Mega Kyaw Construction Co., Ltd.

Mega Kyaw Construction Co., Ltd. "Build For Your Better Future"

14/02/2026

လူတစ်ယောက်ဟာ သူမကြာခဏ တွေ့နေကျ သူ​တောင်းစားတစ်ယောက်ကို လတိုင်း ဒေါ်လာ ၁၀၀၀ ပေးလေ့ရှိပါတယ်။

ဒီလိုနဲ့ သူဟာ ကြာလာတော့ တစ်နေ့မှာ သူ​တောင်းစားကို ဒေါ်လာ ၇၅၀ ပဲ ပေးလိုက်ပါတယ်။

သူတောင်းစားက အံ့သြသွားပေမယ့် သူ့စိတ်ထဲမှာ... "၇၅၀ က ဘာမှမရတာထက်တော့ တော်သေး တာပေါ့" လို့ တွေးပြီး ထွက်သွားပါတယ်။

တစ်လကြာပြီးနောက် ထိုလူဟာ သူတောင်းစားကို ဒေါ်လာ ၅၀၀ ပဲ ပေးလိုက်ပါတယ်။

သူတောင်းစားက အံ့သြသွားပြီး ထိုလူကို မေးလိုက်ပါတယ်၊

"​မောင်ရင်က အရင်တုန်းကတော့ ကျုပ်ကို ဒေါ်လာ ၁၀၀၀ ပေးတယ်၊ ပြီးတော့ ၇၅၀ ဖြစ်သွားတယ်။ အခု ၅၀၀ ပဲပေးတယ်၊ ဘာကြောင့်လဲ?" လို့ မေးပါတယ်။

ထိုလူ ပြန်ဖြေလိုက်တာက ...

"အရင်တုန်းကတော့ ငါ့ကလေးတွေ ငယ်သေးတယ်၊ ငါလည်း စီးပွားရေးကောင်းတယ်၊ ဒါကြောင့် မင်းကို ဒေါ်လာ ၁၀၀၀ ပေးနိုင်တယ်။''

" အခုတော့ ငါ့သမီးက ကြီးလာပြီး တက္ကသိုလ်တက်ရတော့ ကုန်ကျစရိတ်တွေ များလာတယ်၊ ဒါကြောင့် မင်းကို ၇၅၀ ပဲ ပေးနိုင်တယ်။''

" အခု ငါ့သား နောက်တစ်ယောက် တက္ကသိုလ်တက်ရတော့ ကုန်ကျစရိတ်တွေ ပိုများလာတယ်၊ ဒါကြောင့် ၅၀၀ ပဲ ပေးနိုင်တော့တယ်" လို့ ဖြေလိုက်ပါတယ်။

သူတောင်းစားက ထိုလူကို မေးလေသည်။

"မင်းမှာ ကလေးဘယ်နှစ်ယောက်ရှိလဲ?"

ထိုလူက "လေးယောက်" လို့ ဖြေလိုက်ပါတယ်။

ထိုအခါသူတောင်းစားက...

"ဒါဆို မင်းက မင်း​မွေးထားတဲ့ကလေးတွေကို ငါ့ပိုက်ဆံနဲ့ ပညာသင်ပေးနေတာပေါ့..." လို့ ဟု ဒေါသတကြီးပြောလေသည်။

♥ကိုယ့်ရဲ့ ကြင်နာမှုနဲ့ ​အထောက်အပံ့ တွေကို သူရဲ့ ရပိုင်ခွင့်လို့ မြင်လာသောအခါ.. ကိုယ့်ရဲ့ ရက်ရောမှုကို မမြင်နိူင်ကြတော့ပါဘူး။

Saya U Khin Zaw ( ဘာသာပြန်)
Crd

08/02/2026

သူ့အလှူ
----------
ရွာတွင် ကိုကြီးမြင့်ဆိုသူသည် ကုန်စုံဆိုင်အကြီးကြီးဖွင့်ထားသည်။ သူက အသက် ၄၀ ကျော်မှ အိမ်ထောင် ကျသူဖြစ်သည်။ သူ့ဇနီးနှင့် ပဲခူးမြို့ကို ကုန်သွားဝယ်ရင်း တွေ့ဆုံချစ်ကြိုက်ပြီး လက်ထပ်ခဲ့ကြခြင်းဖြစ်သည်။ သူ့ဇနီးအမည်က မခင်ကျော့ဖြစ်သည်။ သူတို့တွင် သားလေးတစ်ယောက်သာရှိပြီး သူတို့သားလေးက ကျွန်တော့်ကျောင်းတွင် ဒုတိယတန်း၌ ပညာသင်ကြားနေသည်။

ကျွန်တော်က ကျောင်းလွှတ်ချိန်တွင် ကိုကြီးမြင့်အိမ်ဆိုင်ကိုသွားပြီး ချက်ပြုတ်ရန်အတွက် လိုအပ်သည့် ကုန်များကို ဝယ်တတ်သည်။ လကုန်ခါနီး ပိုက်ဆံပြတ်ချိန်ဆိုလျှင် ကိုကြီးမြင့်ဆိုင်တွင် အကြွေးမှတ်ခိုင်းထားပြီး ဝယ်ရသည်။ လကုန်လစာထုတ်ပြီးမှ ပြန်ဆပ်ရသည်။

တစ်နေ့ ကျွန်တော် သူ့ဆိုင်ကိုလာပြီး ဆန်နှင့် ဘဲဥအပြင် ရေနံဆီကိုပါ လာဝယ်သည်။ ထိုအချိန်တွင် အဝတ်အစား စုတ်စုတ်ပြတ်ပြတ်နှင့် လူတစ်ယောက်သည် ပလိုင်းတစ်လုံးလွယ်ကာ သူ့ဆိုင်ထဲကို ဝင်လာ သည်။ ထိုသူကလည်း ဆန်၊ ဆီ၊ ဆား၊ ငရုတ်၊ ကြက်သွန်စသည့် အိမ်အတွက် လိုအပ်သော ကုန်များကို ဝယ်နေသည်။

ကျွန်တော်က အေးအေးဆေးဆေးဖြစ်သဖြင့် ထိုသူကို လိုအပ်သော ကုန်များ ဦးစွာချိန်ပေးလိုက်ရန် ကိုကြီးမြင့်ကိုပြောပြီး ရေနွေးကြမ်း ထိုင်သောက်နေသည်။

ကုန်တွေအားလုံးကို ချိန်ထုပ်ပြီးနောက် ကိုကြီးမြင့်က တွက်ပေးသည်။ စုစုပေါင်း ၃၀ ကျော်ဖိုးလောက်ကျသင့် သည်။ ထိုသူက သူ့ခါးပုံစထဲမှ ပိုက်ဆံလေးတွေကိုထုတ်ပြီး

“ခုတော့ ၁၂ ကျပ် လောက်ပဲပါတယ် … ယူထားပါလား။ ဝါးခုတ်ပြန်လာရင် ကျန်တဲ့ငွေ ပေးပါ့မယ်”

“မရဘူးဦးလေး … ဦးလေးကို ကျွန်တော်မသိဘူးလေ”

“ကျွန်တော် ရေလည်ရွာကပါ … တောတက်မလို့။ ကျွန်တော့်မိသားစုမှာ စားစရာ မရှိလို့ပါ။ ကျွန်တော်တို့ ထမင်းမစားရတာ နှစ်ရက်ရှိပါပြီ။ အဲဒါ ဒီကုန်လေးတွေတော့ ပေးလိုက်ပါခင်ဗျာ။ ကျန်ငွေကို တောထဲက ပြန်ထွက်လာရင် ပေးပါ့မယ်”

