26/03/2026
Austevoll Kraftlag SA 80 år
I dag markerer vi eit stort og stolt jubileum – Austevoll Kraftlag er 80 år.
Historia vår startar med eit behov. Eit behov for lys, varme og framtidstru i eit øysamfunn der folk bokstaveleg tala brende jorda for å overleva. Framsynte kvinner og menn såg at noko måtte gjerast. Då kjøpmann Andreas Halstensen i 1938 tok til orde for å få elektrisk kraft til øyane, handla det ikkje berre om teknologi – det handla om å skapa livsgrunnlag og framtid for folket.
I 1946 vart P/L Austevoll og Nordre Fitjar kraftlag skipa. Med enkle midlar, sterk dugnadsånd og vilje til samarbeid, byrja arbeidet med å byggja ut straumnettet. Folk bar stolpar, grov grøfter og gjorde ein enorm innsats for å få lys i husa. For mange var det ikkje pengar, men arbeid som gjorde tilkopling mogleg.
Frå dei første linjene vart spenningssette på 1950-talet, til den siste øya fekk straum i 1958, har utviklinga vore formidabel. Kraftlaget har gått frå å byggja eit grunnleggjande straumnett – til å utvikla eit robust og framtidsretta energinett.
Gjennom tiåra har Austevoll Kraftlag vist evne til å tilpassa seg nye tider. Vi har modernisert nettet, styrkt forsyningstryggleiken og teke i bruk ny teknologi. Samstundes har vi våga å tenkja nytt – med satsing på fiber, digitale tenester, vatn og avlaup, og andre samfunnsbyggjande tiltak.
Eit av dei mest tydelege døma på rolla vår som samfunnsaktør er bidraget til Austevollsbrua – eit prosjekt som knytte kommunen tettare saman og la grunnlag for vidare utvikling.
Det som likevel står sterkast gjennom alle desse åra, er menneska. Dei som bygde kraftlaget. Dei som arbeidde i det. Og dei som eig det – innbyggjarane i Austevoll. Austevoll Kraftlag har alltid vore meir enn eit energiselskap. Vi har vore – og er – ein viktig del av samfunnsutviklinga i kommunen.
Når vi no ser framover, står vi igjen i ei tid med store endringar – innan energi, teknologi og struktur i bransjen. Men historia vår viser at vi har evna til å tilpassa oss, tenkja nytt og stå støtt i endring. Det gir oss eit solid fundament for dei neste 80 åra.
I dag kickstartar vi bursdagsfeiringa vår, og den ynskjer vi å dela med våre fantastiske og dyktige kollegaer og med våre gode og lojale kundar. Frå no og ut 2026 vil vi markera 80-årsjubileet gjennom ulike arrangement saman med kundane våre.
Vi ynskjer å retta ei varm takk til alle som har vore med oss på vegen – til kundane våre, til kollegaene våre og til alle som på kvar sin måte har bidrege til å byggja Austevoll Kraftlag. Me ser fram til å jobba vidare saman med dykk og til å byggja eit endå meir robust Austevoll i åra som kjem.
Gratulerer så mykje med dagen til oss alle !
