Багануур Хувьцаат Компани

31/01/2026

ЭХ ОРНОО ТӨЛӨӨЛӨН ОЛОН УЛСЫН ТЭМЦЭЭНД ОРОЛЦОХ ӨСВӨРИЙН ТАМИРЧДАДАА АМЖИЛТ ХҮСЬЕ

🔰2025 оны Улсын аварга шалгаруулах тэмцээнд амжилттай оролцож, аваргын алтан медаль, алтан цомын эзэн болсон Багануур ХК-ийн “Уурхайчин” спорт цогцолборын дэргэдэх өсвөрийн сагсан бөмбөгийн Т.Билгүүнбаатар дасгалжуулагчтай “Багануур RAIDS” хөвгүүдийн баг олон улсын тэмцээнд эх орноо төлөөлөн оролцох эрхээ авч, маргааш БНХАУ-ыг зорих гэж байна.
🔰Анхны олон улсын тэмцээндээ оролцож, амжилтын замналаа үргэлжлүүлэх гэж буй өсвөрийн тамирчдад өнөөдөр компанийн Гүйцэтгэх захирлын үүрэг гүйцэтгэгч Т.Отгонболд, Захиргаа, хүний нөөцийн дарга Ц.Уранбилэг нар амжилт хүсэж, компанийн дэмжлэгийг гардууллаа.
🔰Самаранч сан болон БНХАУ-ын Сагсан бөмбөгийн холбоо хамтран зохион байгуулж буй тус олон улсын тэмцээн нь 2026 оны 2 дугаар сарын 1-нээс 7-ны өдрүүдэд БНХАУ-ын Фужиан мужийн Жинжиан хотод зохион байгуулагдана.
🔰Энэхүү тэмцээн нь Азийн улс орнуудын дунд өндөр түвшний сагсан бөмбөгийн өрсөлдөөнийг бий болгох, өсвөр үеийн тамирчдын олон улсын нөхөрлөлийг дэмжих, цаашлаад олимпын наадамд бэлтгэх, соёлын солилцоог өргөжүүлэх зорилготой юм.
Т.Билгүүнбаатар дасгалжуулагчтай өсвөрийн тамирчдадаа спортын өндөр амжилт хүсье! Та бүхэн сайн яваад ирээрэй🇲🇳🏀

27/01/2026

НҮҮРС ПИРОЛИЗЫН ҮЙЛДВЭРИЙН ТӨСЛИЙН ТӨЛӨВЛӨЛТТЭЙ ТАНИЛЦЛАА
🔰Монгол Улсын Засгийн газрын 2024-2028 оны үйл ажиллагааны хөтөлбөр, Шинэ сэргэлтийн бодлого, Засгийн газраас хэрэгжүүлэх 14 мега төслийн нэг нь “Хөх нүүрс” төсөл юм. Төслийн хүрээнд Багануурын нүүрсний уурхайд түшиглэн “Нүүрс химийн цогцолбор” байгуулахаар төлөвлөсөн.
🔰“Багануур нүүрс-химийн цогцолбор” төслийн хүрээнд Багануурын нүүрсний уурхайг түшиглэн “Нүүрс-пиролизын үйлдвэр”-ийг 3 үе шаттайгаар байгуулах төлөвлөгөөтэйгөөр төслийн техник, эдийн засгийн үндэслэл (ТЭЗҮ)-ийг 2025 онд боловсруулж дууссан.
🔰Нийгэм, эдийн засагт өндөр ач холбогдолтой энэхүү төслийн 1-р үе шатанд жилд 600 мянган тонн “Хөх нүүрс” буюу хагас кокс үйлдвэрлэх бөгөөд ингэснээр айл өрхүүдийн түлшний зардлыг 60 хувиар бууруулж, Улаанбаатар хотын агаарын бохирдлыг 70–80 хувиар бууруулах бодит боломж бүрдэх юм. Мөн нүүрс пиролизын үйлдвэрийн дайвар бүтээгдэхүүн болох хийг ашиглан 40 МВт-ын цахилгаан станц байгуулж, үйлдвэрийн дотоод хэрэгцээг бүрэн хангахаас гадна төвийн бүсийн эрчим хүчний системд 26 МВт цахилгаан нийлүүлэхээр төлөвлөж байна.
🔰Төслийн 2-р үе шатанд Багануурын уурхайн хүрэн нүүрсийг гүн боловсруулж, кальцийн карбид, хуванцар үйлдвэрлэлийн түүхий эд үйлдвэрлэхээр төлөвлөсөн. Үүнтэй уялдуулан Багануур дүүрэгт 660 МВт-ын дулааны цахилгаан станц байгуулж, цахилгаан болон дулааны эрчим хүчийг төвийн бүсийн нэгдсэн системд нийлүүлэхээр төлөвлөсөн.
🔰3-р үе шатанд хүрэн нүүрсийг хийжүүлэх үйлдвэрийг ашиглалтад оруулж, нийллэг байгалийн хий, метанол, дизель түлш, бензин, аммонийн нитрат зэрэг стратегийн ач холбогдол бүхий бүтээгдэхүүнүүдийг дотооддоо үйлдвэрлэх юм.
🔰“Багануур нүүрс-химийн цогцолбор” төсөл бүрэн хэрэгжсэнээр Багануурын уурхайг түшиглэсэн нүүрс боловсруулах 9 үйлдвэр байгуулагдаж, 3500 гаруй шинэ ажлын байр бий болохоос гадна 14 нэр төрлийн эцсийн бүтээгдэхүүн үйлдвэрлэн, бүс нутгийн болон улсын эдийн засгийн өсөлтөд чухал хувь нэмэр оруулах цогц төсөл юм.