“ဦးလေး … ထမင်းမစားရသေးဘူးလား”

“ဟုတ်ပါတယ် နှစ်ရက်ရှိပါပြီ”

ကိုကြီးမြင့်က သူ့မိန်းမ မခင်ကျော့ကို အော်ခေါ်လိုက်သည်။

“ခင်ကျော့ရေ”

အိမ်နောက်ဖေးတွင် ချက်ပြုတ်နေသော မခင်ကျော့ကို အပြေးလေးထွက်လာသည်။

“ဘာဟင်းချင်သလဲ”

“မနက်က ဝက်သားလေးရထားလို့ ဝက်သားဟင်း ချက်နေတယ်လေ”

“ထမင်းတစ်ပန်းကန်လောက်ယူခဲ့ပါကွယ် … ဟင်းပါပုံခဲ့”

“ဘာလုပ်မလို့လဲ”

“သွားပါ ယူခဲ့စမ်းပါ … ဒီဦးလေးက ထမင်းမစားရသေးလို့တဲ့”

မခင်ကျော့က ထမင်းတစ်ပန်းကန်မောက်မောက်တွင် ဝက်သားနှစ်တုံးပုံလာပြီး လာပေးသည်။

“ရော့ဦးလေး … စားလိုက်”

“နေပါဗျာ … ရပါတယ်”

“စားလိုက်ပါ … ကျွန်တော်အလှူလုပ်တာလို့ သဘောထားပါ”

ထိုဈေးဝယ်လာသူက သူညွှန်ပြသည့် အိုးဆီသွားကာ လက်တွေကိုဆေးပြီး ကိုကြီးမြင့် ပေးသည့် ထမင်းနှင့် ဟင်းကို အားရပါးရစားသည်။ သူကာ စားပြီးနောက်ပန်းကန်တွေကို သွားဆေးကာ ပြန်လာပြီး

“ကျေးဇူးတင်ပါတယ်ခင်ဗျာ … ကျွန်တော့်ကို ကုန်တွေပေးလိုက်မှာလား”

“မပေးဘူး … ဦးလေးဆီမှာ ပါလာတာ ၁၂ ကျပ်ဆိုတော့ ကျွန်တော် ဆန်ပဲပေးလိုက်မယ်။ ကျန်တာကိုတော့ မပေးလိုက်နိုင်ဘူး။ ဆန်ဖိုးက တကယ်ဆိုရင် ၁၃ ကျပ်ခွဲလောက်ကျတယ်။ ကျွန်တော် တစ်ကျပ်ခွဲလျှော့ ပေးလိုက်မယ်။ ကျန်တာတွေကတော့ ဦးလေးပိုက်ဆံရမှပဲ လာယူပေါ့”

ကိုကြီးမြင့်က သူ့ကိုဆန်ထုပ်လေးတစ်ထုပ်သာ ပေးလိုက်ပါသည်။

ထိုသူလည်းပလိုင်းထဲကို ဆန်ထုပ်လေးထည့်ပြီး ငိုက်စိုက်စိုက်နှင့် ထွက်သွားသည်။ ထိုသူထွက်သွားမှ

“ကိုကြီးမြင့်ရယ် … သနားပါတယ် … ပေးလိုက်ရောပေါ့”

“ဆရာ ကျွန်တော်သနားလို့ ထမင်းကျွေးလိုက်တာပေါ့။ ကျန်တဲ့ကုန်တွေကတော့ ပေးလို့မဖြစ်ဘူးဆရာ”

“ဘာဖြစ်လို့လဲဗျာ”

“ကျွန်တော် စီးပွားရေး လုပ်နေတာလေဆရာ။ နေရာတကာလိုက်ပြီး သနားနေရင် ကျွန်တော် မွဲသွားမှာပေါ့။ သူ့ကို ကျွန်တော်မသိဘူးဆရာ။ ကျွန်တော်သိတဲ့ ဝါးခုတ်သမားတွေကိုတောင် ကုန်ကြွေးတွေ ပေးလိုက်ပေမယ့် ကိုယ့်ဆီမှာ ဝါးမအပ်ဘဲ အခြားကုန်သည်ဆီမှာ ရောင်းစားတာ ကြုံနေရတာ။ ကိုယ့်ရွာသားအချင်းချင်းတောင် အဲဒီလိုလုပ်ရင် အခြားရွာက ကိုယ်မသိတဲ့သူဆို ဘယ်လိုယုံရတော့မှာလဲ”

ထိုစဉ် သူ့မိန်းမ မခင်ကျော့က ထွက်လာပြီး

“အဲဒါဆိုလည်း စောစောကတည်းက ဆန်ဖိုးပဲသင့်သလောက်ယူပြီး ပြန်ခိုင်းလိုက်ရောပေါ့ကိုကြီးမြင့်ရယ်။ ဘာဖြစ်လို့ ထမင်းပါကျွေးနေရတာလဲ”

“ထမင်းကျွေးတာက ငါကုသိုလ်လုပ်လိုက်တာ။ အကြွေးမပေးတာက စီးပွားရေးလုပ်နေတာ။ တစ်ကန့်စီ ထားရမယ်လေ။ သူ့ကို ငါတို့စားမယ့်ထဲက ထမင်းတစ်ပန်းကန် ဖဲ့ကျွေးလိုက်ရလို့ ငါတို့ဘာမှ ထိခိုက်သွားစရာ အကြောင်းမရှိဘူး။ ဒါပေမဲ့ သူ့အပေါ် ငါတို့အကြွေးတင်သွားပြီ”

“ဘာအကြွေးလဲ”

“ငါစေတနာ သူ့အပေါ်ထားပြီး ကျွေးလိုက်တယ်ဆိုတဲ့ စေတနာကြွေးပေါ့။ သူက နောက်ဆို ငါ့ဆီမှာ လာဝယ်ချင်လည်း လာဝယ်မယ်။ မဝယ်ချင်လည်း မဝယ်ဘူး။ ဒါပေမဲ့ သူဆာနေတဲ့အခိုက်လေးမှာ သူ့ဝမ်းကို ဖြည့်ပေးလိုက်တာကိုတော့ သူတစ်သက်မေ့မှာ မဟုတ်ဘူး။ အဲဒါလည်း စီးပွားရေးလုပ်တာပဲကွယ့်”

ကျွန်တော်တို့ရွာတွင် ဆိုင်ပေါင်း လေးငါးဆိုင်လောက်ရှိပါသည်၊ သို့သော် ကိုကြီးမြင့်ဆိုင်လောက် မည်သည့် ဆိုင်မျှ မရောင်းရပါ။ သူ့ဆိုင်မှာ ကြီးသည်ထက်ကြီး၊ စုံသည့်ထက်စုံလာသည်။ သူ့မှာ ဝါးသွင်းသူတွေလည်း များသည်ထက်များလာသည်။

နောက်ပိုင်း ကြုံသဖြင့် သူထမင်းကျွေးလိုက်သူအကြောင်း မေးမိသည်။ သူ့ထံတွင် ဝါးသွင်း ကုန်ယူအလုပ်ကို ပုံမှန် လုပ်နေကြောင်း သိရသည်။

