14/12/2025
ووزەی گەراوە لە سیستمی سۆلارەوە بۆ تۆری کارەبای گشتی لە ووزەی بەکارهێنراو دەردەکرێت کە لە تۆری گشتی وەرگیراوە
ئەمانە و چەندین وەڵامی تر بۆ پرسیارەکان لەم پۆستەی بەرێوەبەرایەتی گشتی کارەبای سلێمانی باسکراون
🟠 پرسیارە باوەکان لەسەر سیستمی سۆلەر (Solar)
-----------------
🔶 سوودەکانی دانانی سیستمی سۆلەر
🔹 بە دانانی سیستمی سۆلەر، لە ڕۆژدا ووزەی پاک، بەردەوام، و خۆڕایی بەرهەم دەهێنیت بۆ خۆت.
🔹 زیادەی ووزەی بەرهەمهاتوو دەگەڕێنیتەوە بۆ تۆڕی کارەبای نیشتمانی.
🔹 لە ڕێگەی ووزەی گەڕاوەی سۆلەرەکەت دەتوانیت قەرزی کۆنی کارەبا پاکتاو بکەیت.
🔹 پاش پاکتاوکردنی قەرزەکان، زیادەکە وەک ڕەسید لەلای حکومەت تۆمار دەبێت.
🔹 سیستمی ئۆن-گرد ، دوای کەمتر لە (3) ساڵ تێچووی خۆی دەردەكاتەوە.
______________
🔶 سوودی تۆمارکردنی فۆرمی سۆلەر.
🔹 ووزەی گەڕاوەی سۆلەر لە ووزەی سەرفکراو دەردەکرێت لەسەر پسووڵە.
🔹 ئەوەی دەمێنێتەوە دەکرێت بە پارە.
🔹 ئەگەر ووزەی زیاترت گەڕاندبێتەوە، لە قەرزی پێشووت دائەشکێنرێت ئەگەر (قەرزی کۆن بێت یان قەرزی تازەی دوای پرۆژەی ڕووناکی بێت کەمی دەکاتەوە).
🔹 ئەگەر قەرزداری کارەبا نەبوویت، دەبێت بە ڕەصید.
🔹 ئەگەر پارەدان بە شێوەی پریپەید (پێشەکی) بوو، لا دەبرێت و دەکرێتەوە بە پۆست پەید (بە پسووڵە).
🔹 سنوورداری ئەمپێری لەسەر لا دەبرێت.
🔹 حکومەت بە سوپاسەوە هاوکارت دەبێت لە ئەژمارکردنی ووزەی گەڕاوە بۆ تۆڕی نیشتمانی.
🔹 پێویست بە پاکتاوکردنی قەرزەکان ناکات بۆ پڕکردنەوەی فۆرمی سۆلەر.
______________
🔶 پێویستیەکانی پڕکردنەوەی فۆرمی سۆلەر؟
بۆ پڕکردنەوەی فۆرمی سۆلەر، دەبێت:
1️⃣ پێوەرەکەت زیرەک بێت و لەسەر پسووڵەی کارەباکەت ژمارەی پێوەری زیرەکەکەت تۆمار بێت.
2️⃣ نوێترین وەرەقەی کارەبا بهێنیت.
3️⃣ زانیارییەکانی سیستمی سۆلەرەکەت (ژمارەی پەناڵ، توانای پەناڵ، توانای ئینڤێرتەر، و توانای باتری ئەگەر هەبێت) بهێنیت.
4️⃣ ژمارەی سەر محولە و فیدەری گەڕەکەکەت بهێنیت (کە لەسەر پلێتێکی شینە بە ستوونی محولەکەوەیە).
5️⃣ داتای لۆکەیشنی شوێنەکە بە (GPS) پێت بێت.
6️⃣ سەردانی بەڕێوەبەرایەتی دابەشکردنی کارەبای ڕۆژهەڵات یان ڕۆژئاوا بکەیت بەپێی هەڵکەوتەی جوگرافی شوێنەکەت.
______________
🔶 پێوەرەکان و گەڕانەوەی ووزەی سۆلەر
کام پێوەر ووزەی گەڕاوەی سۆلەر تۆمار دەکات؟
🔹 پێوەری زیرەک.
🔹 هەندێک پێوەری میکانیکی: تەنها ئەو پێوەرانەی کە دیسکەکەی ناوی دەتوانێت پێچەوانە بسوڕێتەوە، وەک پێوەری مارکەی (ئەسکرا). لەم ڕێگەیەوە ووزەی سەرفکراو کەم دەکاتەوە.
