29/04/2026
CENPRI SUPORTADO ANG ENERGY CONSERVATION PROGRAM SANG MARCOS ADMINISTRATION
Suportado sang Central Negros Power Reliability Incorporated ang kampanya sang national government nga magkinot sa paggamit sang enerhiya samtang nagapatuman man ini sang kaugalingon nga austerity measures.
Ang CENPRI, nga may diesel power plant sa Barangay Calumangan sa Bago City, ang nagadul-ong sang supplementary power supply sa tion nga magtaas ang demand sa kuryente kag subong man sa tion sang emerhensiya.
Para sa CENPRI, isa ka positibo nga tikang ang austerity measures ni President Bongbong Marcos, nga nagatutok sa energy conservation, naga-limit sang non-essential spending, kag nagahatag prayoridad sa essential public services bangud sang nagataas nga economic cost bilang resulta sang gyera sa tunga sang Amerika kag Iran.
Ang mandatory nga energy saving measures, ginpasimple nga holiday celebrations kag ang suspension sang excise taxes sa LPG kag kerosene ang nagapahagan-hagan sang impact sang krisis sa mga pumuluyo.
Sa bahin sang CENPRI, nga may power plant sa Purok San Jose sa Barangay Calumangan, Bago City, ginpahayag sang spokesperson sini nga si Emmanuel Canto nga nagaupod sila sa tinutuyo sang presidente.
Bilang suporta, ginsugdan sang CENPRI ang kaugalingon sini nga austerity measures kaangay sang pagpaiway sang unnecessary travels, pagpatigayon sang ride-sharing kag van pooling, pag-estrikto sa konsumo sang krudo sa ila mga generators kag ang paglikaw sa pag-uyang sang enerhiya.
Sa bulig sang Human Resource Department, ang mga empleyado sang CENPRI ang ginahaylo man nga mag-obserbar sang energy saving measures indi lamang sa trabaho kundi subong man sa ila tagsa ka panimalay kaangay na lamang sang pagpatay kag pagkakas sa saksakan sang mga appliances, gadgets, chargers kag iban pa nga mga electronic devices nga wala ginagamit.
Sa bahin sang management, nagpatuman ini sang regular inspections sa mga power cords, outlets kag iban pa nga electrical fixtures kag gilayon nga ilisan kun may senyales nga na-damage na agud malikawan ang sunog.