ကိုကြီးမြင့်ချမ်းသာပြီးရင်းချမ်းသာသည်။ သူက အလုပ်နှင့် ကုသိုလ်ကိုခွဲခြားယူတတ်သည်။ သူလှူလျှင်လည်း လက်ရှိအကျိုးရှိသော အလှူများကိုသာ လှူတတ်သည်။ ကျွန်တော့်ကျောင်းကိစ္စဆိုလျှင် သူလက်မနှေး တတ်ပါ။ တံတားဆောက်၊ လမ်းဖောက်၊ ရေကန်တူး သူအလှူငွေအများဆုံးထည့်ကာ မတည်တတ်သည်။

“ဆရာ အလှူဆိုတာ လှူတတ်မှမြတ်တာပါ။ ကျွန်တော်ကတော့ နောင်ဘာဖြစ်လာမယ်ဆိုတာတွေ ပြောပြီး မရေရာတဲ့ အလှူတွေကို လှူရတာထက်၊ လက်တွေ့ ကိုယ့်မျက်စိအောက်မှာ အကျိုးဖြစ်လာတဲ့ လက်တွေ့ မျက်တွေ့ အလှူတွေကိုပဲ စိတ်ဝင်စားတယ်ခင်ဗျ” ဆိုသည့် သူ့ပြောစကားလေးကို ကျွန်တော်တစ်သက်မမေ့ပြီ။

တင်ညွန့်

၇.၂.၂၀၂၅


🪶

16/01/2026

လူတစ်ယောက်ကို သိချင်ရင်
သူဘာပြောသလဲ မကြည့်နဲ့
သူ ဘာလုပ်သလဲကြည့်…
“စကား”တွေက လှည့်စားနိုင်ပေမယ့်
လုပ်ရပ်တွေက မလှည့်စားနိုင်ဘူး။

▪️ ဒဂုန်တာရာ


အရာရာကို လက်ခံလိုက်နိုင်ခြင်းဟာလည်းစိတ်အေးချမ်းမှုတစ်မျိုးပဲဖြစ်ပါတယ်။ငြင်းပယ်လို့မရတဲ့ အရာတွေ၊ ရှောင်လွှဲလို့မရတဲ့ ဝမ်း...
16/01/2026

အရာရာကို လက်ခံလိုက်နိုင်ခြင်းဟာလည်း
စိတ်အေးချမ်းမှုတစ်မျိုးပဲဖြစ်ပါတယ်။

ငြင်းပယ်လို့မရတဲ့ အရာတွေ၊
ရှောင်လွှဲလို့မရတဲ့ ဝမ်းနည်းမှုတွေကို
လက်ခံလိုက်တယ်။
ပြီးမှသာ စိတ်ကို တဖြေးဖြေး ကုစားဖြစ်လာပါတယ်။

'ဘာလို့လဲ၊ ဘာကြောင့်လဲ'ဆိုပြီး
မေးခွန်းထုတ်ခဲ့ဖူးတဲ့ အချိန်တွေ ရှိခဲ့ပေမယ့်၊
ရင့်ကျက်လာတဲ့အခါမှာတော့

အရာအားလုံးကို တိတ်တဆိတ် လက်ခံနိုင်ဖို့ပဲ
ပိုကြိုးစားဖြစ်လာပါတော့တယ်။

ကမ္ဘာပေါ်မှာ ဈေးအကြီးဆုံး ကုတင်ဟာ "ဆေးရုံကုတင်" ပါပဲ။ မင်းပိုက်ဆံတွေ ဘယ်လောက်များများ၊ မင်းအစား မင်းရဲ့ရောဂါကို ဝင်ခံစား...
16/01/2026

ကမ္ဘာပေါ်မှာ ဈေးအကြီးဆုံး ကုတင်ဟာ "ဆေးရုံကုတင်" ပါပဲ။ မင်းပိုက်ဆံတွေ ဘယ်လောက်များများ၊ မင်းအစား မင်းရဲ့ရောဂါကို ဝင်ခံစားပေးမယ့်သူ ငှားလို့မရဘူး။ ကျန်းမာရေးမကောင်းရင် ရွှေတိုက်ပေါ်မှာ အိပ်နေရလည်း၊ ငရဲကျနေသလိုပါပဲ။

"အသက်ငယ်တုန်း ကြိုးစားမှပေါ့၊ ညမအိပ်ဘဲ လုပ်မယ်၊ ထမင်းမစားဘဲ လုပ်မယ်" လို့ ကြွေးကြော်နေသလား။ အဲဒါ "ကိုယ့်သေတွင်း ကိုယ်တူးနေတာ"။

"မင်းက ကားတစ်စီး ဝယ်ထားတယ်။ အဲဒီကားကို ဆီဖိုးရဖို့အတွက်၊ ကားတာယာတွေ ဖြုတ်ရောင်းမယ်၊ စတီယာရင် ဖြုတ်ရောင်းမယ်၊ အင်ဂျင်ကို ရောင်းမယ်။ နောက်ဆုံး ဆီဖိုးတွေ အများကြီး ရလာတဲ့အချိန်ကျရင် မင်းမှာ မောင်းစရာ ကားမရှိတော့ဘူး။ ကျန်းမာရေးကို ရောင်းပြီး ပိုက်ဆံယူတာ အဲဒီအတိုင်းပဲ"။

မင်းမှာ ပိုက်ဆံတွေ သိပ်ချမ်းသာလို့ ဆိုင်တစ်ဆိုင်လုံး ဝယ်နိုင်တယ် ဆိုပါစို့။ ဒါပေမဲ့ ဆရာဝန်က "ခင်ဗျား သွေးတိုးနေတယ်၊ ဆီးချိုတက်နေတယ်၊ ကြက်ဥပြုတ်နဲ့ ထမင်းဖြူပဲ စားရမယ်" လို့ အမိန့်ပေးလိုက်ရင် မင်းပိုက်ဆံတွေက ဘာလုပ်လို့ ရသေးလဲ။

ဘေးက ကုန်ထမ်းသမားက ဝက်သားနှပ်နဲ့ ထမင်းကို မြိန်ရည်ယှက်ရည် စားနေချိန်မှာ၊ သူဌေးဖြစ်တဲ့ မင်းက ဆန်ပြုတ် သောက်နေရမယ်။ အဲဒီအချိန်ကျရင် ဘယ်သူက ပိုချမ်းသာလဲ ဖြေကြည့်။

တရားရုံးမှာ ပိုက်ဆံပေးပြီး လာဘ်ထိုးလို့ ရကောင်းရမယ်။ ရောဂါကိုတော့ ပိုက်ဆံပေးပြီး "ဟေ့ရောင် ငါ့ဆီ မလာနဲ့၊ ဟိုဘက်အိမ် သွားကွာ" လို့ ပြောလို့မရဘူး။ ဆေးရုံကုတင်ပေါ်မှာ ပိုက်ပြွန်တန်းလန်း ဖြစ်နေတဲ့အချိန်ကျရင် မင်းရဲ့ ဘဏ်စာအုပ်၊ မင်းရဲ့ ရွှေဆိုင်၊ မင်းရဲ့ ရာထူး အားလုံးက စက္ကူစုတ်တွေ ဖြစ်သွားပြီ။ အဲဒီအချိန်ကျရင် "ငါ့ပိုင်ဆိုင်မှု အကုန်ယူပါ၊ ငါ့ကို အသက်ရှူချောင်အောင် လုပ်ပေးပါ" လို့ အော်လည်း ဘယ်သူမှ မကယ်နိုင်တော့ဘူး။

