14/12/2024
Утааны талаар бодлоо хуваалцъя
Агаарын бохирдлыг бууруулна гэдэг нь 1 м3 эзлэхүүнд ногдох нарийн тоосонцорууд болон бусад хорт бодисын хэмжээг бууруулна гэсэн үг. Мэдээж хамгийн их нөлөө үзүүлж байгаа нь гэр хорооллын яндангаас гарч байгаа утаа дараагаар нь цахилгаан станц болон машин тэрэгний яндангаас гарах утаа орно. Тэгэхээр 1м3 эзлэх тэдгээр тоосонцоруудыг буулгах хоёр арга байна
1. Гэр хорооллын яндангуудыг цөөлөх
2. Улаанбаатарын хүн амыг нэмэхгүйгээр газар нутгийг тэлэх
Эхний тохиолдолд байнга яригддаг гэр хорооллыг орон сууцжуулах, халаалтыг цахилгааны эх үүсвэрээр солих (нэмэлт цахилгаан станцын асуудал яригдана), орон нутгуудад ажлын байр нэмэх гэх мэт аргууд байна.
Харин хоёр дахь арга буюу УБ-г тэлэх ёстой гэдэг дээр хоёр шалтгаан байна. Нэгдүгээрт яндангийн тоо хэвээр байлаа ч газар нутаг тэлбэл 1 м3 эзэлхүүнд ногдох нарийн тоосонцорууд буурч таарна. Хоёрдугаарт дөрвөн уулын дунд хашигдсан хотын утаа хүчтэй салхи байхгүй л бол хөөгдөхгүй. Тэгэхээр дөрвөн уулынхаа гадагш тэлэх хэрэгтэй. Тэгэхийн тулд эхлээд дэд бүтцээ бий болгоно. Сүүлийн үед хот яармаг руу тэлж байгаа тул зүүн тийшээ гэхээсээ илүү баруун тийшээгээ тэлэх ёстой (Хүй долоо худаг, Хөшигтийн хөндий...). УБ-Дархан, УБ-Хөшигт замууд, цэвэрлэх байгууламж, шинэ ундны усны сангууд бүгд баруун талдаа байгаа. Нэмж дулааны станцууд, цэвэр, бохирын байгууламж баригдаж таарна. Тэгэхээр элдэв янзын гоё нэртэй хэдэн тэрбум долларын том төсөл хөтөлбөрүүд ярихаасаа илүү яаж дэд бүтцээ тэлэх вэ гэдэг дээр толгойгоо ажиллуулцгаая.
Хотын аль ч цэгээс аль болох хурдан хотоос гарах боломжтой нэмэлт замуудыг барих хэрэгтэй. Амралтын өдрүүдээр цэвэр агаарт гарья гэхээр хот дотроо түгжирч түгжирч баруун тийш 22 болон нисэхийн замууд, зүүн тийш Налайхын ганц зам дээрээ очоод дахиад түгжирдэг. Наадмын өмнөхөн баруун тийш хөдөө явах гэж хэдэн цаг түгжирдэг билээ. Хотоос гарах замуудаа нэмэх, шаардлагатай бол параллел замууд гаргасан ч болно. Мөн хот доторх замуудаа нэмэх. Жишээ нь яригдаад байгаа Туул гол дагуух хурдны зам нь баригдвал маш хэрэгтэй. Мөн гэр хороолол дундуур газар чөлөөлөлт хийж хурдны тойрог замууд гаргах. Хотоос хурдан гарах замууд нэмэхгүй л бол хот тэлэх боломжгүй, хүмүүст сэдэл төрөхгүй.
