24/03/2026
ຮອງນາຍົກສະເໜີ ໂຄງການກໍ່ສ້າງທາງລົດໄຟ ລາວ-ຫວຽດນາມ ຊ່ວງທີ 1 ແຕ່ ຕົວເມືອງທ່າແຂກ ແຂວງຄໍາມ່ວນ ຫາ ມູຢ່າ (ຊາຍແດນລາວ-ຫວຽດນາມ) ຕໍ່ສະພາແຫ່ງຊາດເພື່ອພິຈາລະນາ ແລະ ຮັບຮອງດ້ານຫຼັກການ.
---------------
ກອງປະຊຸມ ຄັ້ງປະຖົມມະລືກ ຂອງສະພາແຫ່ງຊາດຊຸດທີ 10 ໃນວັນທີ 24 ມີນາ 2026, ທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີ ໃນນາມ ປະທານຄະນະກໍາມະການສົ່ງເສີມ ແລະ ຄຸ້ມຄອງການລົງທຶນ, ປະທານ ຄະນະກໍາມະການຊີ້ນໍາລະດັບຊາດ ໂຄງການກໍ່ສ້າງທາງລົດໄຟ ລາວ-ຫວຽດນາມ, ຕາງໜ້າລັດຖະບານ ໄດ້ລາຍງານ ກ່ຽວກັບໂຄງການພັດທະນາເສັ້ນທາງລົດໄຟ ລາວ-ຫວຽດນາມ ຊ່ວງທີ 1 ແຕ່ ຕົວເມືອງທ່າແຂກ ແຂວງຄໍາມ່ວນ ຫາ ມູຢ່າ (ຊາຍແດນລາວ-ຫວຽດນາມ) ໄລຍະທາງ 147 ກິໂລແມັດ ໃນຮູບແບບ BOT.
ທ່ານຮອງນາຍົກ ກ່າວວ່າ: ໂຄງການພັດທະນາເສັ້ນທາງລົດໄຟລາວ-ຫວຽດນາມ ຖືເປັນໂຄງການຍຸດທະສາດທີ່ສຳຄັນທາງດ້ານການເຊື່ອມໂຍງເຊື່ອມຈອດຂອງປະເທດ ທີ່ນອນໃນແຜນພັດທະນາເສດຖະກິດແລະສັງຄົມແຫ່ງຊາດ 5 ປີຄັ້ງທີ X ໄລຍະ 2026-2030 ເຊິ່ງເປັນໂຄງການທີ່ລັດຖະບານລາວ ແລະ ຫວຽດນາມ ໃຫ້ການສະໜັບສະໜູນ ແລະ ໄດ້ຖືກບັນຈຸເຂົ້າໃນບັນໂຄງການບູລິມິສິດຂອງກອງປະຊຸມຮ່ວມມືທະວີພາຄີ ລະຫວ່າງລັດຖະບານ ລາວ ແລະ ຫວຽດນາມ ແຕ່ປີ 2021 ເປັນຕົ້ນມາ, ພ້ອມທັງສອດຄ່ອງກັບແຜນການເຊື່ອມໂຍງຕາມແລວທາງເສດຖະກິດຕະເວັນອອກ-ຕາເວັນຕົກ ຕາມນະໂຍບາຍໃນການຫັນຈາກປະເທດບໍ່ມີຊາຍແດນຕິດທະເລ ກາຍເປັນປະເທດຈຸດໃຈກາງເຊື່ອມໂຍງ-ເຊື່ອມຈອດ ກັບພາກພື້ນ ແລະ ສາກົນ.
ຜ່ານມາ ກອງປະຊຸມລັດຖະບານ ເປີດກວ້າງ ຄັ້ງທີ II ປະຈຳປີ 2025 ໄດ້ປຶກສາຫາລື ແລະ ພິຈາລະນາກ່ຽວກັບໂຄງການດັ່ງກ່າວ, ຊຶ່ງລັດຖະບານ ໄດ້ເຫັນດີຮັບຮອງດ້ານຫຼັກການ, ພ້ອມນັ້ນ ໄດ້ລາຍງານຕໍ່ ກອງປະຊຸມກົມການເມືອງ ຮ່ວມກັບ ຄະນະເລຂາທິການສູນກາງພັກ ຄັ້ງວັນທີ 15 ມັງກອນ 2026 ແລະ ໄດ້ຮັບການຕົກລົງເຫັນດີ ແລະ ມີທິດຊີ້ນຳໃນບາງບັນຫາແລ້ວ. ສະນັ້ນ, ເພື່ອເປັນການອຳນວຍຄວາມສະດວກໃຫ້ໂຄງການດັ່ງກ່າວ ໄດ້ດຳເນີນການຈັດຕັ້ງປະຕິບັດ, ລັດຖະບານ ຈຶ່ງສະເໜີມາຍັງກອງປະຊຸມ ຄັ້ງປະຖົມມະລຶກຂອງສະພາແຫ່ງຊາດ ຊຸດທີ X ເພື່ອຮັບຮອງດ້ານຫຼັກການ.