ကျန်းမာရေးဆိုတာ ဂဏန်း "၁" (တစ်) ဖြစ်တယ်။ ပိုက်ဆံ၊ အိမ်၊ ကား၊ ရွှေ၊ ရာထူး ဆိုတာ အနောက်က "၀" (သုည) တွေ ဖြစ်တယ်။ ကျန်းမာရေး (၁) ရှိနေသရွေ့၊ နောက်က သုညတွေ များလေ တန်ဖိုးရှိလေပဲ။ (၁၀၊ ၁၀၀၊ ၁၀၀၀)။ ဒါပေမဲ့ ရှေ့ဆုံးက ကျန်းမာရေး (၁) လဲပြိုသွားပြီ ဆိုတာနဲ့... နောက်က သုညတွေ ဘယ်လောက်များများ အားလုံးက "သုည" ဖြစ်သွားရော။ ဘာမှ တန်ဖိုး မရှိတော့ဘူး။

ဒါ့ကြောင့်ပြောချင်တာက
၁။ ပိုက်ဆံရှာတာ မရပ်နဲ့။ ဒါပေမဲ့ နားချိန်တော့ ရှိပါစေ။ (စက်တောင် မရပ်ဘဲ မောင်းရင် မီးလောင်သေးတာ၊ လူက သွေးနဲ့သားနဲ့ လုပ်ထားတာ)။
၂။ အစားကို အချိန်မှန် စားပါ။ (အစာအိမ် ပေါက်သွားရင် ရွှေရည်လောင်းထည့်လည်း ပြန်မကောင်းဘူး)။
၃။ တစ်နေ့ကို နာရီဝက်လောက် လမ်းလျှောက်ပါ။ (ဆေးရုံမှာ လမ်းလျှောက်ရတာထက်၊ ပန်းခြံမှာ လမ်းလျှောက်ရတာ ပိုကောင်းတယ်)။

မင်းရဲ့ အလောင်းကို ထည့်မယ့် ခေါင်းတလားက ကျွန်းသေတ္တာ ဖြစ်ဖြစ်၊ ရွှေကွပ်ထားတဲ့ သေတ္တာ ဖြစ်ဖြစ် အထဲမှာ နေရတဲ့သူကတော့ အတူတူပါပဲ။ သေနေပါပြီ။

ပိုက်ဆံဆိုတာ မင်းအသက်ရှင်နေမှ သုံးလို့ရတာပါ။ သေသွားရင် ဘဏ်ကတ်ကို ကိုင်ပြီး ငရဲပြည်သွားလို့ မရပါဘူး။ ပိုက်ဆံကို ချစ်သလို ကိုယ့်အသက်ကိုလည်း ပြန်ချစ်ပါဦး မိတ်ဆွေ။

သူဌေးက ဆင်းရဲသားလို နေတတ်ရင်လွယ်လွယ်နဲ့ မဆင်းရဲနိုင်သလို.....ဆင်းရဲသားက သူဌေးလို နေရင်တော့ချမ်းသာဖို့ ခဲယဉ်းသွားနိုင်တယ်...
01/01/2026

သူဌေးက ဆင်းရဲသားလို နေတတ်ရင်
လွယ်လွယ်နဲ့ မဆင်းရဲနိုင်သလို.....
ဆင်းရဲသားက သူဌေးလို နေရင်တော့
ချမ်းသာဖို့ ခဲယဉ်းသွားနိုင်တယ်"
ဘဝမှာ လူအထင်ကြီးဖို့ မလိုပါဘူး။
အမှန်တကယ် အထိုင်ကျဖို့ပဲ လိုပါတယ်။
ချမ်းသာတဲ့သူတစ်ယောက် မဖြစ်သေးဘူးဆိုရင်
အရမ်းကြီး မလိုအပ်တဲ့
စျေးကြီးတဲ့ အသုံးအဆောင်တွေကို ရှောင်ပါ။
ပိုက်ဆံ အများကြီးရှာနိုင်ရင်တောင်
ချွေတာ စုဆောင်းခြင်း မရှိပြန်လျှင်လည်း
ပလိုင်းပေါက်နဲ့ ဖား ကောက်နေသလိုဖြစ်ပြီး
မကြီးပွားနိုင်တော့ဘူး။
လူကြီးသူမတွေ ပြောတတ်ကြတဲ့
" ရှိရင် မလွယ်နဲ့...မရှိရင် မလွယ်ဘူး" ဖြစ်တတ်တယ်။
ပိုက်ဆံရှိတဲ့အခါ ဘာမှ မစဉ်းစားတော့ပဲ
ဝယ်ချင်ရာဝယ် သုံးချင်ရာသုံးလုပ်မယ်ဆိုရင်
အရေးအကြောင်း မဖြစ်မနေလိုအပ်လာတဲ့အခါ
လက်ထဲမှာလည်းမရှိ ရှာလို့ကလည်းမလွယ်
ကျဉ်းထဲကြပ်ထဲ အခြေအနေမျိုး ရောက်ရှိသွားတတ်တယ်။
မရှိခင်မှာ ချွေတာပါ။
ရှိလာတဲ့အခါကျရင်လည်း စည်းကမ်းရှိပါ။
အရာရာကို စည်းနဲ့ကမ်းနဲ့ လုပ်ဆောင်သွားမယ်ဆိုရင်
အရမ်းကြီး မချမ်းသာရင်တောင်မှ
ပိုက်ဆံကြောင့် အခက်အခဲ မဖြစ်နိုင်တော့ဘူးပေါ့.........။

၂၀၂၅ ရေ "နှုတ်ခွန်းဆက်သပါ၏'' ဆိုတဲ့ စကားလုံးနဲ့အစချီပြီး ကျေးဇူးတင်စကားပါးလိုက်ပါတယ် နင်က တကယ်ကို ခက်ခဲတဲ့နှစ်တစ်နှစ်ပါပ...
01/01/2026

၂၀၂၅ ရေ

"နှုတ်ခွန်းဆက်သပါ၏'' ဆိုတဲ့ စကားလုံးနဲ့
အစချီပြီး ကျေးဇူးတင်စကားပါးလိုက်ပါတယ်

နင်က တကယ်ကို ခက်ခဲတဲ့နှစ်တစ်နှစ်ပါပဲ။
စိန်ခေါ်မှုတွေ၊ အပြောင်းအလဲတွေ၊ သင်ခန်းစာတွေနဲ့ ပြည့်နေခဲ့တယ်

ဘဝဆိုတာ မျက်စီးတစ်မှိတ်အတွင်းမှာ
ပြောင်းလဲသွားနိုင်တယ်ဆိုတာကိုလည်း သင်ပေးခဲ့သလို
ကိုယ့်ကိုကိုယ် ပိုယုံကြည်ဖို့လည်း သင်ပေးခဲ့တယ်။
အပေါ်ယံလူတွေအတွက် ဂရုမစိုက်ခြင်း အနုပညာကိုလည်း သင်ပေးခဲ့တယ်

တချို့လူတွေရဲ့ စိတ်ရင်းအမှန်ကိုလည်း သိခွင့်ပေးခဲ့တယ်

ကျောထောက်နောက်ခံမရှိတဲ့ တို့ဘဝတွေအတွက်
ကိုယ့်ကိုကိုယ် အားကိုးတတ်အောင်လည်း
သင်ပေးခဲ့တယ်

ကိုယ့်ကိုကိုယ် ပိုချစ်တတ်ဖို့လည်း အများကြီး သင်ပေးခဲ့တယ်

ကျေးဇူးပါပဲ ၂၀၂၅ ရေ။ နင်က လွယ်ကူတဲ့နှစ်တစ်နှစ် မဟုတ်ခဲ့ပေမဲ့ ငါ့အတွက်တော့ ရှိကိုရှိနေသင့်တဲ့ နှစ်တစ်နှစ်ပါပဲ။

