28/07/2026
بعد ما حكينا في المنشور السابق على أنواع الطاقة الشمسية المنزلية وفسرنا قرار الشركة التونسية للكهرباء والغاز بالسماح باستعمال البطاريات مع منظومات الطاقة الشمسية المربوطة بالشبكة، برشا ناس بدات تسأل:
شنية هي البطارية؟
شنوما أنواعها؟
قداش تشد؟
قداش سومها؟
وهل لازم نركبها؟
❓شنية هي البطارية؟
البطارية هي عبارة على بانكة تاع الضوّ في النهار تتشرجى بالضوّ اللي تنتجه الألواح الشمسية وتخزنه، وفي الليل أو وقت يقص الضوّ تخرجه باش تخدملك الأجهزة متاعك. أول حاجة لازم نتفاهمو فاها البطارية راهي ماتنتجش ضوّ وما تزيدش فيه، البطارية مهمتها الوحيدة أنها تخزنلك الضوّ اللي تنتجه طاقتك في النهار يعني في عوض ما الضوّ الزايد يرجع للستاغ ويضيع عليك الباطري تخبيهولك باش تنتفع بيه وقت الحاجة.
❓كيفاش تخدم الطاقة بالباطري؟
نقولو عندك طاقة شمسية تنتج 4 kW في النهار ، والدار تستهلك 2 kW. هكا تولي القسمة : 2 kW تمشي للدار و2 kW يمشو شارج في البطارية.
❓ كيفاش تولي تخدم الطاقة ؟
في الصباح الطاقة الشمسية تخدمك في الدار والزايد تشحن بيه البطارية. وفي الليل الدار تخدم بالبطارية. كان فيها شارج يغطي استهلاكك ، تبقى تعطيك الضوّ ليلة كاملة. كان الباطري فرغت:
- في منظومة طاقة شمسية Hybrid (المربوطة بالستاغ) الonduleur يتحول أوتوماتيكمون يخدم بضوّ الستاغ وما تحسش بقصان الضوّ.
- في منظومة طاقة شمسية Off-Grid الضوّ يقص.
❓شنوما أنواع البطاريات؟
بطاريات الليثيوم : وهي اليوم من أكثر الأنوع المنصوح باها في الطاقة الشمسية على خاطرها :
- تستعملها أكثر من 6000 مرة بين شارج وتفريغ.
- تتشرجى فيسع و مردودها عالي.
- تنجم تستغل حتى 90 أو 95% من الشارج متاعها.
سومها تقريبا في تونس تو من حوالي 2500 دينار للبطارية الوحدة ويطلع حسب السعة والماركة (تنجم تكون أغلى الفترة هاذي خاطر زاد علاها الطلب)و تنجم توصل إلى أكثر من 6000 دينار.
بطاريات GEL و AGM هاذم بطاريات رصاص، صحيح سومهم أقل أما: -عمرهم أقصر.
- عدد مرات الشحن أقل.
- ما يلزمش تفرغهم بالكامل باش ما يموتوش.
سومها تقريبا في تونس بين 500 و1200 دينار للبطارية الوحدة وحسب السعة.
❓ كل قداش لازم نبدل البطارية؟
هذا يعتمد على نوعها وماركتها وطريقة الاستعمال.
- بطاريات الليثيوم تعيش عادة بين 10 و15 سنة.
- بطاريات GEL وAGM تعيش تقريبًا بين 3 و7 سنوات.
اما لازم تعرف أن البطارية ما تموتش طول، أما مع الوقت تنقص قدرتها على التخزين، ووقتها يولي تبديلها هو الحل باش ترجع منظومتك تخدم كيف العادة
❓قداش تنجم تخدمك الباطري؟
هذا يعتمد على زوز حاجات:
✔️ قداش ترفع الباطري.
✔️ قداش تستهلك الدار.
مثال بطارية 5 kWh تنجم تخدملك الضو , التلفزة , الويفي, الثلاجة لمدة بين 3 إلى 5 ساعات، حسب قداش يستهلك كل جهاز. أما كان تحب تخدم سخان الماء, الكليماتيزور, الفور الكهربائي , طرمبة. يلزمك عالاقل 6 بطاريات خاطر الأجهزة هاذم يستهلكوا برشا ضوّ في وقت صغير فبالتالي كان تحب تخدم دار تونسية بالبطاريات لمدة نهار بالاجهزة الكهربائية اللي عايشين بيهم الناس الكل ومعاها الانارة يلزمك بيت كاملة بطاريات وكل ماتزيد حاجة تخدم بالضو يلزمك تزيد معاها باطري ولا ثنين.
❓هل كل واحد مركب طاقة شمسية مطالب يزيدها بطارية؟
لا. كان أغلب استهلاكك يكون في النهار وضوّ الستاغ مايقصش عليك برشا ولا لفترات طويلة ومعندكش حاجة ملحة تلزم عليك انو الضوّ مايقصش خلاص، مفمش علاش تركب بطارية.
❓ كيفاش نختار البطارية؟
قبل ما تشري بطارية، لازم يتعمل حسابـ:
- قداش استهلاكك في الليل.
- قداش تحب البطارية تخدمك.
- شنوة نوع وقوة الOnduleur متاعك.
❓ شكون الحالات اللي يمشي معاهم الباطري كأحسن حل وتربحهم اقتصاديًا؟
- اللي استهلاكهم الكبير يكون بالليل مثلاً دار اللي عايشين فاها يرجعوا من الخدمة كان العشية , قهوة ولا محل تجاري يخدموا كان بالليل ,صالة أفراح .... الحالات هاذي، البطارية تخليهم يستهلكوا الكهرباء اللي انتجتها الطاقة الشمسية نهار كامل ويخدمو باها في الليل، عوض ما تضيع عليهم وياخذوا الضوّ من الستاغ.
- اللي يعانو من انقطاعات متكررة للضوّ ولمدة طويلة وعندهم حاجة ملحة للضوّ كيف اللي عندهم مخابر ولا ثلاجات تخزين ولا المستشفيات ولا اللي عندهم شكون مريض يستحق أجهزة في الدار كيف يقص الضو، ولا حتى على كاميرات المراقبة البطارية تواصل تغذي الدار، وما يوقفوش الأجهزة المهمة. ولهنا قيمة البطارية تكون في استمرارية الخدمة أكثر من مجرد التوفير.
هذاكا علاش حنا نقولولكم راهي البطارية موش حل سحري، وماهوش البديل المناسب للناس الكل صحيح هي تنجم توفرلك الكهرباء وقت انقطاع الضو وتخليك تستغل الإنتاج متاعك في الليل، أما في المقابل تبقى استثمار كلفته مرتفعة برشا، وما هوش الحل الاقتصادي لكل العائلات فالنصيحة نردو بالنا قبل ما ناخذوا قرار الاستثمار في البطاريات وعلاش لا مانعملوش دراسة للاستهلاك وللجدوى كأي مشروع أخر.
