21/07/2026
ّة
بعض الجيران والأخوة والأصحاب يتشكّوا من مكيّفاتهم إلّي يخرّجوا في الهواء وما يبرّدوش (كنت قد تعرّضت بنفسي للمشكلة هاذي)،
سأحاول تفسير أسباب هذه الإشكاليّة انطلاقا من البحث الذي قمت به :
🔹أوّلا ينجّم يكون السّبب بكلّ بساطة خطأ في إعدادات المكيّف (يعني تلقى شكون فلفس الكوموند حطّ mode المروحة أو Fan عوض mode التّبريد أو cool).
🔹ثانيا، وهذا التّفسير الذي ينطبق على أكثر الحالات شيوعا: ينجّم يكون المكيّف متاعك متطابق مع المناخ T1 أو T2 وبالتالي ما يتحمّلش درجات الحرارة المرتفعة (ينفخ في الهواء وما يبرّدش).
أمّا المكيّفات المتطابقة مع مناخ T3 فهي مصمّمة لتحمّل أقسى المناخات، سواء حرارة قد تصل أو تتجاوز 60 درجة(في الصيف) أو 15 درجة تحت الصّفر (في الشتاء).
🔹ثالثا، ينجم يكون المشكل في condensateur (سومها 15 أو 20د) في الحالة كيف تجي تبدّلو يلزم يكون حامل لنفس référence متاع القديم (25uF أو 35uF أو 45uF أو غيره...).
🔹رابعا ينجّم يكون المشكل في boubine أو القطعة إلّي تحمي الضاغط compresseur (مدوّرة بالأحمر في الصّورة المرفقة).
🔹خامسا ينجم يكون الإشكل إلكترونيّ متعلّق بالدارة الكهربائيّة أو ناتج عن ضعف التيار الكهربائي (المكيف وقت يبدى مهواش inverter صعيب يبرّد مع التّيار الكهربائي الضعيف).
🔹سادسا وأخيرا، ينجم يكون المشكل "قاتل" في compresseur في حدّ ذاته.. في الحالة هاذي الصّنايعي إلّي باش يجي يثبّتلك في compresseur يلزم يثبت فيه بالجهاز الذي يقيس التّردّد (موش بالعين أو اللّمس).
للأسف الضّاغط سومو غالي وصعيب تلقاه في الأوروجين موجود في الشنوة، وزيد كما ينجم يشدّلك عامين كما يشدلك شهرين كما يشدّلك نهارين، خاطر مهواش مضمون (لأنك باش تحطّو في وحدة خارجية عندها عمر معيّن).
في الحالة هاذي، الحلّ الأضمن والأنجع هو أنك تشري مكيّف جديد.
👈 بعض النّصائج:
✅ رد بالك يجيك صنايعي يقلك ناقص غاز ويضربك في حق chargement de gaz في حين الإشكال مهواش غاز (برشة يستغلوا الظرف هذا ردوا بالكم منهم، يلزم صنايعي معروف وثقة).
✅ أي واحد باش يركّب كليماتيزور جديد، يلزم تسأل الصنايعي قلو عندك pompe à vide ولّا.. كان قالك ما عنديش قلو ربي يجيبك في الصّواب.. دور pompe à vide هو إخراج الهواء و déchets من الجعب بعد تركيب مكيف جديد لأول مرة أو في حالة تغيير مكان المكيف من مكان لآخر.. والهواء هذاك كيف يتخلّط مع غاز التبريد أو الفاريون ينقّص من جودة التّبريد، يخلّي المكيّف يخدم بأكبر جهد وبالتالي أكثر استهلاك للطّاقة، كما ينجّم يتسبّب في عديد الأعطال مع الوقت.
برشة صنايعية يعتمدوا الطريقة التقليدية في إخراج الهواء بعد التركيب.. صراحة مهياش طريقة مضمونة وتبقى ديما pompe à vide أفضل وأنجع حلّ.
✅ تنظيف المكيّف والصّيانة الدّورية من تنظيف filtres وغيره تعتبر خطوات ضروريّة للحفاظ على كفاءة وجودة التبريد وضمان أكبر عمر ممكن للمكيّف والضّامن ربّي سبحانه.
⛔ حذاري من الحلول الرّعوانيّة لأنّها قد تتسبّب في كوارث أو في عديد الأعطال مع طول المدّة.
بعد هذا الشّرح المبسٌط، إن شاء الله تكون الإفادة حصلت 🌺