ဒါဟာ လောကအလယ်မှာ အောင်မြင်ရုံတင်မကဘဲ "လူချစ်လူခင် ပေါများဖို့" အတွက် အရေးကြီးဆုံး လက်နက်ပဲ။ ခင်ဗျား ဘယ်လောက်ပဲ တော်...
26/12/2025

ဒါဟာ လောကအလယ်မှာ အောင်မြင်ရုံတင်မကဘဲ "လူချစ်လူခင် ပေါများဖို့" အတွက် အရေးကြီးဆုံး လက်နက်ပဲ။

ခင်ဗျား ဘယ်လောက်ပဲ တော်နေပါစေ၊ ဘယ်လောက်ပဲ ချမ်းသာနေပါစေ မောက်မာတဲ့စိတ်ထားရှိနေရင် လူတွေက ခင်ဗျားကို အသိအမှတ်ပြုဖို့ထက် ခင်ဗျားရဲ့ "ကျရှုံးမှုကို ထိုင်စောင့်နေဖို့" ပိုပြီး စိတ်အားထက်သန်ကြလိမ့်မယ်ဗျ။

တကယ်တမ်း ရင့်ကျက်တဲ့သူ၊ ကိုယ့်ကိုယ်ကိုယ် ယုံကြည်မှုရှိတဲ့သူဟာ မောက်မာစရာ မလိုဘူးဗျ။

မောက်မာတဲ့သူတွေဟာ သူတို့ရဲ့ "မလုံခြုံမှု" ကို ဖုံးကွယ်ဖို့အတွက် သူတစ်ပါးကို နှိမ်တာ၊ ကိုယ့်ကိုယ်ကိုယ် ကြွားဝါတာမျိုး လုပ်တတ်ကြတာပါ။ တကယ်တော်တဲ့သူကတော့ "ရေပြင်ကဲ့သို့ ငြိမ်သက်" နေတတ်တယ်ဗျာ။

ခင်ဗျားရဲ့ အရည်အချင်းက တကယ်တောက်ပြောင်နေရင် ခင်ဗျားကိုယ်တိုင် လိုက်အော်နေစရာ မလိုဘူးဗျ။ အမှောင်ထဲက မီးအိမ်လိုပဲ အလိုလို လူတွေ မြင်ကြမှာပါ။

နှိမ့်ချမှု ရှိတဲ့သူဟာ အမြဲတမ်း သင်ယူဖို့ အဆင်သင့် ဖြစ်နေတတ်တယ်ဗျ။

အကျိုးကျေးဇူးအနေနဲ့ ခင်ဗျားက နှိမ့်ချနေရင် လူတွေက သူတို့သိတာတွေကို ခင်ဗျားကို ဝမ်းသာအားရ ပြောပြကြလိမ့်မယ်။

ခင်ဗျားက မောက်မာနေရင်တော့ ခင်ဗျားအမှားလုပ်မှာကို သိနေရင်တောင် ဘယ်သူမှ လာသတိပေးမှာ မဟုတ်ဘူးဗျ။

အကြည်တော်ပြောမယ်: "မာန" ဆိုတဲ့ တံခါးကြီး ပိတ်ထားရင် ဘယ်လို "အခွင့်အလမ်း" မှ အထဲကို ဝင်လာမှာ မဟုတ်ဘူးဗျာ။

လူတွေက ခင်ဗျားရဲ့ "အောင်မြင်မှု" ကို မဟုတ်ဘဲ "စရိုက်" ကိုပဲ လေးစားကြတာဗျ။

ခင်ဗျားမှာ ပိုက်ဆံတွေ အများကြီးရှိတာကို လူတွေက အားကျကောင်း အားကျမယ်၊ ဒါပေမဲ့ ခင်ဗျားရဲ့ နှိမ့်ချမှုကိုတော့ လူတွေက "ချစ်ခင်လေးစား" တာဗျ။

လက်တွေ့မှာ တကယ်အောင်မြင်ပြီး နှိမ့်ချတဲ့သူကို လူတွေက "နတ်လူသာဓုခေါ်" ကြတယ်၊ ဝိုင်းဝန်းပြီး ပံ့ပိုးကြတယ်။

အောင်မြင်ပြီး မောက်မာတဲ့သူကိုတော့ လူတွေက "တစ်နေ့တော့ ပြုတ်ကျမှာပါ" ဆိုပြီး ကျိန်ဆဲတတ်ကြတယ်ဗျ။

ဒါ့ကြောင့် လောကမှာ အောင်မြင်ဖို့ထက် "အောင်မြင်မှုကို ထိန်းသိမ်းဖို့" က ပိုခက်တယ်ဗျ။ နှိမ့်ချမှုကသာ ခင်ဗျားရဲ့ အောင်မြင်မှုကို ရေရှည်တည်တံ့အောင် ကာကွယ်ပေးမှာပါ။

ခင်ဗျားဟာ ခြင်္သေ့တစ်ကောင်လို အင်အားကြီးပါစေ၊ ဒါပေမဲ့ သိုးသူငယ်တစ်ယောက်လို နှိမ့်ချပါဗျာ။

နှိမ့်ချမှုဆိုတာ ခင်ဗျားကိုယ်ခင်ဗျား နှိမ့်ချလိုက်တာမဟုတ်ဘဲ၊ သူတစ်ပါးကို မြှင့်တင်ပေးလိုက်တာဗျ။

ခင်ဗျားက သူတစ်ပါးကို မြှင့်တင်ပေးလေလေ၊ လူတွေက ခင်ဗျားကို ပိုပြီး မြင့်တဲ့နေရာကို ပင့်တင်ပေးလေလေပဲ ဆိုတာ အမြဲသတိရပါဗျာ။

စီးပွားရေးလောကမှာအောင်မြင်ချင်တယ်ဆိုရင်...အောင်မြင်နေတဲ့ စီးပွားရေးသမားတွေကို မိတ်ဆွေဖွဲ့နိုင်ရမယ်ပြိုင်ဘက်တွေကို ရန်သူလ...
26/12/2025

စီးပွားရေးလောကမှာ
အောင်မြင်ချင်တယ်ဆိုရင်...

အောင်မြင်နေတဲ့ စီးပွားရေးသမားတွေကို
မိတ်ဆွေဖွဲ့နိုင်ရမယ်

ပြိုင်ဘက်တွေကို
ရန်သူလို သဘောမထားပဲ ယှဉ်ပြိုင်နိုင်ရမယ်

ဝန်ထမ်းတွေကို
လုပ်ဖော်ကိုင်ဖက်လို သဘောထားနိုင်ရမယ်

အောင်မြင်မှုတွေ ရရှိတဲ့အခါ
ကိုယ့်တဘို့ထဲမယူပဲ
(Customer, Employees, Suppliers, Partner)တွေကို မျှဝေပေးပါ...

