07/07/2026
نصيحة للمقبلين على البناء أو تجديد منازلهم:
ما تعطيش دارك لأي مقاول قبل ما تتأكد أنه عندو فريق ديالو كيخدم معاه، وكيشرف عليهم بنفسو ويتابع الأشغال من البداية حتى النهاية.
للأسف، كاينين بعض السماسرة اللي عندهم غير حلاوة اللسان، كيشدّو المشاريع على أساس أنهم محترفين وعندهم فريق عمل، ومن بعد كيدوزو الخدمة لحرفيين آخرين بثمن طايح بزاف باش يربحو الفرق. وفي الأخير، مول الدار كيكون خلص مبلغ كبير على أساس خدمة احترافية، ولكن الواقع كيكون مختلف، وكيقدر يتعرض للنصب.
هاد المشكل كيبان أكثر في مجال الكهرباء، لأن أغلب العيوب كتكون مدفونة داخل الجدران، وما كيبانوش حتى من بعد مدة، ووقتها الإصلاح كيكون مكلف وصعيب.
حتى الحرفيين خاصهم ما يقبلوش يخدمو مع هاد النوع ديال الوسطاء، لأنهم كيدوزو الخدمة بأثمنة منخفضة بزاف، وكيضغطو عليهم في الجودة، وأحيانًا حتى ملي كيساليو الخدمة ما كيتخلصوش في الوقت، أو كيبقاو يجريو ورا فلوسهم.
باش يكون قطاع البناء نزيه، خاص كل واحد يخدم بثمن عادل ويقدم خدمة متقنة. الجودة والاحترافية كيبقاو هما الاستثمار الحقيقي، سواء لمول الدار أو للحرفي.