27/01/2026

ЗАСГИЙН ГАЗРЫН ХЭРЭГ ЭРХЛЭХ ГАЗРЫН ДАРГА С.БЯМБАЦОГТ, БАГАНУУР ДҮҮРГЭЭС СОНГОГДСОН УИХ-ЫН ГИШҮҮД ЗЭРЭГ АЛБАНЫ ХҮМҮҮС “БАГАНУУР” ХК-Д АЖИЛЛАЖ, ХЭРЭГЖҮҮЛЖ БУЙ ТОМООХОН ТӨСӨЛ ХӨТӨЛБӨР, ТУЛГАМДАЖ БАЙГАА АСУУДЛУУДЫН ТАЛААР ХЭЛЭЛЦЛЭЭ
🔰УИХ-ын гишүүн, ЗГХЭГ-ын дарга С.Бямбацогт, УИХ-ын гишүүн Ц.Сандаг-Очир, С.Амарсайхан, Нийслэлийн ЗД-ын нэгдүгээр орлогч Т.Даваадалай, Багануур дүүргийн удирдлагууд, “Эрдэнэс Монгол” ХХК-ийн Геологи үйлдвэрлэлийн бодлогын газрын дарга Ц.Төгсбуян тэргүүтэй албаны хүмүүс өнөөдөр Багануур ХК-д ажиллаа.
🔰Уулзалтын эхэнд компанийн Гүйцэтгэх захирлын үүрэг гүйцэтгэгч Т.Отгонболд үйлдвэрлэлийн үйл ажиллагаа, хэрэгжүүлж буй томоохон төсөл хөтөлбөрүүд, тулгамдаж буй асуудлаа танилцуулаа. Монгол улсын эрчим хүчний тулгуур уурхай Багануур ХК-ийн уурхайчин хамт олон 2025 онд 4.8 сая тонн нүүрс олборлон борлуулж, төлөвлөгөөгөө үзүүлэлт бүрээр 100-104 хувиар биелүүлэн ажилласан. Мөн 268.2 тэрбум төгрөгийн орлого төвлөрүүлж орлогын төлөвлөгөөгөө биелүүлэн ажилласан юм.
🔰Түүнчлэн тэрээр тулгамдаж буй асуудлуудаа танилцууллаа. Үүнд:
-Багануур ХК нийт 269.9 тэрбум төгрөгийн урт болон богино хугацаат өр төлбөртэй. Засгийн газраас энэхүү олон жил хуримтлагдсан өр төлбөрийг нэг удаа тэглэх боломжтой эсэх,
-Нүүрс-пиролизийн үйлдвэрт жилд 1,867.7 мянган тонн нүүрс нийлүүлэхийн тулд компанийн үйлдвэрлэлийн хүчин чадлыг нэмэгдүүлэхэд шаардлагатай 218,5 тэрбум төгрөгийн хөрөнгө оруулалтыг шийдвэрлүүлэх
-Нүүрсний үнийг 2025 оны 04 сарын 02-ны өдрийн 167 тоот тогтоолоор эрчим хүч үйлдвэрлэх зориулалтаар борлуулж буй 1 тонн нүүрсний суурь үнийг 5.0%-иар бууруулж 51,386 төгрөг болгосныг цаашид үе шаттайгаар нэмэгдүүлэх боломж,
-Хэрэглэгчдэд ирэх үнийн ачааллыг зохистой түвшинд барих зорилгоор тусгай зөвшөөрөл эзэмшигчдэд эрчим хүч болон нүүрсний үнэ тарифын алдагдлыг нөхөх татаасыг улсын төсвөөс олгох эрх зүйн зохицуулалтыг бүрдүүлэх боломжтой эсэх талаар танилцууллаа.
🔰Уулзалт асуулт хариултаар үргэлжлээд дараа нь “Эрдэнэс ҮТП” ХХК-ийн Гүйцэтгэх захирал Н.Мөнх-Идэр Багануур ХК-ийг түшиглэн байгуулах “Нүүрс-Пиролизын үйлдвэр” буюу Хөх нүүрсний төслийн танилцуулгыг хийлээ.
🔰ЗГХЭГ-ын дарга С.Бямбацогт уулзалтыг дүгнэж, уулзалтад оролцсон талуудад үүрэг даалгавар өгсөн. Уулзалтад оролцогчид Уулын 1-р хэсгийн үйл ажиллагаа, Нүүрс пиролизын үйлдвэр байгуулагдах талбайтай танилцаад өнөөдрийн уулзалт өндөрлөлөө.

