12/04/2026
වැනිලා මල් හැලීම රෝගයක් නොවේ....
වැනිලා මල් හැලීම බහුලවම මේ දිනවල දැකිය හැකි තත්වයකි. දිගු කාලයක් තිස්සේ පැවති වියලි කාලගුණය හේතුවෙන් බොහෝ කල් ආතතියට ලක් වූ වැනිලා වැල් වර්ෂාවත් සමඟ මේ දිනවල මල් පිපීම ආරම්භ වී ඇත. පෙර වසර වලට වඩා, මෙම වසරේ වැනිලා වැල්වල වැඩිපුර මල් අංකුර ප්රමාණයක් දැකිය හැකිය. ශාකයට දරාගත හැකි සීමාවට වඩා වැඩිපුර මල් ප්රමාණයක් හටගෙන ඇති නිසා එම වැඩිපුර මල් ප්රමාණය ශාකයෙන් ඉවත් කර ගැනීම ස්වභාවිකව ද සිදුවේ.
එසේම, අධික වියලි කාලගුණය දීර්ඝ කාලයක් තිස්සේ පැවතීමත්, ඉන්පසුව කඩින් කඩ ලැබුණු සුළු වර්ෂාපතනයත් නිසා මල් හට ගැනීම උත්තේජනය වුවද, හටගත් මල් වර්ධනය කර ගැනීමට හා ඒවා පරාගනය කර පවත්වා ගැනීමට තරම් මේ දිනවල පාරිසරික සාධක ප්රශස්ත මට්ටමේ නොමැති වීමෙන් මෙම මල් වියළී හැලී යාම සිදුවේ. මෙහිදී අධික උෂ්ණත්වය හා අධික හිරු එළිය මෙම මල් හැලීම කෙරෙහි ඉතාමත් අහිතකර ලෙස බලපා ඇත. වැනිලා මල් උෂ්ණත්වය කෙරෙහි අධි සංවේදීතාවයක් පෙන්වයි. ඒවායේ සියුම් පටක අධික උෂ්ණත්වය නිසා වියළී යාමෙන් අක්රීය තත්ත්වයට පත්වේ. මේ නිසා උෂ්ණත්වය සහ හිරු එළිය මගින් මල් වේලීම වළක්වා ගත යුතුය.
හටගෙන ඇති මල් වලින් බොහෝ ප්රමාණයක් ඉතිරි කර ගැනීම සඳහා අපට සිදු කළ හැකි සරල ශෂ්ය විද්යාත්මක ක්රියාකාරකම් කිහිපයක් පවතී. හැකි ඉක්මනින් මෙම ක්රියාකාරකම් නිසි ආකාරයෙන් සිදු කිරීම මගින් මෙම මල් හැලීම යම්තාක් දුරකට අඩු කරවා ගත හැක. එමෙන්ම, පරාගනය කරගත් මල් වලින් උසස් ගුණාත්මයෙන් යුතු කරල් නිෂ්පාදනය කර ගැනීම සඳහා මෙම ක්රියාකාරකම් බොහෝ සෙයින් වැදගත් වේ. ඒවා පහත පරිදි වේ.
1. සෙවන කප්පාදුව නතර කර, අධික හිරු එළිය වැටීම වළක්වා ගනිමින්, වැල් වලට කෘතීම සෙවණක් හෝ ලබාදීම.
2. පාංශු තෙතමනය යහපත් තත්ත්වයක පවත්වා ගැනීම, මේ සඳහා අතිරේකව ජල සම්පාදනය සිදුකිරීම.
3. පස වියළී යාම වැළැක්වීම සඳහා, වැල් පාමුලට දිරා ගිය කොළරොඩු, ගොම හා පිදුරු වැනි කාබනික ද්රව්ය එකතු කිරීම මගින් වසුනක් පවත්වා ගැනීම.
4. හැකිනම් කාබනික වසුන තුළට ගැඩවිලුන් හඳුන්වාදීම මගින් පාංශු තත්වය වැඩිදියුණු කර පවත්වා ගැනීම.
5. පුෂ්ප මංජරි මත ඇතිවන කුහුඹුවන්ගේ හා අනෙකුත් විලෝපිකයන්ගේ කැදලි ඉවත් කර පුෂ්ප නිරෝගීව පවත්වා ගැනීම. අවශ්ය නම් මේ සඳහා ප්රතිකාර සිදුකිරීම.
5. වැල් පාමුල වැඩිපුර ජලය හොඳින් බැස යන ආකාරයට සකසා ගැනීම.
6. අධික රශ්මිය නිසා පුෂ්ප වියලියාම සිදුවේ නම්, උදය කාලයේදී වැල් මතට ප්රවේසමෙන් ජලය යෙදීම සිදුකළ හැකිය. මෙහිදී පුෂ්ප වලට හානි සිදු නොවීමට හා පරාග සේදී නොයාමට වගබලා ගත යුතුය.
7. පුෂ්ප ඇතිවන සමයේදී හා පුෂ්ප වර්ධනය වන මේ සමයේදී කිසිදු ආකාරයේ ආතතියකට ලක් නොකොට වැල් තබාගත යුතුය.
ඔබගේ වැනිලා වගාවේ මල් ආරක්ෂා කරගනිමින්, පරාගනය කරගනිමින් හොඳ අස්වැන්නක් ලබා ගැනීම සඳහා මෙම පිළිවෙත් අනුගමනය කරන්න.
ආචාර්ය ලක්ෂ්මන් කුමාර ගමගේ
නියෝජ්ය අධ්යක්ෂ (පර්යේෂණ)
අංශ ප්රධානී, ශෂ්ය විද්යා අංශය
මධ්යම පර්යේෂණ මධ්යස්ථානය
අපනයන කෘෂිකර්ම දෙපාර්තමේන්තුව
මාතලේ.
0662222945
KVGA
මාධ්ය අංශය
0718195565