၁လစာ မြတ်ဖို့ထက်
၁၀နှစ်စာ လုပ်ငန်းရပ်တည်
နိုင်အောင်ကြိုးစားပါ။

စီးပွားရေးလုပ်တယ် ဆိုတာ
ငွေရှာဖို့ တခုထဲမဟုတ်ပါ။
နာမည်ကောင်းတခုပါ
တည်ဆောက် နိုင်ရပါမယ်။

မိတ်ဆွေအနေနဲ့
Management Theory တွေ
Business Strategy တွေ
Leadership တွေ
ဘယ်လောက်ပဲ ရွတ်ရွတ်
အပေါ်ကအချက်တွေကို လစ်လျုရှု ထားမယ်ဆိုရင်
အောင်မြင်သော Business တခုကို
ဘယ်နည်းနဲ့မှ မတည်ဆောက်နိုင်ဘူးဆိုတာ
အသေအချာပါပဲ။

အားလုံး Good Luck 🍀
မောင်သူရ(TRT)
credit

24/12/2025

သွက်လက်တက်ကြွတဲ့သူဆီကို အောင်မြင်မှုက လျင်လျင်မြန်မြန် ရောက်လာလေ့ရှိတယ်

ကမ္ဘာကျော် အရောင်းသမားတစ်ယောက်ကို မေးတယ် .. ခင်ဗျား ဘာ့ကြောင့် ထိပ်ဆုံးကို ရောက်တာလဲတဲ့ ။ သူက ပြန်ဖြေတယ် .. အော် တခြားအောင်မြင်တဲ့သူတွေလိုပါပဲ .. အလုပ်ကြိုးစားလုပ်တာရယ် လက်မလျှော့တတ်တာရယ်ပေါ့ တဲ့ ..။ ဒါပေမယ့် အရေးကြီးဆုံးတစ်ခုတော့ ရှိတယ်ဗျ .. အဲဒါကတော့ အားပြည့်အင်ပြည့်နဲ့ သွက်သွက်လက်လက် ရှိဖို့ပဲဗျ တဲ့။

သူပြောတာ မှန်နေတယ်နော်။ နယ်ပယ်အသီးသီးမှာ တစ်ခုခုကို ဖြစ်မြောက်အောင် လုပ်နိုင်တဲ့သူတွေကို လေ့လာကြည့်နော်.. သူတို့အားလုံးမှာ သွက်လက်ထက်မြတ်တဲ့ အမူအရာကို ထင်သာမြင်သာ တွေ့ရတယ်။

ခေတ်ကြီးက အခက်အခဲတွေ၊ လောကဓံတရားတွေ ရှိချင်ရှိပါစေ ယှဉ်ပြိုင်ချင်တယ် အနိုင်ယူချင်တယ် ဆိုတဲ့စိတ်တွေနဲ့ အောင်မြင်ချင်စိတ်တွေ ဒင်းကြမ်းပြည့်နေတဲ့ လူတွေ သန်းပေါင်း ထောင်ချီ နေထိုင်နေကြတဲ့ ခေတ်ကြီးပါနော်။
ကိုယ်က ဘယ်လောက် intelligent မြင့်လို့ .. ဘာတွေ ဘယ်လောက်တတ်တတ် ၊ ဘွဲ့တွေ ဘယ်လောက်ရရ ၊ သွက်သွက်လက်လက် စွမ်းစွမ်းတမံ ပုံမျိုးမရှိရင် ကိုယ့်ရည်မှန်းချက်တွေဟာ ပေါက်မြောက်လာမှာ မဟုတ်ဘူး။
ထိုနည်းအတူပဲ ကိုယ့်ဘာသာကိုယ် ထထကြွကြွနဲ့ ကိုယ့်ကိုယ်ကိုယ် ဦးဆောင်နိုင်စွမ်း မရှိရင်လည်း ဖြစ်ချင်တာတွေ ဖြစ်လာဖို့ ခက်ခဲနေအုံးမှာပဲ။

အပြင်လောကဆိုတာလည်း လူလူချင်း ပခုံးချင်းတွန်းတိုက်သွားနေကြတာပါ နော်။ ကိုယ်လဲကျသွားရင် ဘယ်သူမှ ငါ့နေရာ နင့်ကိုပေးလိုက်မယ်ဆိုပြီး ကရုဏာသက်နေမှာ မဟုတ်ဘူး။ လှည့်မကြည့်ပဲ နင်းကျော်သွားလိုက်ကြမှာပါ။

ဒါ့ကြောင့် လောကကြီးမှာ နေရတာ ကိုယ်က စိတ်ထက်ထက်သန်သန် နေရမယ်။ ဘယ်သူလာတွန်းတွန်း ယိုင်မသွားအောင် မတ်ထား၊ တောင့်ခံထားရတယ်။ လာတိုက်ရင် လဲကျမသွားအောင် ကိုယ့်ပုခုံးလာတိုက်တဲ့ ပခုံးကို ဘာမထီစိတ်နဲ့ ပြန်တွန်းထားရတယ်။ ခပ်ပျော့ပျော့ ခပ်ခွေခွေ အမူအရာ စိတ်သဘောထားနဲ့ လူတောတိုးချင် လူလုပ်ချင်လို့ မရတော့တဲ့ ခေတ်ကြီးပါ။

ဒါ့ကြောင့် ကိုယ်ကို ကြည့်လိုက်ရင် အမြဲတမ်း ရွှင်လန်း တက်ကြွနေတာပဲ လို့ မြင်နေရမယ်။ ဒီလိုပြောလို့ အမူအရာ မတည်မငြိမ်နဲ့ လူတော့ မဖြစ်ရဘူးနော်။ စလျင်စလိုပုံ အလောတကြီးပုံပေါက်ပြီး မောကျောဆိုက်နေတဲ့လူလည်း မဖြစ်ရဘူးနော်။ ဒါပေမယ့် ကြည့်လိုက်ရင် အားတွေရှိလို့ .. ကြည်ကြည်လင်လင်နဲ့ သွက်လက်နေတာပဲ ဖျတ်လတ်နေတာပဲ လို့ ဖြစ်ရမယ်နော်။
ဒါဟာ ကိုယ့်ရဲ့ ပင်ကိုယ်စိတ်အားအင်ကို ပြတာ ဖြစ်သလို .. ကိုယ့်ရဲ့ ဘာမထီ စိတ်ဓာတ်ကိုလည်း အကောင်းဆုံးနည်းနဲ့ ဖော်ပြရာရောက်တယ်။
ဒါဟာ ကိုယ့်ကို ဆွဲဆောင်မှုရှိစေတဲ့အပြင် ဒါဟာ လူတွေမလွန်ဆန်နိုင်တဲ့ အသက်ဝင်မှုတစ်မျိုးလည်း ဖြစ်တယ်။ ဒါဟာ အောင်မြင်မှုရဲ့ အဓိက သော့ချက်ဆိုတာလည်း အသေအချာပါပဲ။

အဲဒီတော့ သွက်လက်တယ် တက်ကြွတယ် ဆိုတာ ပျာလောင်ခတ်ပြီး ဂဏှာမငြိမ်ဖြစ်နေတာ မဟုတ်ပါဘူး။
သွက်လက်တက်ကြွတယ်ဆိုတာ သူများမလုပ်နိုင်တာကို ကိုယ်လုပ်နိုင်တယ် လို့ ထင်သာမြင်သာစေတာ။
သွက်လက်တက်ကြွတယ်ဆိုတာ သူများတွေစိတ်ပျက်စွန့်ခွာသွားချိန်မှာ ကိုယ်က ဖြစ်အောင် လုပ်နိုင်တာ။
သွက်လက်တက်ကြွတယ်ဆိုတာ သူများတွေ သာသာယာယာနေဖို့ ကြံစည်နေချိန်မှာ ကိုယ်က မအိပ်မနေ လုပ်နိုင်တာ၊ စားဖို့တောင် မေ့ရင်မေ့နေတာ။
သွက်လက်တက်ကြွတယ်ဆိုတာ သူတကာ စိတ်အားငယ်သွားချိန်မှာ ကိုယ်က ကိုယ့်ကိုယ်ကိုယ် ယုံကြည်မှု ဆက်ထားနိုင်သေးတာ ကို ပြောတာ ဖြစ်တယ်နော်။