21/01/2026

https://baganuurmine.mn/job2026-01-21-2/

21/01/2026

https://baganuurmine.mn/job2026-01-21-1/

12/01/2026

✅Монгол улсын эрчим хүчний тулгуур уурхай Багануур ХК-ийн уурхайчин хамт олон 2026 оны 01 дүгээр сарын 10-ны өдрийн 08:00 цагаас 01 дүгээр сарын 11-ний өдрийн 08:00 цаг хүртэл 308 вагон буюу 20695 тн нүүрс олборлон, эрчим хүчний салбарт нийлүүллээ. Энэ нь 48 жилийн хугацаанд нэг хоногт хамгийн олон вагон ачсан өдрүүдийн нэг болж түүхэнд тэмдэглэгдэж байна.
✅Яг жилийн өмнө буюу 2025 оны 1-р сарын 01-ээс 02-ны өдөр ажилласан ээлжүүд 319 вагон, 20700 тн нүүрс ачиж түүх бүтээж байв.
✅Энэхүү амжилтыг бататган амжилттай ажилласан Л.Пүрэвсэнгэ даргатай 1-р сарын 10-ны өдрийн нэгдүгээр ээлж, С.Батзаяа даргатай 2-р ээлжийн нийт уурхайчин хамт олондоо баяр хүргэж, талархал илэрхийлье👏👏👏

09/01/2026

ТАЙЛБАР МЭДЭЭЛЭЛ

31/12/2025

МЭНДЧИЛГЭЭ

31/12/2025

31/12/2025

МЭНДЧИЛГЭЭ
Эрдэнэс Монгол нэгдлийн бүрэлдэхүүн, Монгол улсын эрчим хүчний тулгуур уурхай Багануур Хувьцаат Компанийн Үе үеийн уурхайчид, одоо ажиллаж буй уурхайчин хамт олон, тэдний гэр бүлүүд, Хувьцаа эзэмшигчид, ТУЗ-ийн гишүүд, Найдвартай харилцагчид, Хамтран ажилладаг байгууллага, хувь хүмүүс та бүхэндээ шинэ он, шинэ жилийн мэнд дэвшүүлье.
🇲🇳🇲🇳🇲🇳МОНГОЛ УЛСЫН ГАЛ ГОЛОМТ ҮҮРД МАНДАН БАДРАХ БОЛТУГАЙ🇲🇳🇲🇳🇲🇳

