05/10/2026
Taun-taon, inilalaan ang 𝐢𝐤𝐚𝐥𝐢𝐦𝐚 𝐧𝐠 𝐎𝐤𝐭𝐮𝐛𝐫𝐞 upang gunitain ang mga g**ong naghubog sa bawat Pilipino, ito man ay sa silid-aralan, sa komunidad, o sa mga pook kung saan nagawang aksesible ang edukasyon. Bawat paaralan ay may tampok na palatuntunan, kung saan isinentro ang mga tagapagturo sa entabladong pinagmamasdan ng sangkalahatan. Hawak-hawak nila ang mga regalong ibinigay — tsokolate, bulaklak, mensahe — mga bagay kung saan ikinakapsula ang pasasalamat na nais iparating.
Gayunpaman, sa likod ng mga ngiti, palakpakan, at makukulay na palamuti sa araw na ito, naroon ang mga naratibong madalas na hindi naikukuwento: mga gabi ng pagpupuyat sa gitna ng bunton ng mga tinitimbang na papel, sariling perang inilalaan mula sa kakarampot na sweldo, at ang walang katapusang pag-unawa sa iba't ibang suliraning bitbit ng bawat mag-aaral sa kanilang pagtapak sa lunsaran ng silid.
Unti-unting pinabibigat ang mga pinapasan na ito ng nabubulok na sistema ng bansa, na binubunyag ng paulit-ulit na pagbabawas sa badyet para sa edukasyon. Kasapakat nito ang kakulangan ng plantilla o permanenteng posisyon bunsod ng laganap na kontraktuwalisasyong nag-iiwan sa karamihan ng mga g**o sa trabahong walang katiyakan at seguridad. Sa halip na masuportahan, madalas silang napapabayaan ng mismong platapormang may responsibilidad na hustuhin ang mga pangangailangan sa pasilidad at kagamitan.
Dagdag pa rito, may mga g**ong hindi lamang tinatrato nang hindi nararapat, kundi tinutugis pa. Pinaparatangan sila at binabahiran ng huwad na karumihan bilang tugon sa pagtatanggol sa kanilang karapatan at sa karapatan ng kanilang mga mag-aaral, na naglalagay sa kanila sa posisyong nasa bingit ng panganib. Binibigyang-diin ito ng mga balitang nagtatampok sa pagkakapaslang nina Chad Booc at Gelejurain Ngujo II, mga boluntaryong g**o sa mga paaralang Lumad, noong 2022, na tinawag ng Save Our Schools (SOS) Network na masaker.
Maging ang mga paaralang ipinundar para sa Indigenous People (IP), na naghahatid ng edukasyon sa mga liblib na pamayanan, ay ipinasara imbes na suportahan at pangalagaan. Hanggang ngayon, nananawagan ang SOS Network na muling buksan ang mahigit 200 paaralang Lumad na napasara sa ilalim ng administrasyong Duterte, kabilang ang 55 paaralan ng Salugpongan.
Sa patuloy na pagdarampot ng wastong karunungan, karapat-dapat lamang na bigyang-pagkilala ang naging ambag ng mga g**o sa lipunan — at lalong-lalo na ang kanilang pagdarahop, na hindi kailanman dapat maging kapalit ng anumang bokasyon. Kasama rin sa panawagan ang pagtutol sa mga pilit na pagbabagong lumilihis sa tunguhin ng edukasyon, tulad ng "GE reform" na nagbabantang magbawas sa mga asignaturang naghahatid ng impormasyong humuhubog sa kritikal na pag-iisip at makabayang kamalayang bahagi na ng pagiging Pilipino, kasabay ng hindi maikakailang pagkawala ng trabaho ng maraming propesor.
Nasasaksihan lamang ang tunay na pagpaparangal kung mapapakinggan ang kanilang mga boses at maipagtatanggol ang kanilang dignidad. 𝑯𝒂𝒓𝒊𝒏𝒂𝒘𝒂'𝒚 𝒎𝒂𝒕𝒖𝒕𝒖𝒉𝒂𝒏 𝒅𝒊𝒏 𝒏𝒈 𝑷𝒊𝒍𝒊𝒑𝒊𝒏𝒂𝒔 𝒏𝒂 𝒉𝒊𝒏𝒅𝒊 𝒔𝒂𝒑𝒂𝒕 𝒂𝒏𝒈 𝒑𝒂𝒏𝒂𝒏𝒅𝒂𝒍𝒊𝒂𝒏𝒈 𝒆𝒏𝒕𝒂𝒃𝒍𝒂𝒅𝒐, 𝒌𝒖𝒏𝒈 𝒂𝒏𝒈 𝒏𝒂𝒔𝒂 𝒍𝒊𝒌𝒐𝒅 𝒏𝒊𝒕𝒐 𝒂𝒚 𝒅𝒊𝒍𝒖𝒃𝒚𝒐𝒏𝒈 𝒔𝒖𝒎𝒖𝒔𝒖𝒍𝒐𝒌 𝒔𝒂 𝒔𝒊𝒍𝒊𝒅 𝒏𝒂 𝒑𝒊𝒏𝒂𝒈-𝒂𝒂𝒓𝒂𝒍𝒂𝒏.
Statement and Caption by Nash
Edited by Yaj