တချို့ သာမာန်လောက်ပဲ အရည်အချင်းရှိတဲ့သူတွေတောင် သူတို့ရဲ့ ထက်သန်မှု၊ ရည်ရွယ်ချက်ကြီးမှု နဲ့ သူတို့ရဲ့အသက်ဝင်တောက်ပနေတဲ့ စိတ်ကြောင့် သူတို့မျှော်မှန်းတာ ထက်တောင် ပိုဖြစ်မြောက်လာကြတာ ဒီစိတ်ဓာတ်ကြောင့်ပါပဲ ဆိုတာ လေ့လာကြည့်ရင် တွေ့ရမှာပါ။

ဒါ့ကြောင့် သွက်လက်တက်ကြွတယ် ဆိုပြီး ဂဏှာမငြိမ် မဖြစ်ရပါဘူး။
စိတ်ထား တည်တည်၊ အမူအရာ တည်တည်နဲ့.. လေးစားလောက်တဲ့ အိန္ဒြေရှိပြီးတော့ စိတ်အားတွေ ထက်သန်နေတဲ့သူ ဖြစ်လို့ရပါတယ်။

သွက်လက်တက်ကြွတဲ့သူဆီကို အောင်မြင်မှုက လျင်လျင်မြန်မြန် ရောက်လာလေ့ရှိပါတယ်။
လောကကြီးက ဒီလိုလူဆီကို အောင်မြင်မှုတွေ အပ်နှင်းဖို့ စောင့်နေပါတယ်။

ref : HHH
CRD..............

ဂျပန်စကားပုံတစ်ခုရှိတယ် - လူတိုင်းမှာ မျက်နှာသုံးမျိုး ရှိကြသတဲ့။ပထမမျက်နှာက လူအများကို ပြတဲ့မျက်နှာ။ ပြုံးရယ်နေတာ။ ထွေရ...
22/12/2025

ဂျပန်စကားပုံတစ်ခုရှိတယ် - လူတိုင်းမှာ မျက်နှာသုံးမျိုး ရှိကြသတဲ့။

ပထမမျက်နှာက လူအများကို ပြတဲ့မျက်နှာ။
ပြုံးရယ်နေတာ။
ထွေရာလေးပါး စကားလေးပြောတာ။
ဘဝကို ပိုမိုလွယ်ကူစေမယ့် မျက်နှာ။

ဒုတိယမျက်နှာက ရင်းနှီးသူတွေနဲ့ မိသားစုက မြင်ကြရတဲ့မျက်နှာ။
အားနည်းချက်လေးတွေ။
စစ်မှန်တဲ့ ရယ်မောခြင်း။
ယုံကြည်ရသူတွေနဲ့ပဲ မျှဝေတဲ့ ရိုးသားမှု။

တတိယမျက်နှာကတော့ သင်တစ်ယောက်တည်းသာ ပိုင်တဲ့မျက်နှာ။
ဘယ်တော့မှ ထုတ်မပြောဖြစ်တဲ့ အတွေးတွေ။
တိတ်ဆိတ်စွာ ရှိနေတဲ့ ခံစားချက်တွေ။
သူများ ကြည့်နေပြီဆိုတာနဲ့ ပျောက်သွားတဲ့ မျက်နှာ။

There’s a Japanese saying - every person wears three faces.

The first is the one shown to the world.
The smile.
The small talk.
The version that makes life easier.

The second is the one close friends and family see.
The little cracks.
The real laughter.
The honesty you only share with people you trust.

And the third face - that one belongs only to you.

The thoughts you never say out loud.
The feelings that live in silence.
The version that disappears the second someone else is watching.

#မေတ္တာဖြင့်
#ဒေါက်တာစိုးသန်း

Narcissism (သို့မဟုတ်) ကိုယ့်ကိုယ်ကိုယ် အချစ်လွန်ခြင်းလူတိုင်းမှာ ကိုယ့်ကိုယ်ကိုယ် ချစ်တဲ့စိတ် (Self-love) ဆိုတာ ရှိကြစမ...
17/12/2025

Narcissism (သို့မဟုတ်) ကိုယ့်ကိုယ်ကိုယ် အချစ်လွန်ခြင်း

လူတိုင်းမှာ ကိုယ့်ကိုယ်ကိုယ် ချစ်တဲ့စိတ် (Self-love) ဆိုတာ ရှိကြစမြဲပေမယ့် ကိုယ့်တန်ဖိုးကို ကိုယ်နား လည်ပြီး ယုံကြည်မှုရှိတာက ကျန်းမာတဲ့ စိတ်နေသဘောထား (Healthy Self-esteem) တစ်ခု ဖြစ်ပါ တယ်၊ ဒါပေမဲ့ ဒီအချစ်က အတိုင်းအတာတစ်ခုကို ကျော်လွန်သွားပြီး "ငါသာလျှင် အတော်ဆုံး၊ ငါသာ လျှင် အရေးအကြီးဆုံး" ဆိုတဲ့ အစွန်းကို ရောက်သွားတဲ့အခါမှာတော့ ဒါကို စိတ်ပညာရှုထောင့်အရ Narcissism (နာစစ်ဆစ်ဇင်) လို့ ခေါ်ဆိုကြပါတယ်။

သမိုင်းပုံပြင်ထဲက အစ

Narcissism ဆိုတဲ့ စကားလုံးဟာ ဂရိဒဏ္ဍာရီထဲက Narcissus (နာစစ်ဆပ်) ဆိုတဲ့ လူငယ်လေးဆီကနေ ဆင်းသက်လာတာဖြစ်ပြီး သူဟာ အရမ်းချောမောလှပတဲ့ လူငယ်တစ်ယောက်ဖြစ်ပေမဲ့ ဘယ်သူ့ကိုမှ မချစ်ဘဲ မာနကြီးလွန်းသူပါ။ တစ်နေ့မှာတော့ ရေကန်ထဲက သူ့ရဲ့ အရိပ်ကို သူပြန်မြင်ပြီး ကိုယ့်ကိုယ် ကိုယ် ပြန်ချစ်မိသွားတယ်။ နောက်ဆုံးမှာတော့ အဲဒီရေကန်နားကနေ ဘယ်မှမသွားနိုင်ဘဲ ကိုယ့်အရိပ် ကို ကြည့်ရင်း အသက်ဆုံးရှုံးခဲ့ရရှာတယ်။ အဲဒီနေရာမှာ ပေါက်လာတဲ့ ပန်းလေးကို Narcissus ပန်းလို့ ခေါ်ကြပါတယ်။

ဒီပုံပြင်ကပေးတဲ့ သင်ခန်းစာကတော့ "ကိုယ့်ကိုယ်ကိုယ် အချစ်လွန်ခြင်းဟာ ကြီးမားတဲ့ ဆုံးရှုံးမှုတွေဆီ ဦးတည်သွားစေနိုင်တယ်" ဆိုတာပါပဲ။

