14/06/2025
You’re welcome
នៅប៉ុន្មានម៉ោង មុន ការចរចាគណៈកម្មការព្រំដែនរួម កម្ពុជា-ថៃ (JBC) ចាប់ផ្ដើម នៅព្រឹកថ្ងៃសៅរ៍នេះ ឧត្តមសេនីយ៍ ប៊ូនស៊ីន ប៉ាកខ្លាង (Boonsin Padklang) មេបញ្ជាការកងទ័ពជើងគោក ប្រចាំភូមិភាគ២ របស់ថៃ បានចេញមុខនិយាយក្ដែងៗថា «នេះគឺជាទឹកដីរបស់ខ្ញុំ, ប្រសិនបើអ្នកចង់បាន មានតែវាយប្រយុទ្ធគ្នា»។ មេទ័ពថៃរូបនេះ ថែមទាំងបានបញ្ជាក់ទៀតថា ប្រទេសថៃ នឹងមិនព្រមជាមួយកម្ពុជា ទៅតុលាការយុត្តិធម៌អន្តរជាតិ (ICJ) ជាដាច់ខាត ពីព្រោះភាគីទាំងពី ត្រូវតែមានការព្រមព្រៀងគ្នា ដើម្បីនាំយកសំណុំរឿងនេះទៅតុលាការ ICJ ករណីបើភាគីណាមួយមិនព្រមទេ នោះតុលាការ ICJ នឹងមិនពិចារណា លើករណីនេះឡើយ ហើយរាជរដ្ឋាភិបាលថៃ នឹងប្រើប្រាស់វិធីនេះ។ នេះបើយោងតាមប្រភពព័ត៌មានថៃ Khaosod។
យោងតាមប្រភពព័ត៌មានដដែលនេះ មេទ័ពថៃ ដែលកាន់ការខុសត្រូវលើបញ្ហាព្រំដែនរវាងកម្ពុជា និងថៃដដែលនេះ បាននិយាយទៀតថា «ដូច្នេះ កុំបារម្ភអំពីរឿងទៅតុលាការ ICJ។ ខ្ញុំបានប្រាប់រាជរដ្ឋាភិបាលរួចហើយថា គ្មានការចាំបាច់ត្រូវទៅតុលាការ ICJ ឡើយ។ វាមិនពាក់ព័ន្ធគ្នាទេ។ ដីនេះជារបស់យើងតាំងពីយូរមកហើយ។ ប្រសិនបើពួកគេចង់បាន គឺមានតែវាយគ្នា ហើយនោះ គឺជាចំណុចចុងក្រោយ វាមិនពិបាកនោះទេ។ ប្រសិនបើពាក្យនេះ លឺទៅដល់ ហ៊ុន សែន គាត់នឹងឆ្លើយតបភ្លាមៗមកទៀតហើយ។»។
យ៉ាងណាក៏ដោយចុះ បើតាមរាជរដ្ឋាភិបាលកម្ពុជា បានអះអាងជាច្រើនលើកច្រើនសាររួចហើយថា ករណីជម្លោះព្រំដែននេះ ទោះបីជា ភាគីថៃ ព្រម ឬ មិនព្រមក្ដី ក៏កម្ពុជានៅតែនាំយកសំណុំរឿង តំបន់មុំបី, ប្រាសាទតាមាន់ធំ, ប្រាសាទតាមាន់តូច និង ប្រាសាទតាក្របី ទៅកាន់តុលាការយុត្តិធម៌អន្តរជាតិ ពោលគឺ កម្ពុជានឹងដាក់ពាក្យប្ដឹងទៅតុលាការ ICJ តែម្ដង ប្រសិនបើថៃមិនព្រម។
តាមការគូសបញ្ជាក់របស់នាយករដ្ឋមន្ត្រីកម្ពុជាសម្តេចធិបតី ហ៊ុន ម៉ាណែត ការបញ្ជូនលិខិតផ្លូវការទៅតុលាការ ICJ នឹងធ្វើឡើងនៅថ្ងៃទី ១៥ ខែមិថុនា ឆ្នាំ២០២៥ ពោលគឺ នៅមួយថ្ងៃបន្ទាប់ពី កិច្ចប្រជុំ គណៈកម្មការព្រំដែនរួម កម្ពុជា-ថៃ (JBC)។
