29/06/2026
Монгол Улсын Худалдааны гавьяат ажилтан Д.Удвал — Монголын худалдаа, үйлчилгээний салбарыг түүчээлсэн ажилчин зөгий”
Монголын худалдаа, үйлчилгээний салбарт олон улсын жишиг соёлыг нутагшуулах үйлсэд 35 жилийн турш тууштай зүтгэж, бодит бүтээн байгуулалтыг цогцлоосон “Наран Трейд” ХХК-ийн Ерөнхий захирал Д.Удвал саяхан Монгол Улсын “Худалдааны гавьяат ажилтан” хэмээх эрхэм хүндтэй цол тэмдгээр энгэрээ мялаалгасан билээ.
Энэхүү шагнал нь зөвхөн хувь хүний амжилт биш, 1990 оны шилжилтийн үеэс өнөөдрийг хүртэл Монголын бизнесийн салбарыг олон улсын түвшинд гаргахад оруулсан түүний нөр их хөдөлмөр, зүтгэлийн бодит үнэлэмж юм. Тэрээр өөрийгөө хэзээ ч дээрээс зааварлагч “Хатан” гэж үздэггүй, харин үргэлж баг хамт олонтойгоо мөр зэрэгцэн хөдөлмөрлөдөг “Ажилчин зөгий” хэмээн тодорхойлдог билээ.
Дэлхийн брэндийг дэргэдээс нь: Худалдаанаас “Амьдралын хэв маяг” руу
“Наран” групп зөвхөн бараа бүтээгдэхүүн импортолсонгүй, харин дэлхийн бизнесийн цоо шинэ хандлага, соёл, стандартыг Монголд алхам алхмаар, тууштай нутагшуулж ирсэн билээ. Үүний хамгийн тод баталгаа нь цаг хугацааны шалгуурыг давж, өдгөө түүхэн ойнуудтайгаа золгож буй тэдний салбар компаниуд болон дэлхийн топ брэндүүд юм.
Олон улсын соёлыг Монголын хөрсөнд буулгасан он цагийн хэлхээг тольдоход:
• 30 ЖИЛИЙН ТҮҮХТЭЙ ТҮҮЧЭЭЛЭГЧИД (1995-1996 он): Тэртээ 1995 онд хүнсний импортын соёлд шинэ хуудас нээсэн “Наран Фүүдс” ХХК байгуулагдаж байсан бол, 1996 онд Францын алдартай Yves Rocher компанитай франчайзингийн анхны гэрээг үзэглэж байв. Уламжлалт гоо сайхны газрыг дэлхийн стандартад нийцсэн Гоо сайхны төв болгон өөрчилж байсан түүхтэй өдгөө хамтдаа 30 жилийн ойгоо бахархалтайгаар тэмдэглэж байна.
• 20 ЖИЛИЙН БАТАЛГАА: Группийн үйл ажиллагаа эрчимтэй тэлж, 2006 онд Австрийн тансаг гоёл чимэглэлийн Swarovski брэндийг эх орондоо албан ёсны эрхтэйгээр нээж байв. Үүний зэрэгцээ, худалдааны салбараас гадна нийгмийн оюун санаанд хөрөнгө оруулалт хийж, хэвлэл мэдээллийн зах зээлд өөрийн өнгө төрхийг тунхагласан SBN TV телевиз байгуулагдаж, өдгөө 20 жилийн ойтойгоо золголоо.
• 10 ЖИЛИЙН ДЭЛХИЙН СТАНДАРТ: Нийтийн хоолны соёлд хувьсгал хийсэн, энтертайнмент үйлчилгээний дээд хэмжүүр бөгөөд Улаанбаатар хотын аялал жуулчлалын нэгэн нүүр царай болсон “Hard Rock Cafe” Монголд үүд хаалгаа нээгээд 10 жилийн ойтойгоо золгож байна.
Ажил амьдралын хос багана: Салбартаа ховорхон "Гавьяат хосууд"
Д.Удвал захирлын амжилтын ард түүний гэр бүл, хань Наран Трейд ХХК-ийн ТУЗ-ийн дарга С.Болдхэт салшгүй холбоотой. Хань С.Болдхэт нь 2017 онд "Монгол Улсын Худалдааны гавьяат ажилтан" цол хүртэж байсан бол, ийнхүү Д.Удвал захирал мөнхүү цолыг хүртсэнээр тэд салбартаа ховорхон тохиох "Гавьяат гэр бүл", бизнесийн талбар дахь үлгэр жишээ хослол боллоо.
"Наран"-аас ургасан 56 алдартан: Хамт олныхоо амжилтыг алдаршуулсан бахархам үдэш:
Тэрээр өөрийнхөө баярыг компанийнхаа амжилттай хамтатган, "Наран"-гаар овоглон тууштай зүтгэж буй одоо ажиллаж байгаа болон ахмад, залуу 56 ажилтнаа шагналын эрэмбээр нь тайзнаа урьж, баглаа цэцэг өргөн хүндэтгэсэн юм.
Эдгээр 56 ажилтан бүгд зөвхөн "Наран" компанид ажиллаж байх хугацаандаа хөдөлмөр бүтээлээ төр засагтаа үнэлүүлж, Монгол Улсын Төрийн дээд шагнал болох:
• Хөдөлмөрийн хүндэт медаль
• Алтан гадас одон
• Хөдөлмөрийн гавьяаны улаан тугийн одон
• Худалдааны гавьяат ажилтан цолуудыг хүртсэн байна.
"Ажил, амьдралын гараагаа эхэлсэн 'Наран'-аасаа төр засагтаа хөдөлмөрөө үнэлүүлсэн олон удирдагч, тэргүүлэгчид төрөн гарсныг харах үнэхээр бахархалтай байна" хэмээн Д.Удвал захирал чин сэтгэлийн талархлаа илэрхийлжээ.
Талархал дүүрэн нэгэн үдэш
Гавьяат цолны баяраа тэд саяхан бизнесийн түншүүд, анд нөхөд, үе үеийн "Наран"-чуудынхаа хүрээнд маш дулаахан, дурсгалтай үдэш болгон тэмдэглэсэн юм. Д.Удвал захирал баярын сэтгэгдлээ хуваалцахдаа:
"Энэхүү баярт минь хүрэлцэн ирж, хүндэтгэл үзүүлсэн эрхэм түншүүд, анд нөхөд, хайрт хамт олондоо чин сэтгэлийн талархал илэрхийлье. Баяр гэдэг зөвхөн нэг өдрийн үйл явдал биш, харин биднийг холбож, итгэл, хайр, нөхөрлөлийг улам бататгадаг нандин мөч юм" хэмээн онцолсон юм.
Монголын бизнесийн олон салбарын удирдагчдыг бэлтгэн гаргасан "Наран" группийн түүхийг 35 жилийн турш хамтдаа бүтээлцсэн баг хамт олондоо болон залуу үеийнхэндээ урам зориг, эрч хүч өгөн ажиллаж буй Худалдааны гавьяат ажилтан Д.Удвал захиралдаа цаашдынх нь ажил үйлсэд улам их амжилтыг хүсэн ерөөе!
Та бүхэн манай үүсгэн байгуулагчийн замнал, үнэт зүйлсийн талаарх сэтгэгдлээ доор хуваалцаарай.