Narcissist တစ်ယောက်ရဲ့ လက္ခဏာများ

Narcissism ဟာ ရောဂါဗေဒအရ ပြောရရင် Narcissistic Personality Disorder (NPD) လို့ ခေါ်တဲ့ ကိုယ်ရည်ကိုယ်သွေးဆိုင်ရာ ပြဿနာတစ်ခုပါ။ သူတို့မှာ တွေ့ရလေ့ရှိတဲ့ အဓိက လက္ခဏာရပ်တွေကို လေ့လာကြည့်ကြရအောင်။

ငါသာလျှင် အရေးအကြီးဆုံး (Grandiosity)ဆိုတဲ့အယူအဆ၊ သူတို့ဟာ သူတို့ကိုယ်သူတို့ သာမန် လူတွေထက် ပိုထူးကဲတယ်၊ ပိုတော်တယ်လို့ အမြဲ ထင်မြင်ယူဆလေ့ရှိပါတယ်။ သူတို့ရဲ့ အောင်မြင်မှု တွေကို ပုံကြီးချဲ့ ပြောတတ်ကြပြီး သူတစ်ပါးက ဝိုင်းဝန်း အားကျတာကို လိုလားကြပါတယ်။

စာနာစိတ် ကင်းမဲ့ခြင်း (Lack of Empathy)ရှိနေတတ်တာမျိုး ကျတော့ အဓိကကျတဲ့ အချက်ပါ၊ သူတစ်ပါးရဲ့ ခံစားချက်၊ နာကျင်မှုတွေကို နားလည်ပေးနိုင်စွမ်း သိပ်မရှိကြသလို သူတစ်ပါး ထိခိုက်မှာထက် ကိုယ့်လိုအင်ဆန္ဒ ပြည့်ဝဖို့ကိုသာ ဦးစားပေးတတ်ကြပါတယ်။

အမြဲတမ်း ချီးကျူးခံလိုစိတ် (Need for Admiration)ဖြစ်နေတတဲ့ မီးက လောင်စာလိုသလိုပါပဲ။ Narcissist တွေဟာ သူတစ်ပါးရဲ့ အာရုံစိုက်မှု (Attention) နဲ့ ချီးကျူးမှု (Compliment) တွေကို အမြဲတမ်း တောင့်တနေတတ်ပါတယ်။

အခွင့်ထူးခံလိုစိတ် (Sense of Entitlement)နဲ့ သူတို့ဟာ အထူးအခွင့်အရေးတွေကို ရသင့်တယ်လို့ ယူဆထားကြပါတယ်၊ စည်းမျဉ်းစည်းကမ်းတွေဟာ သူတို့အတွက် မဟုတ်ဘဲ တခြားလူတွေအတွက် သာ ဖြစ်တယ်လို့ ထင်တတ်ကြပါတယ်။

အပြင်ပန်းမှာတော့ Narcissist တွေဟာ ယုံကြည်မှုလွန်ကဲပြီး မာနကြီးပုံ ပေါက်နေတတ်ပါတယ်။ ဒါပေမဲ့ စိတ်ပညာရှင်တွေရဲ့ လေ့လာချက်အရတော့ သူတို့ရဲ့ အတွင်းစိတ် (Deep Subconscious) မှာ မလုံခြုံမှု (Insecurity) တွေ အများကြီး ရှိနေတတ်ပါတယ်။ သူတို့ရဲ့ "အတ္တ" (Ego) ဟာ ဖန်ခွက်လိုပါပဲ၊ အပြင်ကကြည့်ရင် တောက်ပနေပေမဲ့ ထိခိုက်လွယ်ပြီး ကျိုးပဲ့လွယ်ပါတယ်၊ သူတစ်ပါးက အနည်းငယ် ဝေဖန်လိုက်တာနဲ့ သည်းမခံနိုင်အောင် ဒေါသထွက် တတ်ကြတာဟာ သူတို့ရဲ့ အတွင်းစိတ် အားငယ်မှုကို ဖုံးကွယ်ချင်လို့ ဖြစ်ပါတယ်။

အကယ်၍ ကိုယ့်ပတ်ဝန်းကျင်မှာ Narcissist တစ်ယောက် ရှိနေခဲ့ရင်၊ ဒါမှမဟုတ် ကိုယ်တိုင်က ဒီလက္ခဏာတွေ ရှိနေတယ်လို့ သံသယရှိရင် ဘာလုပ်သင့်သလဲ။

အရင်ဆုံး နယ်နိမိတ် သတ်မှတ်ပါ (Set Boundaries)၊ သူတို့ရဲ့ လွှမ်းမိုးမှုအောက် မရောက်အောင် ကိုယ့်ရဲ့ စိတ်ပိုင်းဆိုင်ရာ နယ်နိမိတ်ကို ခိုင်ခိုင်မာမာ တည်ဆောက်ထားရပါမယ်။

မပြောင်းလဲနိုင်မှန်း လက်ခံနားလည်ထားပါ၊ Narcissist တစ်ယောက်ကို ပြောင်းလဲဖို့ ကြိုးစားတာဟာ အရမ်းခက်ခဲလွန်းပြီး သူတို့ကိုယ်တိုင်က ပြဿနာရှိမှန်း လက်ခံပြီး ပြောင်းလဲချင်စိတ် ရှိမှသာ ကုထုံး (Therapy) ခံယူပြီး ပြောင်းလဲနိုင်မှာပါ။

စာနာစိတ် ထားကြည့်လိုက်ပါ၊ ကိုယ့်ကိုယ်ကိုယ် ပြန်လည် ဆန်းစစ်ကြည့်ရင်း "ငါဟာ သူတစ်ပါးရဲ့ ခံစားချက်ကို နားလည်ပေးရဲ့လား" ဆိုတာကို မေးခွန်းထုတ်တာက ကျန်းမာတဲ့ စိတ်နေသဘောထား ဆီကို ပြန်လည် ရောက်ရှိစေနိုင်ပါတယ်။

Narcissism ဆိုတာ ကြောက်စရာ ကောင်းတဲ့ အရာတော့ မဟုတ်ပါဘူး၊ ဒါဟာ လူသားစိတ်သဘာဝရဲ့ ရှုပ်ထွေးတဲ့ အစိတ်အပိုင်းတစ်ခုဖြစ်ပြီး၊ အရေးကြီးတာက "ငါ" ဆိုတဲ့ အတ္တနဲ့ "သူ" ဆိုတဲ့ ပရ အကြား မျှတမှုကို ရှာဖွေဖို့ပါပဲ။ ကိုယ့်ကိုယ်ကိုယ် ချစ်ပါ၊ ဒါပေမဲ့ အဲဒီအချစ်က သူတစ်ပါးကို ထိခိုက်စေတဲ့ အချစ်မျိုး မဖြစ်ဖို့ သတိပြုကြဖို့လိုပါတယ်။

စာဖတ်သူအပေါင်း စိတ်၏ချမ်းသာခြင်း၊ ကိုယ်၏ကျန်းမာခြင်းနှင့် ပြည့်စုံကြပါစေ။



Address

Myitkyina, Kachin State
Mandalay

Opening Hours

Monday 08:00 - 17:00
Tuesday 08:00 - 17:00
Wednesday 08:00 - 17:00
Thursday 08:00 - 17:00
Friday 08:00 - 17:00
Saturday 08:00 - 17:00
Sunday 08:00 - 17:00

Website

Alerts

Be the first to know and let us send you an email when Mega Kyaw Construction Co., Ltd. posts news and promotions. Your email address will not be used for any other purpose, and you can unsubscribe at any time.

Contact The Business

Send a message to Mega Kyaw Construction Co., Ltd.:

Shortcuts

Share

Category