02/04/2020
🔴🔴 هام جدا 🔴🔴
تبسيط صغير في ما يخص الإجراءات الي خذاتهم وزارة الشؤون الاجتماعية لمساعدة التوانسة في تجاوز أزمة كورونا و الحجر الصحي العام .
■ العائلات المعوزة و اللي في العادة هاذم ياخذو في منحة شهرية 180 د قررت الحكومة زيادة عن المنحة الي خذاوها نهار 17 مارس بش تزيدهم منحة 50د (الدفتر الأبيض).
■ العائلات المحدودة الدخل ( دخل أقل من SMIG ) هاذم قررت الحكومة تصرفلهم منحة 200د (الدفتر الاصفر).
↩ باهي هاذم الزوز بش يعرفو تواريخ صرف المنح تاعهم ساهلة برشة يعملو *1017*رقم بطاقة التعريف # بش يجيهم ميساج فيه تاريخ صرف منحتو في البريد التونسي .
🔴 باهي اذا انت جربت و ما لقيتش روحك مقيد ؟؟ بش يجيك ميساج برا قيد عند العمدة . وقتاش؟ ؟ بداية من نهار الأثنين 6 أفريل بش تدخل في القائمة الجديدة تع المنح.
↩ باهي تو نجو لكل المهن الحرة بالعربي القهاوي و المطاعم و العطارة و الحدادة و النجارة و و هاذم بش تتعمللهم بوابة إلكترونية للتسجيل بداية من 7 أفريل بش يسجلو فيها بش الدولة تعوضلهم الضرر عن توقف أعمالهم طيلة أيام الحجر وهوما مسكرين ما يخدموش.
🔴 فوق هذا الكل ثمة البرنامج الوطني للتضامن الي بش تكون فيه مساهمات غذائية هامة من الدولة و الخواص و المواطنين عن طريق التبرع و بش تتواصل لـ 15 يوم و بش تتوزع المساعدات الغذائية للعائلات المستحقة عن طريق الجيش الوطني واصلة لباب الدار ( بعيدا عن كل توظيف)
🔴 هاذي فكرة على الإجراءات اللي خذاتها الدولة للتوانسة المحتاجين و بالله الي مش محتاج يشد بلاصتو و ما يفسدش على غيرو.
الوقت مش متع لهفة و تزاحم في العمادات و المعتمديات و مراكز الضمان الاجتماعي.
و نحاولوا نفهمو كبار السن بش ما يمشوش للبوسطة بالفارغ ... اعملولهم *1017 # تو يعرف التاريخ بالضبط.
