28/04/2026
ℹ️KESCO dhe KEK arrijnë marrëveshje për stabilitetin e tarifave të energjisë elektrike
KESCO njofton të gjithë konsumatorët se, në përputhje me kërkesat dhe rekomandimet e Zyrës së Rregullatorit për Energji (ZRRE), është arritur një marrëveshje e përbashkët me Korporatën Energjetike të Kosovës (KEK), me qëllim menaxhimin më efikas të kostove të furnizimit me energji elektrike.
Në këtë periudhë sfiduese për sektorin energjetik, e karakterizuar nga rritja e nevojës për import të energjisë elektrike, kjo marrëveshje është pjesë e përpjekjeve të koordinuara ndërmjet institucioneve dhe ndërmarrjeve të sektorit energjetik për të ruajtur stabilitetin e sistemit dhe për të mbrojtur konsumatorin fundor.
Në thelb të kësaj marrëveshjeje qëndron aplikimi i një mekanizmi të përkohshëm të shpërndarjes së kostove, i propozuar nga ZRRE, i cili synon të shmangë ndikimin e menjëhershëm të rritjes së kostove në tarifat e energjisë elektrike.
Si furnizues i shërbimit universal, KESCO ka luajtur një rol aktiv në arritjen e kësaj marrëveshjeje, duke mbështetur një qasje që garanton furnizim të qëndrueshëm dhe mbron konsumatorin fundor nga ngarkesat e menjëhershme financiare.
Kjo marrëveshje konsiderohet një hap i rëndësishëm drejt ruajtjes së stabilitetit në sektorin energjetik dhe dëshmon për bashkëpunimin ndërinstitucional në funksion të interesit të qytetarëve.
KESCO mbetet e përkushtuar që të vazhdojë të kontribuojë në zgjidhje të qëndrueshme që sigurojnë furnizim të besueshëm dhe të përballueshëm me energji elektrike.
