25/07/2023
سیستەمی غاز لە سیستەمی بەنزین مەترسیدارترە. ئەو هاوڕێیانیانەی پرسیاری ئەوەیان کردبوو کە هۆکارەکانی بەکارنەهێنانی سیستەمی غاز چین؟
سیستەمی غاز لە دووبەش پێکدێت:
- کوالیتی گازەکان و مادەکان و کەرەستەکان و ئامێرەکان.
- ستانداردەکان و شێوازە گونجاوەکانی جێگیرکردنی سیستەمەکان.
۱- لایەنی کوالیتی گازەکان:
وەک لای هەمووان زانراوە کە گازە پاڵەپەستۆکراوە نەوتییەکان (LPG) کە بە غازی ماڵان ناسراون لە تێکەڵەیەک لە هایدرۆکاربۆنەکان پێکدێن کە بەشێوەیەکی گشتی لە گازی پرۆپان و بیوتان دەگرنەوە. ئەوەی تا ئێستا لای ئێمە نەزانراوە ئەوەیە کە ڕێژەی گازی پرۆپان و بیوتان بەشێوەی جیاواز تێکەڵ دەکرێن لە گازی LPGـدا کە بەندن بە پلەی گەرمی وڵاتەکان و شوێنەکانەوە، لە بنچینەدا ئەم گازانە هیچ بۆن و ڕەنگێکیان نییە بۆیە بۆلایەنی سەلامەتی گازی بۆنداریان تێدەکرێت.
ڕێژەی تێکەڵکردنی هەر یەک لە گازی پرۆپان و بیوتان لە شلگازە پاڵەپەستۆ نەوتییەکان:
- پەستانی گازی پرۆپان بەرزترە لە پەستانی گازی بیوتان، بۆیە لە پلەگەرمییە بەرزەکاندا ( وڵاتە گەرمەکان) ڕێژەی گازی پرۆپان کەمترە لە ڕێژەی گازی بیوتان (ڕێژەی بیوتان زیاترە لە پرۆپان) لە پێکهاتنی گازی LPGـدا، ئەمەش بۆ ئەوەیە کە گازەکە لە دۆخی شلگازیدا بمێنێتەوە و سەلامەت بێت.
- لە پلە گەرمییە نزمەکانیشدا (وڵاتە ساردەکان) ڕێژەی گازی پرۆپان زیاترە لە ڕێژەی گازی بیوتان (ڕێژەی گازی بیوتان کەمترە لە ڕێژەی گازی پرۆپان) لە پێکهاتنی گازی LPGـدا، چونکە گازی پرۆپان خاڵی کوڵانی نزمە و گونجاوترە بۆ بەکارهێنان لە پلە گەرمییە نزمەکاندا. ئەمەش بۆ ئەوەیە کە گازەکە لە دۆخی شلگازیدا بمێنێتەوە و بۆ بەکارهێنان و خەزنکردن و گواستنەوە سەلامەت بێت.
تێکەڵکردنی ڕێژە جیاوازەکانی گازی پرۆپان و بیوتان لەگازی LPGـدا دڵنیایی ئەوەدەدات کە گازی LPG لە دۆخی شلگازیدا دەمێنێتەوە و بۆ بەکارهێنان و خەزنکردن و گواستنەوە سەلامەتە لە ژینگە گەرم و ساردەکاندا.
ئەو گازە سروشتییانەی کە لە وڵاتی تریش بەکاردەهێنرێت بۆ لایەنی سوتەمەنی و گەرمکەرەوەی ماڵان، هەمان ئەو گازی LPG نین کە لە وڵاتی خۆمان بەکاردەهێنرێن. سیستەمی غازی وڵاتی ئێران بەشێکی زۆری لە گازی میثان پێکدێت کە بێگومان گازی میثان وزەیەکی کەمتری تێدایە بەراورد بە گازی LPG.
۲- لایەنی ستانداردەکان بۆ جێگیرکردنی سیستەمە گازییەکان
کۆمەڵێک هۆکاری سەرەکی هەن کە کاریگەری نەرێنیان لەسەر سیستەمی غاز دروست کردووە لە وڵاتی خۆماندا:
- دانانی ئەم سیستەمانە بەبێ ڕەچاوکردنی ستانداردەکان.
- گوێنەدان بە ئامێرە و کەرەستە سەلامەتییەکان.
- ئەنجامنەدانی پشکنین و چاک نەکردنی کەموکورییەکان.
- کوالیتی ئەو گازەی بەکاردەهێنرێت.
- زیاد تێکردنی غاز بۆ ناو تەنکییەکان.
هەڵبەت ئەگەر گرنگی بە کوالیتی گازەکان و ستانداردەکان و ڕێکارەکان و ڕێنماییە سەلامەتییەکان بدرێت، ئەوکات سیستەمە غازییەکان بۆ بەکارهێنان گونجاون.
وەرگیراوە.
