04/01/2026
قبل فترة يا إخوان .. وأنا في حسبة وسط البلد بشتري أغراض ..
اجاني شب .. تقريبا ثلاثيني .. قالي بدك أشيل عنك الأغراض ..
قلتله ماشي .. وين عربايتك ؟؟
قالي ما معاي عرباية .. بس ما عليك أنا بشيلهم ..
أنا هون اختلطت المشاعر عندي ..
هو عامل حاله مسكين لهاي الدرجة مشان الإستعطاف .. ولا هو بده يحمل الأعراض ويهرب .. ولا فعلا ما معاه حق عرباية !!
المهم .. قلتله ماشي .. احملهم .. وصرت الف بالحسبه وأشتري .. وهو يشيلهم .. وأنا عين على بسطة الخضار .. وعين عليه علشان إذا شرد .. أزقطه ..
المهم .. خلصت المشتريات .. ومشي معاي بإتجاه موقف السيارات ..
واحنا بالطريق .. قلتله معاك سيجارة .. (مع اني ما بدخن ) .. قالي لا والله أنا ما بدخن ..
وبس وصلنا عند السيارة .. وبلش يحط الأغراض في الصندوق .. ناولته 5 دنانير ..
وبشكل عفوي وسريع بدون تفكير قالي : لأ .. هيك كثير .. قلتله بتستاهل ... ويعطيك العافيه ..
وفورا لمت حالي إني بالبداية ظنيت فيه السوء .. لأنه فعلا بحاجة الشغل .. ومش عامل حاله مسكين .. ولا نيته يفل بالأغراض ..
سألته .. ليش ما معاك عرباية ّ.. مهي مش غالية ..
قالي كنت أشتغل في إحدى المطاعم .. ومع المقاطعة خلصوني من الشغل .. وما معاي حقها .. ولسه مو ملاقي شغل .. لحتى الله يفرجها .. وهيني بترزق ..
أخذت تلفونه .. وقلتله أنا رح أساعدك بشغل ..
والحمد لله وعن طريق أولاد الحلال .. هيو بشتغل وأموره ممتازه ..
القصد يا إخوان .. هاي الناس اللي بتدور على الرزق والسترة بدون ما تستنى حدا يساعدها .. هم اللي فعلا بستحقوا المساعدة ..
ما في إشي إسمه مش ملاقي شغل ..
في شغل ويمكن متعب .. ويمكن يكسر ظهرك .. بس أكيد ما بكسر عينك ..
