30/07/2026
*اسلام آباد*
پاکستان اکنامک سمٹ 2026 میں کوئٹہ چیمبر آف کامرس اینڈ انڈسٹری نے بھرپور اور مؤثر انداز میں بلوچستان کی کاروباری برادری کی نمائندگی کی۔
پیٹرن اِن چیف حاجی غلام فاروق، صدر محمد ایوب مریانی اور چیمبر کے سینئر و ایگزیکٹو ممبران نے یونائیٹڈ بزنس گروپ (UBG) اور فیڈریشن آف پاکستان چیمبرز آف کامرس اینڈ انڈسٹری (FPCCI) کے مشترکہ زیرِ اہتمام، منعقدہ اس قومی اقتصادی فورم میں شرکت کی، جہاں ملک بھر سے صنعتکاروں، تاجروں، برآمد کنندگان، درآمد کنندگان اور چیمبرز آف کامرس کے نمائندگان شریک ہوئے۔
اس موقع پر پیٹرن اِن چیف حاجی غلام فاروق نے اپنے مختصر مگر جامع خطاب میں کہا کہ بلوچستان کے مسائل کو وقتی نہیں بلکہ قومی ترجیح کے طور پر دیکھا جانا چاہیے۔ انہوں نے اس امر پر افسوس کا اظہار کیا کہ ماضی میں مختلف سیاسی قوتوں نے بلوچستان کو محض سیاسی مقاصد کے لیے استعمال کیا، مگر اقتدار میں آنے کے بعد صوبے کے بنیادی مسائل کو نظرانداز کر دیا، جس کے باعث عوام اور مقامی قیادت کو مشکلات کا سامنا کرنا پڑا۔ انہوں نے زور دیا کہ بلوچستان پاکستان کا مستقبل ہے، لہٰذا یہاں پائیدار امن، مؤثر حکمرانی، منصفانہ پالیسیوں اور زمینی حقائق کے مطابق فیصلوں کے ذریعے ہی دیرپا ترقی اور معاشی استحکام ممکن ہے۔
سمٹ سے خطاب کرتے ہوئے صدر کوئٹہ چیمبر محمد ایوب مریانی نے بلوچستان کے تاجروں، صنعتکاروں اور کاروباری برادری کو درپیش مسائل نہایت مؤثر انداز میں پیش کرتے ہوئے کہا:
"ہمیں صرف امن دو، امن دو۔ امن ہوگا تو سرمایہ کاری آئے گی، تجارت بڑھے گی، صنعت چلے گی اور پاکستان کی معیشت مضبوط ہوگی۔"
انہوں نے بلوچستان میں امن و امان، محفوظ شاہراہوں، سرحدی تجارت کی سہولت، تاجروں کے جان و مال کے تحفظ، پاک۔ایران تجارت کے فروغ، کسٹمز نظام میں اصلاحات اور دہشت گردی سے متاثرہ تاجروں کے لیے مؤثر معاوضہ نظام کی ضرورت پر زور دیا۔
اس موقع پر یو بی جی کے سرپرستِ اعلیٰ ایس۔ ایم تنویر، FPCCI کے صدر عاطف اکرام شیخ، سابق وزیر اعلی بلوچستان علاوالدين مری، کوئٹہ چیمبر کے نائب صدر انجینئر میروائس خان کاکڑ ایگزیکٹو و سینئر ممبران سمیت ملک بھر کی کاروباری قیادت نے شرکت کی اور پاکستان کی اقتصادی ترقی کے لیے باہمی تعاون اور مشترکہ حکمتِ عملی کی اہمیت کو اجاگر کیا۔
امن ہی ترقی کی بنیاد ہے، اور بلوچستان میں امن ہی پاکستان کی معاشی خوشحالی کی ضمانت ہے۔