30/12/2025

БАГАНУУР ХК-ИЙН УУРХАЙЧИН ХАМТ ОЛОН ШИНЭ ГАВЬЯАТААРАА БАХАРХАЖ БАЙНА
🔰Үндэсний эрх чөлөө, тусгаар тогтнолоо сэргээн мандуулсны 114 жилийн ойн өдөр Монгол Улсын Ерөнхийлөгч Ухнаагийн Хүрэлсүх зарлигаар Багануур ХК-ийн Засварын хэсгийн дарга Гүрсэдийн Соронзонболд МОНГОЛ УЛСЫН ГАВЬЯАТ УУРХАЙЧИН болсон нь уурхайчдад баяр дээр баяр нэмсэн үйл явдал боллоо.
🔰Г.Соронзонболд нь 1986 онд Багануурын уурхайд ирснээс хойш тасралтгүй 40 дахь жилдээ ажиллаж байгаа бөгөөд 1986-1990 онд Технологийн дамжлагын хэсэгт Засварчин, 1990-1992 онд цахилгаанчин, цахилгааны мастер, 1992-1997 онд Цахилгааны инженер, 1997-2006 онд Хүчилтөрөгч компрессор станцын механик, 2006-2017 онд Засварын хэсгийн инженер, 2017 оноос одоо хүртэл Засварын хэсгийн даргаар ажиллаж байна.
🔰Түүний амжилтуудаас дурдвал: Технологи дамжлагын хэсэгт ажиллаж байхдаа технологи дамжлагын бункер дүүргэлтийг мэдрэх багаж санаачилж, ШБОС-ын шагнал авч байв. Мөн түүнчлэн 1997 оноос 2006 онд хүчилтөрөгч, компрессорын станцыг удирдан ажиллаж байхдаа Оросын мэргэжилтэнтэй хамтран уг станцын тоног төхөөрөмжийг шинэчлэх ажлыг амжилттай хийж гүйцэтгэсэн.
🔰Засварын хэсгийн инженерээр ажиллаж байхдаа алхагч экскаваторуудын татах вилка, шууд утгуурт экскаваторуудын хөтлөгч одон дугуйг сэргээн засварлах, шинээр хийх ажлыг санаачлан хийснээс хойш одоог хүртэл компани дээрх сэлбэгүүдийг зах зээлээс худалдан авахгүй эдийн засгийн хэмнэлт хийж байна. 2016 онд үйлдвэрлэлийн ажлын шаардлагаар өвлийн оргил ачааллын үед хуучин сумны бэлдэц ашиглан ЭШ 10/70 экскаваторын 70м урт сумыг өөрийн санаачилгаар хийж байсан нь өнөөг хүртэл ашиглагдсаар байна.
🔰Г.Соронзонболд нь 2017 онд тухайн үеийн Судалгаа хөгжлийн хэлтэстэй хамтран ЭШ 10/70 экскаваторын шанага үйлдвэрлэх төслийн ажлыг эхлүүлэн компанидаа дотоод нөөц бололцоогоо ашиглан хийж эхэлснээс хойш 2025 онд 8 дах шанагаа хийж дуусган хүлээлгэн өгсөн. Ингэхдээ анх ОХУ-ын шанаганы загварыг сайжруулан хийж байсан бол дараа нь АНУ-ын ESCO брэндийн шанаганы загвар хийцийг сайжруулан хийж, жилээс жилд хийц чанарт сайжруулалт хийсээр одоо Багануур ХК-нд ажиллаж буй 4 ширхэг ЭШ 10/70 экскаваторт 8 ширхэг импортыг орлох шанагатай болгож 2-3 тэрбум төгрөгийн эдийн засгийн үр нөлөө үзүүлээд байгаа юм.
🔰Мөн компанийн уулын тоног төхөөрөмжүүдийн ашиглалтын хугацаа өндөр болсон тул зах зээлийн хөрөнгө оруулалт бусад үйлдвэрлэлийн явцаас шалтгаалж захиалсан сэлбэг цаг хугацаандаа ирэхгүй, ирсэн ч их цаг алдаж ирдэг учир бүх төрлийн экскаваторыг хэвийн ажиллахад гол үүрэг гүйцэтгэгч эвдрэл саатал их гардаг сэлбэгүүдийг сэргээн засварлах, шинээр хийх ажлыг Г.Соронзонболдын удирддаг Засварын хэсгийн хамт олон хийж гүйцэтгэдэг юм. Тэд орчин цагийн техникийн хөгжил, гагнуурын технологи болон металл боловсруулах технологийн дагуу механик боловсруулалт хийж, сэргээн засварлаж ажилд оруулснаар компанийн эдийн засагт үр ашгаа өгөхийн сацуу, үйлдвэрлэлийн тасралтгүй үйл ажиллагаанд чухал үүрэг гүйцэтгэдэг.
🔰Г.Соронзонболдын Багануур ХК-д төдийгүй Монголын уул уурхайн салбарт оруулсан хувь нэмэр үнэлж баршгүй их билээ.
🔰Монгол улсын “Гавьяат уурхайчин” Гүрсэдийн Соронзонболд танаар Монгол улсын эрчим хүчний тулгуур уурхай Багануур ХК-ийн уурхайчин хамт олон нь бахархаж байна. Танд дахин баяр хүргэж, амьдралын хамгийн сайн сайхан бүхнийг хүсэн ерөөе❤️