کام پێوەرانە نابێت بەکار بهێنرێت لەگەڵ سیستمی سۆلەر؟
🔹 هەموو ئەو پێوەرە ئەلکترۆنیانەی یەک ڕەوگەن، وەک مۆدێل کۆنی مارکەکانی (کۆهلەر، لونا، بایلان...هتد)، چونکە ووزەی گەڕاوەی سۆلەر وەک سەرفیات تۆمار دەکات نابێت بەکاربێت.
🔹 پێوەری میکانیکی کە دیسکەکەی ناگەڕێتەوە، وەک مارکەی پاڤاڵ...هتد، چونکە لەکاتی گەڕانەوەی ووزەی سۆلەر دیسکەکەی دەوەستێت نابێت بەکاربێت.
🔹 هەر پێوەرێک کە لەکاتی گەڕانەوەی ووزەی سۆلەر خوێندنەوەکەی زیاد بکات نابێت بەکاربێت.
پرسیارە پەیوەندیدارەکان:
🔹 ئایا پێوەری ئەلکترۆنی مارکەی ئەسکرا کە زیرەک نییە، ووزەی سۆلەر تۆمار دەکات؟
🔹 بەڵێ، تۆماری دەکات، بەڵام وەک پێوەری زیرەک ناینێرێتەوە بۆ بەڕێوەبەرایەتی کارەبا. بۆیە پێویستە پێوەری زیرەک دابنێیت .
🔹 ئەگەر سۆلەرم دانابوو و پێوەرەکەم زیرەک نەبوو، دەتوانم فۆرمی سۆلەر پڕ بکەمەوە؟
🔹 نەخێر لە ئێستادا داوای دانانی پێوەری زیرەک بکە لە بەشی فرۆشتنی ووزە. پاش دڵنیابوون لە تۆماربوونی لەسەر پێوەرە زیرەکەکە، فۆرمی سۆلەرت بۆ پڕ دەکرێتەوە .
______________
🔶 شێوازی ئەژمارکردنی نرخی ووزەی سۆلەر لەلایەن حکومەتەوە
🔹 نرخی ووزەی گەڕاوەی سۆلەر هەمان نرخی پرۆژەی ڕووناکییە .
🔹 ووزەی گەڕاوە لە ووزەی سەرفکراو دەردەکرێت . ئەوەی کە دەمێنێتەوە بە (سالب یان موجەب) دەکرێت بە پارە:-
🔹 ئەگەر پارەکە سالب بوو: لە قەرزی کۆن یان تازە کەم دەکاتەوە یان دەبێت بە رصید .
🔹 ئەگەر پارەکە موجەب بوو: پێویستە هاوڵاتی پارەکە تسلیمی دائرە بکات .
______________
🔶 چەند پرسیارێکی تر
🔹 ئایا حکومەت هیچ باجێک دەخاتە سەر سیستمی سۆلەر؟
🔹 نەخێر، بەڵکو هاوکارت دەبێت لە ئەژمارکردنی ووزەی گەڕاوە بۆ تۆڕی نیشتمانی .
🔹 دەتوانم ووزەی سۆلەر بگەڕێنمەوە پێش پڕکردنەوەی فۆرمی سۆلەر؟
🔹 بەڵێ، بە دڵنیاییەوە دەتوانیت سیستمی سۆلەرەکە دابنێیت و بیبەستیت لە تۆڕی کارەبای نیشتمانی و ووزەی سۆلەر بگەڕێنیتەوە، پاشان فۆرمی سۆلەر پڕ بکەرەوە .
🔹 دەتوانم ووزەی گەڕاوەی سۆلەر لە هاوبەشێکەوە بگوازمەوە بۆ هاوبەشێکی تر؟
🔹 لە ئێستادا کاری گواستنەوەی ووزەی سۆلەر ناکرێت .
🔹 لە دوای دانانی سیستمی سۆلەر پێوەری زیرەکەکەم دەکوژێتەوە؟
🔹 هۆکاری کوژانەوەی پێوەری زیرەک ئەوەیە کە تەزووی گەڕاوەی سۆلەر یان تەزووی بارگاویکردنی باتری زیاترە لە سنووری پێوەرە زیرەکەکەت . ئەمەش دوای تۆمارکردنی فۆرمی سۆلەر لە بەشی پێوەری زیرەک چارەسەر دەکرێت .
ئەندازیار : چالاک عبدالکریم حسن
