17/09/2024
హరికథకు పాదాభివందనం
‘కోట’ వారి హరికథ ఉందా... బాబోయ్ ఇవాళ ఆట రద్దు చేసేయ్యండయ్యా. కనీసం ఖర్చులు కూడా రావు... ఓ సినిమా ధియేటర్ యజమాని ఆందోళన
పెద్ద పెద్ద గ్రౌండ్స్ చూసుకుని ఈయన లాంటి వారి హరికథ పెట్టాలయ్యా... మామూలు ఆలయాల్లో పడితే పరిస్థితి ఇలాగే ఉంటుంది... ‘కోట’ వారి హరికథ కారణంగా ట్రాఫిక్ జామ్ అయితే, ఆ సందర్భాన్ని సరిదిద్దలేక ఇబ్బందిపడ్డ ఓ కానిస్టేబుల్ విసుగు (ఆత్మీయంగా)
‘కోట’ వారి హరికథ పెట్టుకుని ఊరెళ్తానంటావా... బుద్ధుందా నీకు. అయినా ఆయన హరికథ వినాలంటే యోగ్యత ఉండాలి... తమ ఇంటి సందులో కోట వారి హరికథ రోజున ఓ ఇంటి యజమాని కోపం, నిర్వేదం, ఆవేదన
ఒక్కసారి ‘కోట’ వారి హరికథ పెట్టిస్తే చాలయ్యా... మీ సంస్థ పేరు మార్మోగిపోతుంది. ఓ స్వచ్ఛంద సంస్థ నిర్వాహకుడికి ఓ వరాలయ్య సలహా.
ఇంకా ఇలాంటి సందర్భాలు, సన్నివేశాలు... ఎన్నో... ఎన్నెన్నో.... లెక్కలేదు.
‘కోట సచ్చిదానందశాస్త్రి’ హరికథకు మారుపేరు.
హాస్యం, కరుణ, వీర, బీభత్సాది రసాలు పలికించినా,
ధర్మశాస్త్ర రహస్యాలు విడమర్చి చెప్పినా,
పురాణ ఇతిహాసాలు, కావ్యాలు.. ఒకటేమిటి సమస్తమైన సనాతన సాహిత్యాన్ని హరికథలుగా మార్చి కొన్ని దశాబ్దాల పాటు కోట్లాది ప్రజల హృదయాల్లో ధర్మఘంట మోగించి, హరికథకు పెట్టని కోటగా మారిన ధన్యజీవి ఆయన.
హరికథ కళలో ‘పద్మశ్రీ’ సత్కారం అందుకుని, తెలుగువారి కళారూపానికి జాతీయస్థాయి గౌరవం తెచ్చిపెట్టి, తనతో పాటు తన కళారూపానికి కూడా ఘనత చేకూర్చిన ధన్యజీవి
కేవలం కోట వారి హరికథ కారణంగానే ఓ ఆలయ నిర్మాణంతో సహా ప్రతిష్ఠా కార్యక్రమానికి అవసరమైన సమస్తధనం సమకూరిందంటే... ఆశ్చర్యం అనిపిస్తుంది.
కోటవారి హరికథకు మాత్రమే దక్కిన అరుదైన ఘనత అది.
‘పద్మశ్రీ’ పురస్కారం పొందిన వేళ బ్రహ్మశ్రీ కోట సచ్చిదానంద శాస్త్రి గారికి విజయవాడ, సత్యనారాయణపురంలోని శ్రీ సీతారామ కల్యాణమండపంలో నిర్వహించిన సత్కార సభకు నేను అధ్యక్షత వహించడం... నా జీవితంలో చిరస్మరణీయమైన ఘట్టం.
ఆ మహనీయుడికి నివాళి.