30/12/2025

ДАХИН НЭГ ТҮҮХЭН АМЖИЛТ БҮТЭЭЛЭЭ

🔰2025 оны 12-р сарын 29-ний өдөр буюу Үндэсний эрх чөлөө, тусгаар тогтнолоо сэргээн мандуулсны 114 жилийн ойн баярын өдөр Багануур ХК-ийн Хөрс нүүрс тээврийн хэсгийн CAT 777D №162 автосамосваль НЭГ САЯ километр зам тууллаа.
🔰Тус машиныг 2016 оны 08 дугаар 01-ний өдөр хүлээн авч ашиглалтад оруулснаас хойш 9 жил 4 сарын хугацаанд нийт 215483 рейс хийж, 4.4 сая литр түлш зарцуулж, 66108 мото цаг үр бүтээлтэй ажиллуулж, 9.1 сая шоо метр уулын цул тээвэрлэж, Багануур ХК-д ашиглагдаж буй CATERPILLAR брэндийн сая километр зам туулсан 11 дэх автосамосваль болгож буй нь энэ юм.
🔰CAT 777D №162 автосамосвалийг анх хүлээн авч байсан Г.Мөнхөө даргатай бригадын хамт олон болох оператор Г.Болдбаатар, Ц.Батхишиг, Х.Болдбаатар нарт болон үргэлжлүүлэн хүлээн авч, машиныхаа засвар, техник үйлчилгээг цаг тухайд нь чанартай хийж гүйцэтгэн эдэлгээг уртасгаж, үйлдвэрлэлийн төлөвлөгөө зорилтыг биелүүлэхэд чухал үүрэг гүйцэтгэн ажилласан ТАМЗХ-ийн хамт олон, одоогийн бригадын М.Санжмятав даргатай С.Дарханбаатар, Б.Наранчулуун, С.Төмөрчөдөр нартаа баяр хүргэж талархал илэрхийлье.
🔰CATERPILLAR брэндийн хүнд даацын өндөр бүтээмжтэй техникийг үр бүтээлтэй ашиглаж нэг сая километр зам туулсан бригадын хамт олондоо дахин баяр хүргэе👏👏👏
Та бүхний ажил үйлс өөдрөг бүтэмжтэй, алтан шар зам нь өлзийтэй байхын ерөөл дэвшүүлье❤️