05/05/2023
БЛОКНУУДЫН ЯЛГАА
Блок бол дэлхий даяар хэрэглэгддэг барилгын хамгийн чухал элементүүдийн нэг байдаг. Тиймээс тэдгээрийн ялгааг таниж мэдэх нь өөрийн байшингаа барьж буй болон барихаар төлөвлөж буй хэн бүхэнд сонголтоо зөв хийхэд тусах болно. Өдгөө монголд хийгдэж буй хамгийн түгээмэл төрлүүдийг дурьдвал: Нүхтэй бетон блок, Дулаалгатай бетон блок (Полистерол блок), Хөнгөн хийт бетон блок (шохойн блок), Угсардаг блок (Лего блок), Керамзит блок, Цул бетон блок (Суурийн блок) зэрэг байна. Тиймээс эдгээр блокнуудын талаар товч бөгөөд тодорхой олж мэдэцгээе.
1.Нүхтэй бетон блок: (Hollow Concrete Blocks): Уламжлалт цул бетон блоктой төстэй ч гол ялгаа нь ГОЛДОО НҮХТЭЙ буюу Хоосон агаарын зайтай байдаг. Нүхний давуу тал нь уг блокны жинг багасгахаас гадна нүхэн доторхи агаарын вакуумжсан орчин нь дуу, дулаан тусгаарлах боломжыг бүрдүүлдэг. Даацын болон даацын бус хана, өрөө тусгаарлах хана, түшиц хана буюу хажуу бөөрнөөс даралт авах хана зэрэг өргөн хэрэглэгдэхүүнтэй ба нүхээр нь арматур төмрөөр хүчитгэж өгснөөр илүү бат бөх шинжтэй болдог. Энэхүү блок нь цаг агаарын элэгдэл, шавж болон чийгний тэсвэртэйгээс гадна бусад төрлийн блокноос хамгийн хямд нь байдаг. Гэвч Монголд “ХАШААНЫ БЛОК” гэж нэрээр алдаршсан нь хашаанд л зориулагдсан буюу байшин бариж болохгүй гэх буруу ойлголтыг хүмүүсд өгдөг. Ерөнхийд нь дүгнэхэд энэхүү блок нь бат бөх, хямд, мөн юунд ч ашиглаж болдог хамгийн түгээмэл блок юм.
2.Дулаалгатай бетон блок (Insulating Concrete Forms, ICF): Дулаалгатай гэдэг нь дулаан хадгалах чадвар өндөртэй буюу хөөсөн материал орсон блокнуудыг хэлнэ. Эдгээр блок нь орон сууц болон үйлчилгээний зориулалттай барилгуудад барилгын гадна хананд буюу та бидний хэлж заншсанаар ДҮҮРГЭЛТ-нд өргөнөөр ашиглагддаг юм. ХАМГИЙН ГОЛ чухал ялгаа нь эрчим хүчний хэмнэлттэй буюу дулаалгын өндөр шинж чанараараа бусад блокноос ялгагддаг. Блокны зуурмагын явцад жин багатай хөөс хольж өгснөөр уламжлалт бетоноос ХӨНГӨН болдог.
3.Хөнгөн хийт бетон блок: (Aerated Autoclaved Blocks, AAC Blocks) Хөнгөн хийт бетон блок нь та бидний хэлж заншсанаар “ШОХОЙН хөнгөн блок” юм. Цемент, шохой, үнс, ус, болон хөнгөн цагааны нунтаг зэрэг түүхий эдийг хольж хийдэг. Хөнгөн цагааны нунтаг нь зуурмаг дотор хийт бөмбөлөг үүсгэдэг тул уламжлалт бетон блокыг бодвол маш хөнгөхөн болгодог. Барилгын салбарт хөнгөн хийт бетон блокыг хөнгөн жингээс нь гадна, сайн дулаалгын шинжээр нь ихээр үнэлдэг. Хөөсөрхөг буюу нүхэрхэг шинж нь байшинг АМЬСГАЛДАГ буюу мөөгөнцөрдөх эсрдэл багасах боломжтой болгодог.
4.Угсардаг блок (Interlocking Concrete Blocks): Энэхүү блок нь тусгай бие биендээ яг таарж холбогддог блок юм. Давуу тал нь тухайн блокыг хооронд нь зүгээр л тааруулж угсрах буюу өрөхөд нэмж зуурмаг зуурах шаардлагагүй байдаг. Энэхүү блокоор өрсөн хана нь хүчтэй, урт удаан эдэлгээтэй болдог. Олон төрлийн хэмжээ хэлбэртэй хийж болдог бөгөөд олон улсад энэхүү блокыг байшин, түшиц хана, элэгдэлээс сэргийлэх хана, мөн үерийн шар уснаас хамгаалах зэрэг олон төрлийн зүйлд ашигладаг байна.
5.Керамзит блок: (Keramzit block) Энэхүү блок нь шаврыг өндөр температур-т халааж гаргаж авсан бүтээгдэхүүнээ цементтэй хольж гаргаж авсан блок бөгөөд удаан эдэлгээтэй, хөнгөн жинтэй бүтээгдэхүүн юм. Керамзит блок нь дулаалгын шинж чанартай, удаан эдэлгээ, чийг болон галд тэсвэртэй байдлаараа үнэлэгддэг. Мөн керамзит блок нь өөр дээрээ даац авах чадвартай тул байшингийн гадна хананд шууд хэрэглэж гадуур нь хөөсөөр дулаалахад тухтай байшин болно.
6.Цул бетон блок: (Solid Concrete Block) Эдгээр блок нь нягт бөгөөд хүнд тул өөр дээрээ их хэмжээний даац авах бүтээцэд ашигладаг. Өргөн хэрэглэгдэх нь барилгын суурь, хажуу талаас их хэмжээний түлхэлт ирэх тогтоох түшиц хана, болон бусад хүч, даац, жин шаардсан зүйлд түгээмэл ашигладаг. Манайхан суурийн блок ч гэж нэрлэдэг.
#тоосго #блок , #Хана #Үйлдвэр #блок #Хашаа
