൂടിയായിരുന്നു അത്.
ഏറ്റവും ഹൃദയസ്പർശിയായ കാര്യം, നൈറ്റ് ഡ്യൂട്ടി കഴിഞ്ഞ് കഠിനമായ ക്ഷീണത്തോടെ വീട്ടിലേക്ക് മടങ്ങിയ ജീവനക്കാർ പോലും വിശ്രമം മറന്ന് ഓടിവന്നു എന്നതാണ്. റെയിൽവേയ്ക്കോ യാത്രക്കാർക്കോ ഒരു ആപത്ത് വരുമ്പോൾ അതിപ്പോൾ ഓൺ ഡ്യൂട്ടിയെന്നോ ഓഫ് ഡ്യൂട്ടിയെന്നോ ഉള്ള വ്യത്യാസമില്ലാതെ എല്ലാവരും ഒരൊറ്റ ചേരിയായി മാറി.
ഈ ദൗത്യത്തിൽ എഞ്ചിനീയറിംഗ് വിഭാഗത്തിന്റെ പ്രവർത്തനം പ്രത്യേകം എടുത്തു പറയേണ്ടതുണ്ട്. റെയിൽവേയുടെ കായികശേഷി എന്ന് പറഞ്ഞാൽ അതെന്നും എഞ്ചിനീയറിംഗ് വിഭാഗമാണ്. ഒരു പാലമോ, തുരങ്കമോ, കുന്നോ, മലയോ, പുഴയോ റെയിൽവേയെ സംബന്ധിച്ച് ബാധിക്കപ്പെടുമ്പോൾ അവിടെയെല്ലാം റെയിൽവേയുടെ യഥാർത്ഥ 'പട്ടാളമായി' എപ്പോഴും മുന്നിൽ നിൽക്കുന്നത് എണ്ണത്തിൽ കൂടുതലുള്ള, കരുത്തരായ ഈ എഞ്ചിനീയറിംഗ് ജീവനക്കാരാണ്.
അപകടം നടന്നു കഴിഞ്ഞിട്ടുള്ള ആ കഠിനമായ 48 മണിക്കൂറിൽ പല റെയിൽവേ വിഭാഗങ്ങളിലെ തൊഴിലാളികളും ഒന്നുറങ്ങിയിട്ടു പോലും ചെയ്യാതെ ട്രാക്കിലും പരിസരങ്ങളിലും ഈ സമയം മുഴുവൻ കഠിനപ്രയത്നം ചെയ്തത് എന്നത് കൂടി നാം പ്രത്യേകം മനസ്സിലാക്കേണ്ടതുണ്ട്.
അവർക്ക് ആത്മവിശ്വാസമേകാൻ പാലക്കാട് ഡിവിഷന്റെ വിവിധ ഭാഗങ്ങളിൽ നിന്നുള്ള ഉയർന്ന റെയിൽവേ ഉദ്യോഗസ്ഥർ ഉടനടി കോഴിക്കോട്ട് സംഭവസ്ഥലത്ത് പാഞ്ഞെത്തുകയും, അവിടെത്തന്നെ തമ്പടിച്ച് പ്രവർത്തനങ്ങൾക്ക് നേരിട്ട് മുന്നിൽ നിന്ന് നേതൃത്വം നൽകുകയും ചെയ്തു.
കോഴിക്കോട് സ്റ്റേഷനിലെ തടസ്സങ്ങൾ മാറ്റാൻ സമീപ സ്റ്റേഷനുകളായ ഫറോക്ക്, കല്ലായി, വെസ്റ്റ് ഹിൽ എന്നിവിടങ്ങളിലെ സ്റ്റേഷൻ മാസ്റ്റർമാരും ജീവനക്കാരും വിശ്രമമില്ലാതെ ഒപ്പം നിന്നു. അവിടേക്ക് മാറ്റയ വണ്ടികളിലേക്ക് യാത്രക്കാര്‍ക്ക് എത്തിച്ചേരാന്‍ വേണ്ടി KSRTC സര്‍വ്വീസുകള്‍ ഏര്‍പ്പെടുത്തി എന്നതും ശ്രദ്ധേയമാണ്.
മാധ്യമങ്ങൾ റെയിൽവേയിലെ പോരായ്മകൾ ചൂണ്ടിക്കാണിക്കുന്നത് അവരുടെ ചുമതല കൊണ്ടാകാം, അല്ലെങ്കിൽ റെയിൽവേയുടെ ഈ ആന്തരിക കരുത്ത് ഉള്ളിലോട്ടിറങ്ങി കാണാത്തതുകൊണ്ടാകാം. അതുകൊണ്ട് അവരെ കുറ്റപ്പെടുത്തേണ്ടതില്ല. പക്ഷേ, ഒരു കാര്യം ഉറപ്പാണ്—ഈ ധീരതയും ഒത്തൊരുമയും ഒരു പത്രവാർത്തയിലും വലിയ അക്ഷരങ്ങളിൽ അച്ചടിച്ചുവന്നില്ലെങ്കിലും, അത് പ്ലാറ്റ്‌ഫോമിലൂടെ ഭയമില്ലാതെ നടന്നുപോകുന്ന ഓരോ യാത്രക്കാരന്റെയും സുരക്ഷിതമായ പുഞ്ചിരിയായി അവിടെയെപ്പോഴുമുണ്ട്.
''നിങ്ങളേവർക്കും സുരക്ഷിതമായ യാത്രയൊരുക്കാൻ, കാവലായി... ഞങ്ങളിവിടെയുണ്ട്''!
ഈ വലിയ ദൗത്യം വിജയകരമായി പൂർത്തിയാക്കാൻ ഒരേ മനസ്സോടെ കഠിനാധ്വാനം ചെയ്ത എല്ലാ റെയിൽവേ ജീവനക്കാർക്കും, കരാർ തൊഴിലാളികൾക്കും, ഉദ്യോഗസ്ഥർക്കും, റെയിൽവേയ്‌ക്കൊപ്പം ഒത്തുചേർന്ന് പ്രവർത്തിച്ച എല്ലാവര്‍ക്കും ഹൃദയം നിറഞ്ഞ നന്ദിയും ആദരവും!
അപകടം നടന്ന ആ നിമിഷം, ആ സംഭവസ്ഥലത്തേക്ക് ആദ്യമായി ഓടിയെത്തിയവരിൽ ഒരാളായിരിക്കാൻ കഴിഞ്ഞത് എന്റെ റെയിൽവേ ജീവിതത്തിലെ ഏറ്റവും വലിയ ഒരു നിയോഗമായി ഞാൻ കരുതുന്നു. കോഴിക്കോട് സ്റ്റേഷനിൽ നിലംപതിച്ച ആ പൈതൃക ഗോപുര മഹാമേരുവിന്റെ അസ്ഥിപഞ്ചരങ്ങൾ ട്രാക്കിൽ നിന്നും പ്ലാറ്റ്‌ഫോമിൽ നിന്നും യുദ്ധകാലാടിസ്ഥാനത്തിൽ നീക്കം ചെയ്ത് ഒരു നൂറ്റാണ്ടിന്റെ ചരിത്രം അവിടെ എഴുതി അവസാനിപ്പിക്കുമ്പോൾ, ആ കൂട്ടായ്മയ്ക്ക് കരുത്ത് പകര്‍ന്ന ഒരുപാട് കൈകളിൽ എന്റെ കൈകളും ഉണ്ടായിരുന്നു! എന്ന് അഭിമാനത്തോടെ പറഞ്ഞുകൊണ്ട് തൽക്കാലം നിർത്തട്ടെ...
-വികാസ് കൊയിലാണ്ടി