ໂຄງການທາງລົດໄຟ ລາວ-ຫວຽດນາມ ເລີ່ມຈາກ ນະຄອນຫຼວງວຽງຈັນ ຫາ ທ່າເຮືອຫວຸ້ງອ່າງ ສສ ຫວຽດນາມ ມີໄລຍະທາງທັງໝົດປະມານ 562 ກິໂລແມັດ, ແບ່ງອອກເປັນ 3 ຊ່ວງໄລະຍະ ຄື:
1. ຊ່ວງທີ 1A: ແຕ່ ຕົວເມືອງທ່າແຂກ ຫາ ມູຢ່າ ຊາຍແດນລາວ-ຫວຽດນາມ ມີຄວາມຍາວ 147 ກມ ຊຶ່ງໄດ້ເລີ່ມຕົ້ນຈາກການເຊັນບົດບັນທຶກຄວາມເຂົ້າໃຈ (MOU) ກັບບໍລິສັດ ປີໂຕຣລ້ຽມເທຣດດິ້ງລາວ ມະຫາຊົນ ເພື່ອສຶກສາສຳຫຼວດ ແລະ ອອກແບບລະອຽດໂຄງການ ໃນວັນທີ 15 ຕຸລາ 2019;
2. ຊ່ວງທີ 1B ແຕ່ ມູຢ່າ ແຂວງ ກວາງບິ່ງ ຫາ ທ່າເຮືອຫວຸ້ງອ່າງ ແຂວງຮ່າຕິ່ງ ໄລຍະທາງ 103 ກມ,ບໍລິສັດ ປີໂຕຣລ້ຽມເທຣດດິ້ງລາວ ມະຫາຊົນ ໄດ້ເຊັນບົດບັນທຶກຄວາມເຂົ້າໃຈ (MOU) ກັບບໍລິສັດຫຸ້ນສ່ວນກຸ່ມເດວກາ (DEOCA Group Joint Stock Company) ຄັ້ງວັນທີ 28 ຕຸລາ 2022 ເພື່ອສຶກສາຄວາມເປັນໄປໄດ້ຂອງໂຄງການ ເຊິ່ງປະຈຸບັນກຳລັງດຳເນີນບັນດາຂະບວນການອະນຸມັດຢູ່ໃນ ສສ ຫວຽດນາມ ຕາມລະບຽບການ.
3. ຊວງທີ 2 ແຕ່ ນະຄອນຫຼວງວຽງຈັນ ຫາ ຕົວເມືອງທ່າແຂກ ແຂວງຄໍາມ່ວນ ໄລຍະທາງ 312.8 ກມໄດ້ເຊັນບົດບັນທຶກຄວາມເຂົ້າໃຈ (MOU) ກັບບໍລິສັດ ປີໂຕຣລ້ຽມເທຣດດິ້ງລາວມະຫາຊົນ ຄັ້ງວັນທີ 29 ມິຖຸນາ 2022. ປະຈຸບັນໄດ້ຮັບການເຫັນດີດ້ານຫຼັກການໃຫ້ຕໍ່ MOU ໂຄງການດັ່ງກ່າວຕື່ມເພື່ອໃຫ້ມີເວລາໃນການສຶກສາຄວາມເປັນໄປໄດ້ຢ່າງລະອຽດ ແລະ ຮອບດ້ານ.
ໂຄງການທາງລົດໄຟ ແຕ່ ຕົວເມືອງທ່າແຂກ ແຂວງຄຳມ່ວນ ຫາ ມູຢ່າ (ຊາຍແດນ ລາວ-ຫວຽດນາມ) ໄລຍະທາງ 147 ກິໂລແມັດ;ຄູ່ສັນຍາ: ລັດຖະບານ ແຫ່ງ ສປປ ລາວ ຕາງໜ້າໂດຍ ຄະນະກຳມະການສົ່ງເສີມ ແລະ ຄຸ້ມຄອງການລົງທຶນ (ລັດຖະບານ) ກັບ ບໍລິສັດ ທາງລົດໄຟ ລາວ-ຫວຽດນາມ ຈຳກັດ (ບໍລິສັດໂຄງການ);ຜູ້ພັດທະນາ: ບໍລິສັດ ປີໂຕຣລ້ຽມເທຣດດິ້ງ ລາວ ມະຫາຊົນ (ປີໂຕຣເທຣດ).ຮູບແບບການລົງທຶນ: ກໍ່ສ້າງ, ດຳເນີນງານ ແລະ ມອບໂອນ (BOT); ຄາດຄະເນມູນຄ່າການລົງທຶນທັງໝົດ: 1,339 ລ້ານໂດລາສະຫະລັດ; ອາຍຸສໍາປະທານ: 50 ປີ ນັບແຕ່ມື້ໃຫ້ການບໍລິການເປັນຕົ້ນໄປ (COD) ແລະ ສາມາດສະເໜີຄຳຮ້ອງການຂໍຕໍ່ອາຍຸສຳປະທານ ກ່ອນມື້ສິ້ນສຸດສັນຍາສຳປະທານ ສາມປີ.
ດ້ານເຕັກນິກ ລົດໄຟເປັນລາງມາດຕະຖານ ສາກົນ 1.435 ແມັດ(ຄືທາງລົດໄຟລາວຈີນ, ຄວາມໄວການອອກແບບຂົນສົ່ງໂດຍສານ 150 ກມ /ຊມ ແລະ ຂົນສົ່ງສິນຄ້າ 80 ກມ/ຊມ)
-----------
ທ່ານສາມາດຕິດຕາມຂໍ້ມູນ-ຂ່າວສານອື່ນໆໄດ້ອີກທີ່ເວັບໄຊ: https://laoedaily.com.la/
ຫຼື ກົດຕິດຕາມຮັບຊົມໄດ້ກ່ອນໃຜທີ່: https://www.youtube.com/
ຕິກຕັອກ: https://www.tiktok.com/
#ຂ່າວເສດຖະກິດການຄ້າ
#ເສດຖະກິດການຄ້າ
