20/06/2020
السلام عليكم .
بعض المعلومات تقدر تحتاجها حول cnss الكل كايعرفها ولكن كاين اللي ماعارفهاش ماشي كولشي كايفهم داكشي اللي كاتفهم
#يلا طلع ليك فالديكلارسيون 0 يوم 0 صالير راه ماشي 100% ديكلاراك باش تستافد من التعويض حيت يقدر يكون ديكلاراك غير فضمانكم اما السيت ديال كوفيد لا لهذا تأكد
#يلا سمعتي باللي التعويض خرج وماعطيتيهمش الريب ديالك تاصل بالمجيب الالي غادي يعطيك الكود ديال وضع رهن الاشارة وسير لوفاكاش ودي معاك داك الكود ولاكارط ناسيونال ها رقم المجيب اللي رخيص عيط غير بالدقايق 0522419800
#يلا خرجتي عند الطبيب تأكد باللي كاشا ليك الضوسي ودار ليك الرقم الإستدلالي الوطني inpe حيت يقدرو يرجعو ليك الضوسي على هاد الرقم يلا ماكاينش ويعطيك الفاكتورة وكذلك بالنسبة الصيدليات و المختبرات
#يلا دفعتي الضوسي ديال التطبيب وكتبو ليك DF يعني راه ماعندكش التغطية الصحية واخا كايبان ليك الديكلارسيون ديال النقط طالع راه كاينين الشركات اللي كايتملصو من ديك النسبة ديال 4,11% اللي كايخلص عليك حيت ماشي إجبارية عليه يقدر يݣوليه داير ليه التغطية الصحية عند لاصورانص
#يلا كتبو ليك dossier traité يعني راه الضوسي ديالك تعالج ومن بعد نهار ولا يومين كايطلع ليك شحال رجعو ليك فبلاصت ديك montant
#يلا كتبو ليك mise a disposition يعني راه مادفعتيش ليهوم شهادة بنكية rib كايصيفطو ليك واحد الورقة الدار بمثابة شيك كاتديها البانكة وكاتشد رزقك ويلا ماوصلاتكش سير جيبها عندهوم
#يلا كتبو ليك envoyer a l'assurer عرف باللي صيفطو ليك الفلوس الحساب ديالك
#يلا كتبو ليك dossier rejeter الضوسي ديالك ترفض مافيكش شي شرط من الشروط باش تستافد
#يلا كتبو ليكdossier retourner a l'assuré عرف باللي الضوسي ديالك رجعوه ليك خصو شي كاشي ولا شي ورقة ولا شي فاكتورة ولا شي تاريخ غالط ... كايصيفطوه ليك الدار كايجيبو ليك الفاكتور وصلحو وعاود دفعو
#يلا بغيتي تعرف باللي عندك التغطية الصحية دخل من غوغل اللي ماعارفش يدخل من هاد السطر زرق وكايدخل رقم التسجيل ديالو والمودپاس يلا لقيتي droit amo fermé راه ماعندكش لقيتي ouvert راه عندك وكايديرو ليك التاريخ الصلاحية
https://www.cnss.ma/Portail_cnss/
#باش تخلص على ولادك خصك عل الأقل 18 يوم فالشهر والصالير مايكونش قل من 1620 درهم فالشهر أما بالنسبة اللي خدام فالقطاع الفلاحي 1142 درهم فالشهر
#السميك حاليا داير 2698 درهم أما بالنسبة للقطاع الفلاحي داير 1903 دراهم
#العيالات فاش تݣلسي من الخدمة بغيتي تولدي ماتنسايش دفعي إشعار بالإنقطاع عن العمل فقل من شهر من نهار ݣلستي من الخدمة باش ماتزرفيش ف 98 يوم ديال الأمومة
#النسبة اللي كايقطعو ليك من الخلصة هي %4,48 ديال cnss و%2,26 ديال التغطية الصحية وكايخلص عليك الپاترون فالمجموع %21,09 وكاين اللي عندو إقتطاعات أخرى بحال التأمين التكميلي والضريبة على الدخل
#يلا داير التأمين الإختياري يعني كاتخلص على راسك راه ماكاتخلصش على الدراري كاتستافد غير من التغطية الصحية والنقط وأقل خلاص فالتأمين الإختياري هو كاتخلص على راسك 1410 دراهم كل 3 أشهر وكاديكلاري راسك بالسميك 2698 درهم
#صحاب كونترا أنابيك راه ماكاتستافد لا من النقط ولا من الديكلارسيون ديال الصالير ولا فلوس الدراري ولا من عطلة الأمومة كاتستافد غير من التغطية الصحية فقط حيت نتا ف نظر القانون غير سطاجير وخا عندك مؤهلات كايبغيو يحرثو عليك ديك 24 شهر فابور والدولة كاتعاونهم فيك.
La Caisse Nationale de Sécurité Sociale
